អភិបាលខេត្តកំពតជំរុញលើកទឹកចិត្តក្រុមកីឡាករទូកង ឱ្យខិតខំហ្វឹកហាត់ដើម្បីបង្ហាញថ្វីដៃដល់ភ្ញៀវទេសចរ

នៅព្រឹកថ្ងៃទី១៥ ខែតុលា ឆ្នាំ២០២២នេះ ឯកឧត្ដម ម៉ៅ ធនិន អភិបាលខេត្តកំពត បានដឹកនាំអភិបាលរងខេត្ត ថ្នាក់ដឹកនាំ មន្ទីរ អង្គភាពជុំវិញខេត្ត សំណេះសំណាលលើកទឹកចិត្ត និងឧបត្ថម្ភគ្រឿងឧបភោគបរិភោគជូនដល់ក្រុមកីឡាករចំណុះទូក.ង ចំនួន២១ ដើម្បីប្រើប្រាស់អំឡុងពេលហ្វឹកហាត់។

មានប្រសាសន៍នៅក្នុងឱកាសនោះ ឯកឧត្តម ម៉ៅ ធនិន អភិបាលខេត្តកំពត បានលើកឡើងថា រដ្ឋបាលខេត្តនឹងប្រារព្ធពិធីបុណ្យុអុំទុក បណ្តែតប្រទីប អកអំបុក និងសំពះព្រះខែ ពីថ្ងៃទី៦ ដល់ថ្ងៃទី៨ ខែវិច្ឆិកា ឆ្នាំ២០២២ខាងមុខនេះ។ ពិធីនោះនឹងរៀបចំកម្មវិធីប្រណាំងទូក.ង ខ្នាតប្រពៃណី ការប្រកួត និងបង្ហាញក្បាច់កុនល្បុក្កតោ ការប្រគំតន្ត្រី ការសម្តែងរបាំបុរាណ និងសម័យ ការពិព័រណ៍ផលិតផល ភូមិ១ផលិតផល១ ដើម្បីបង្ហាញអំពីសក្តានុពលរបស់ខេត្តកំពត ការបាញ់កាំជ្រូច បង្ហោះគោម និងបណ្តែតប្រទីប ព្រមទាំងមានកម្មវិធីសប្បាយៗជាច្រើនទៀត។ ហើយរដ្ឋបាលខេត្តបានក៏ត្រៀមអំបុក ចែកទុំ និងដូងរាប់តោន ដើម្បីទុកទទួលប្រជាពលរដ្ឋ និងភ្ញៀវទេសចរដែលអញ្ជើញមកចូលរួម និងដើរកម្សាន្តនៅខេត្តកំពតផងដែរ។

ឯកឧត្តមបានបញ្ជាក់ថា ការប្រណាំងទុក.ង គឺផ្នែកមួយសំខាន់ណាស់ក្នុងការទាក់ទាញភ្ញៀវ ដូច្នេះក្រុមកីឡាករទូកងទាំងអស់ ត្រូវខិតខំប្រឹងប្រែងហ្វឹកហាត់ឱ្យបានល្អ ដើម្បីត្រៀមបង្ហាញថ្វីដៃរបស់ទូកនីមួយទៅកាន់អ្នកទស្សនា ក៏ដូចជាភ្ញៀវទេសចរដែលមកកម្សាន្ត នៅថ្ងៃទី៦-៨ ខែវិច្ឆិការ ខាងមុខនេះ។

សម្រាប់គ្រឿងឧបភោគបរិភោគដែលបានផ្តល់ជូនក្រុមកីឡាករ ដើម្បីប្រើប្រាស់នៅក្នុងអំឡុងពេលហ្វឹកហាត់ចាប់ពីថ្ងៃទី១៥ ខែតុលា ឆ្នាំ២០២២នេះទៅ ក្នុងមួយក្រុមទទួលបាន៖ អង្ករ ១តោន ៥០០គីឡូក្រាម ទឹកត្រី ៣០យួរ ត្រីខ ៣កេស ទឹកសុទ្ធ ១០យួរ និងទឹកក្រូច ១០កេស៕

អត្ថបទៈ មន្ទីរព័ត៌មានខេត្តកំពត