រយៈពេល ៩ខែក្នុងឆ្នាំ២០២២ អង្គភាពច្រកចេញចូលតែមួយរាជធានី-ខេត្តបានផ្តល់សេវាជូនពលរដ្ឋជាង ៥៧ម៉ឺនសេវា

នៅព្រឹកថ្ងៃទី១៤ ខែតុលា ឆ្នាំ ២០២២ នៅសាលសន្និសិទខេត្តកំពត មានរបៀបចំកិច្ចប្រជុំពិនិត្យវឌ្ឍនភាព និងបញ្ហាប្រឈមនៃការផ្ដល់សេវារដ្ឋបាល រយៈពេល ៩ខែ ឆ្នាំ២០២២ របស់អង្គភាពច្រកចេញចូលតែមួយរាជធានី-ខេត្ត ក្រោមអធិបតីភាព ឯកឧត្តម ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាលក្រសួងមហាផ្ទៃ។

យោងតាមរបាយការណ៍របស់មន្ត្រីជំនាញនៃអគ្គនាយកដ្ឋានរដ្ឋបាលក្រសួងមហាផ្ទៃ បានឱ្យដឹងថា រយៈពេល ៩ខែ ឆ្នាំ២០២២ អង្គភាពច្រកចេញចូលតែមួយរាជធានី-ខេត្ត បានធ្វើការផ្តល់សេវាជូនប្រជាពលរដ្ឋសរុបចំនួន ៥៧៥,៨៩៣សេវា និងទទួលបានចំណូលសរុប ២៣,៩៥៧,៦៨៧ដុល្លា មានករកើនឡើងច្រើនទាំងសេវា និងចំណូល បើធៀបរយៈពេលដូចគ្នាឆ្នាំ២០២១ ការផ្តល់សេវាសរុបចំនួន ៣២៤,៥៣៧សេវា ចំណូល ១៦,០១២,១១៧ដុល្លារ។

នៅក្នុងរបាយការណ៍នោះដែរ ក៏បានបង្ហាញដែរថា អង្គភាពច្រកចេញចូលតែមួយរបស់ខេត្តកំពង់ធំ ផ្តល់សេវាបានច្រើនជាងគេបំផុត គឺចំនួន ៩៨,៨០៤សេវា ស្មើ ១៧,១៩ភាគរយ រីឯខេត្តដែលផ្ដល់សេវាតិចជាងគេ គឺខេត្តកែប មានចំនួន១,៦៧៨សេវា ស្មើនឹង០,២៩ភាគរយ នៃការផ្តល់សេវាសរុបទូទាំងប្រទេស ខណៈដែលអង្គភាពច្រកចេញចូលតែមួយរាជធានីភ្នំពេញ ទទួលបានចំណូលច្រើនជាងគេបំផុត សរុបចំនួន២៩ពាន់ ១២៥លានរៀល ស្មើ៣០,៤៣ភាគរយទូទាំងរាជធានីខេត្ត។

ឯកឧត្តម ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល បានមានប្រសាសន៍ថា កិច្ចប្រជុំផ្តោតសំខាន់ទៅលើ៤ចំណុច ១.បូកសរុបលទ្ធផលការងារផ្តល់សេវារដ្ឋបាលរយៈពេល៩ខែ របស់អង្គភាពច្រកចេញចូលតែមួយរាជធានី-ខេត្ត, ២.ការចែករំលែបបទពិសោធន៍ នៃការអនុវត្តរបស់ប្រធានច្រកគោលដៅមួយចំនួន ដែលបានបញ្ចូលប្រពន្ធប្លែកៗមួយចំនួន ក៏ដូចជាការផ្តល់សេវាជូនពលរដ្ឋ។ ៣.ស្វែងរកដំណោះស្រាយចំពោះបញ្ហាប្រឈមមួយចំនួន ដែលកើតមានកន្លងមក និង ៤.ផ្តល់ការណែនាំសំខាន់ៗមួយចំនួន ដើម្បីយកទៅអនុវត្តបន្តនៅក្នុងដំណាក់កាលឈានទៅរកការបោះឆ្នោតឆ្នាំ២០២៣ខាងមុខ៕

អត្ថបទៈ មន្ទីរព័ត៌មានខេត្តកំពត