អាជ្ញាធរខេត្តកំពតស្នើដល់សមាគម អង្គការមិនមែនរដ្ឋាភិបាល សហគមន៍ ជួយពង្រឹងការងារលើកកម្ពស់សីលធម៌សង្គម

ថ្នាកដឹកនាំខេត្តកំពតបានស្នើដល់ សមាគម អង្គការមិនមែនរដ្ឋាភិបាល សហគមន៍ អាជ្ញាធរមូលដ្ឋាន រួមគ្នាលើកកម្ពស់សីលធម៌សង្គម បណ្តុះវប្បធម៌កតញ្ញូ និងវប្បធម៌ចែករំលែក ដើម្បីរក្សាបាននូវសេចក្តីថ្លៃថ្នូរ កាត់បន្ថយទំនាស់លក្នុងគ្រួសារនៅតាមមូលដ្ឋានទូទាំងខេត្ត។

ថ្លែងនៅក្នុងពិធីបើកវេទិកា ពិគ្រោះយោបល់ជាមួយ សមាគម អង្គការមិនមែនរដ្ឋាភិបាល និងសហគមន៍នានាក្នុងខេត្តកំពត នៅថ្ងៃទី១៧ ខែតុលា ឆ្នាំ២០២២ ឯកឧត្តម វ៉ិត វឌ្ឍនា អភិបាលរងខេត្តកំពតបានលើកឡើងថា សមាគម អង្គការមិនមែនរដ្ឋាភិបាល សហគមន៍នានា បានដើរតួនាទីសំខាន់ណាស់សម្រាប់ចូលរួមចំណែកជួយអភិវឌ្ឍន៍សង្គម និងប្រទេសជាតិ និយាយឡែកឡែកជួយដល់ការអភិវឌ្ឍន៍ខេត្តកំពត ពិសេសជួយពង្រឹងការយល់ដឹងដល់បងប្អូនប្រជាពលរដ្ឋ ធ្វើឲ្យមានការផ្លាសប្តូរឥរិយាបថនៃការគិត និងការប្រព្រឹត្តជាវិជ្ជមាន។

ឯកឧត្តមបានបន្ថែមថា តាមរបាយការណ៍ដោះស្រាយទំនាស់ក្រៅប្រព័ន្ធតុលាការរបស់រដ្ឋបាលខេត្ត ដែលដឹកនាំដោយឯកឧត្តមបណ្ឌិត ម៉ៅ ធនិន អភិបាលខេត្តបានបង្ហាញថា ក្នុងទំនាស់ជាងមួយពាន់ករណីដែលត្រូវបានដោះស្រាយកន្លងមក ភាគច្រើនគឺជាទំនាស់ដណ្តើមយកកេរ្តិ៍មរតក រវាងឪពុកនិងកូន ម្តាយនិងកូន និងទំនាស់រវាងបងប្អូនបង្កើតជាដើម ដែលនេះបង្ហាញអំពីសីលធម៌សង្គមរបស់ប្រជាពលរដ្ឋខេត្តកំពតនៅមានកម្រិត។

ឯកឧត្តមអភិបាលរងខេត្តបានស្នើសុំដល់ សមាគម អង្គការមិនមែនរដ្ឋាភិបាល សហគមន៍នានាទូទាំងខេត្ត អាជ្ញាធរមូលដ្ឋាន សូមជួយពង្រឹងការងារលើកកម្ពស់សីលធម៌សង្គមបន្ថែមទៀត តាមរយៈការជួយសាបព្រួសបណ្តុះវប្បធម៌កតញ្ញូ វប្បធម៌ចែករំលែកដល់ពលរដ្ឋនៅតាមមូលដ្ឋាន ដើម្បីរួមគ្នាសងគុណដល់សន្តិភាព សង់គុណដល់ទឹកដីកំណើត។

តាមការលើកឡើងរបស់មន្ត្រីជំនាញបានឲ្យថាខេត្តកំពត មានសមាគមសរុប៦១ អង្គការមិនមែនរដ្ឋាភិបាល ៥៤អង្គការ សហគមន៍ចំនួន ៨៣ សរុបចំនួន ១៩៨ ក្នុងនោះភាគច្រើនធ្វើសកម្មភាពលើការងារលើកកម្កស់វិស័យអប់រំ ការអភិវឌ្ឍន៍មូលដ្ឋាន សិទ្ធមនុស្ស ការងារអភិរក្សបរិស្ថាន ធនធានធម្មជាតិ ការងាបណ្តុះបណ្តាល និងស្តារកាយសម្បទាដល់ស្ត្រី កុមារ និងជនងាយរងគ្រោះ ជនពិការ និងការងារអភិរក្សសីល្បះវប្បធម៌ខ្មែរជាដើម ហើយរដ្ឋបាលខេត្តតែងតែចូលរួមសហការ គាំទ្រយ៉ាងពេញទំហឹងចំពោះសកម្មភាពរបស់សមាគម អង្គការមិនមែនរដ្ឋាភិបាល និងសហគមន៍នានាទូទាំងខេត្ត៕

អត្ថបទៈ មន្ទីរព័ត៌មានខេត្តកំពត