រាជរដ្ឋាភិបាលតែងតែការយកចិត្តទុកដាក់ និងគិតគូរសុខទុក្ខពលរដ្ឋជានិច្ចទោះស្ថិតក្នុងកាលៈទេសៈណាក៏ដោយ

ស្ថិតក្នុងអន្តរកាលនៃការប៉ះទង្គេចរវាងកម្ពុជា-ថៃនៅតាមតំបន់ព្រំដែន រាជរដ្ឋាភិបាលបានខិតខំយ៉ាងខ្លាំងធ្វេីយ៉ាងណាឱ្យមានបទឈប់បាញ់ ក្នុងន័យដេីម្បីឈានដល់ការបញ្ចប់ការប៉ះទង្គេចដោយសន្តិវិធី។ ទន្ទឹមនឹងនោះ ពលរដ្ឋជនភៀសសឹកត្រូវបានរាជរដ្ឋាភិបាលយកចិត្តទុកដាក់ និងគិតគូរជាចម្បង។

នៅព្រឹកថ្ងៃទី៨ ខែមករា ឆ្នាំ២០២៦ លោកជំទាវ ហ៊ុន ចាន់ធី ម៉ៅធនិន ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពត បានដឹកនាំសមាជិកា និងអាជ្ញាធរមូលដ្ឋាន ចុះជួបសំណេះសំណាលសាកសួរសុខទុក្ខ និងផ្តល់អំណោយជូនបងប្អូនជនភៀសសឹកមកពីបណ្តាខេត្តផ្សេងៗចំនួន ២៩៧គ្រួសារ ដែលបាននិងកំពុងស្នាក់នៅជាបណ្ដោះអាសន្ន ជាមួយសាច់ញាតិរបស់ខ្លួនក្នុងស្រុកជុំគិរី ដែលពិធីនេះធ្វេីឡេីងក្នុងបរិវេណសាលាស្រុកជុំគិរី។

មានមតិសំណេះសំណាល់នៅក្នុងឱកាសនោះ លោកជំទាវប្រធានកិត្តិយសសមាគមនារីខេត្តកំពតបានលេីកឡេីងថា ចាប់តាំងពីពេលមានការប៉ះទង្គេចរវាងកម្ពុជា និងថៃ ប្រមុខរាជរដ្ឋាភិបាលគឺសម្តេចធិបតី ហ៊ុន ម៉ាណែត នាយករដ្ឋមន្ត្រី និងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានខិតខំរិះរកគ្រប់មធ្យោបាយ ទាំងយប់ទាំងថ្ងៃដេីម្បីធ្វេីយ៉ាងណាបញ្ឈប់ការប៉ះទង្គេចនេះដោយសន្តិវិធី និងប្រកបដោយសន្តិភាព ហេីយមកដល់ពេលនេះការខិតខំរបស់ប្រមុខរាជរដ្ឋាភិបាលគឺទទួលបានលទ្ធផលល្អប្រសេីរ។ លោកជំទាវបានបន្តថា ទន្ទឹមនឹងការគិតគូរចំពោះការបញ្ឈប់ការប៉ះទង្គេច បញ្ហាចម្បងបន្ទាប់របស់រាជរដ្ឋាភិបាលគឺសុខទុក្ខប្រជាពលរដ្ឋ ពិសសគឺពលរដ្ឋភៀសសឹក ដែលបញ្ហានេះត្រូវបានប្រមុខរាជរ្ឋាភិបាលកម្ពុជា គឺសម្តចធិបតី ហ៊ុន ម៉ាំណែត បានដាក់ចេញនូវគោលការណ៍ ក៏ដូចជាកិច្ចចង្អុលការផ្ទាល់មកកាន់អាជ្ញាធរគ្រប់រាជធានី-ខេត្ត និងអ្នកពាក់ព័ន្ធទាំងអស់ ឱ្យគិតគូរយកចិត្តទុកដាក់ខ្ពស់ចំពោះបញ្ហា ស្បៀងអាហារ កន្លែងស្នាក់នៅ ការសិក្សា ពិសេសបញ្ហាសុខភាពរបស់ពួកគាត់ឱ្យបានដិតដល់បំផុត។

ជាមួយគ្នានេះដែរ លោកជំទាវប្រធានកិត្តិយសសមាគមនារី បានបញ្ជាក់ថា ក្រោយប្រទេសកម្ពុជាទទួលបានុខសន្តិភាពពេញលេញ មានការអភិវឌ្ឍល់គ្រប់វិស័យ ប្រមុខថ្នាក់ដឹកនាំកម្ពុជា មានសម្តេចតេជោ និងសម្តេចធិបតី តែងតែរួមសុខរួមទុក្ខជាមួយប្រជាជនជានិច្ចដោយមិនដែលរត់ចោលប្រជាជន និងប្រទេសជាតិខ្លួននោះឡេីយ ទោះបីស្ថិតក្នុងកាលៈទេសៈណាក៏ដោយ។ លោកជំទាវ ក៏បានលេីកទឹកចិត្តដល់បងប្អូនជនភៀសសឹកទាំងអស់ ត្រូវខិតខំថែទាំសុខភាពឱ្យបានល្អប្រសេីរដេីម្បីត្រៀមវិលត្រឡប់ទៅកាន់ទីលំនៅដេីមវិញក្នុងពេលឆាប់ៗនេះ ពិសេសត្រូវជឿទុកចិត្តលេីប្រមុខរាជរដ្ឋាភិបាលក្នុងការដោះស្រាយបញ្ចប់ការប៉ះទង្គិចរវាងកម្ពុជា និងថៃដោយសន្តិវិធី៕

ក្នុងឱកាសនោះដែរ លោកជំទាវប្រធានកិត្តិយសសមាគមនារីខេត្តកំពត ក៏បាននាំមកនូវការផ្តាំផ្ញើការសាកសួរសុខទុក្ខ និងចូលរួមរំលែកសេចក្តីទុក្ខព្រួយ ការលំបាករបស់បងប្អូនពលរដ្ឋដែលជាជនភៀសសឹក ពីសំណាក់ឯកឧត្តម ម៉ៅ ធនិន អភិបាលខេត្តកំពត ពិសេសពីសំណាក់សម្តេចកិត្តិសង្គហបណ្ឌិត ម៉ែន សំអន ប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ ដែលជានិច្ចជាកាលលោកទាំងពីរតែងតែគិតគូរ និងជំរុញឱ្យសមាគមចុះជួបពលរដ្ឋនៅតាមមូលដ្ឋាន ពិសេសពលរដ្ឋភៀសសឹកដេីម្បីបានដឹងពីការលំបាក ក៏ដូចជាតម្រូវការផ្សេង ហេីយត្រូវជួយដោះស្រាយ និងសម្រួលឱ្យបានទាន់ពេលវេលា៕

អត្ថបទ៖ មន្ទីរព័ត៌មានខេត្តកំពត, រូបភាព៖ អាំង សំណាង