អតីតពលករដែលត្រឡប់មកពីប្រទេសថៃជឿជាក់លើរាជរដ្ឋាភិបាលក្នុងការដោះស្រាយបញ្ហាពលករនិងជម្លោះព្រំដែន

អតីតពលករដែលធ្លាប់ធ្វើការនៅប្រទេសថៃ ហើយបានវិលត្រឡប់មកចម្រើការងារនៅក្រុមហ៊ុនចម្ការចេក ឡង មេត បានសម្តែងនូវការជឿជាក់ និងគាំទ្រចំពោះការដឹកនាំរបស់ប្រមុខរាជរដ្ឋាភិបាល ពិសេសសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងការដោះស្រាយបញ្ហាការងារជូនពលករដែលវិលត្រឡប់មកពីថៃ និងការដោះស្រាយបញ្ហាជម្លោះព្រំដែនកម្ពុជា-ថៃផងដែរ។

អតីតពលករនៅប្រទេសថៃ ដែលបានត្រឡប់មកចម្រើការងារនៅក្រុមហ៊ុនចម្ការចេក ឡង មេត ស្ថិតនៅឃុំត្រពាំងភ្លាំង ស្រុកឈូក ខេត្តកំពត បានបញ្ជាក់ថា ពួកគាត់ពិតជាសប្បាយរីករាយចិត្ត ដែលឃើញរាជរដ្ឋាពិបាលយកចិត្តទុកដាក់ចំពោះពលករខ្មែរដែលវិលត្រឡប់មកពីប្រទេសថៃ ពិសេសការផ្តល់ការងារឱ្យបានធ្វើភ្លាមៗ ខណៈប្រាក់ឈ្នួលក៏បានច្រើនជាងនៅប្រទេសថៃ ហើយការចំណាយនៅក្នុងប្រទេសកម្ពុជាតិចទៀត ដែលបានធ្វើឱ្យពួកគាត់មានភាពកក់ក្តៅក្នុងចិត្តមែនទែន។ អតីតពលករទាំងនោះបានបន្តថា ចំពោះបញ្ហាជម្លោះព្រំដែនកម្ពុជា-ថៃ ដែលទាហ៊ានថៃបានឈ្លានពាន និងមើលងាយមើលថោកដល់ជាតិសាស្ត្រខ្មែរ បើតាមចិត្តរបស់ពួកគាត់គឺទ្រាំមិនបាននោះទេ គឺនឹងមានការបាញ់តបវិញហើយ តែប្រមុខដឹកនាំរាជរដ្ឋាភិបាលលោកបានគិតវែងឆ្ងាយខ្លាំង ពីសុខទុក្ខរបស់វីរកងទ័ព ពលករ ក៏ដូចជាប្រជាពលរដ្ឋនៅទូទាំងប្រទេស ដោយលោកបានស្វែងរកវិធីដើម្បីបញ្ចៀសសង្គ្រាមឱ្យខាងតែបាន។ ពួកគាត់ជឿជាក់ និងគាំទ្រយ៉ាងពេញទំហឹងចំពោះគោលជំហរ និងយន្តការដោះស្រាយបញ្ហាជម្លោះព្រំដែនរបស់រាជរដ្ឋាភិបាល និងសង្ឃឹមថាកងទ័ពកម្ពុជាទាំង ១៨នាក់ ដែលត្រូវថៃបានចាប់ខ្លួន នឹងត្រូវដោះលែងមកវិញក្នុងពេលឆាប់ៗខាងមុខនេះ។

សូមបញ្ជាក់ថា បើតាមលោក ហេង ណារ៉ុង អនុប្រធានមន្ទីរការងារ និងបណ្តុះបណ្តាលជីវខេត្តកំពត បានបញ្ជាក់ឱ្យដឹងថា ប្រមុខរាជរដ្ឋាភិបាល ក៏ដូចជាក្រសួងការងារ បានយកចិត្តទុកដាក់យ៉ាងខ្លាំងចំពោះបងប្អូនខ្មែរដែលជាពលករត្រឡប់មកពីប្រទេសថៃ ទាំងការផ្តល់ជូនឱកាសការងារ និងការបណ្តុះបណ្តាលជំនាញវិជ្ជាជីវៈ ហើយខេត្តកំពតក្រោមការចង្អុលបង្ហាញរបស់លោក ម៉ៅ ធនិន រដ្ឋបាលខេត្តបានរៀបចំក្រុមការងារទៅទទួលពលករដែលវិលត្រឡប់មកវិញ ដោយគិតមកដល់ថ្ងៃនេះមានចំនួនសរុប ៦,០៥៣នាក់ និងបានផ្តល់ការងារធ្វើបានចំនួន ៣,៤៨៦នាក់។ បច្ចុប្បន្នមន្ត្រីជំនាញ និងអាជ្ញាធរខេត្តបាននិងកំពុងខិតខំប្រឹងប្រែងស្វែងរកការងារជូនបងប្អូនដែលវិលត្រឡប់ពីប្រទេសថៃ ជាបន្តបន្ទាប់ទៀត៕

អត្ថបទ និងរូបភាព៖ មន្ទីរព័ត៌មានខេត្តកំពត