ឯកឧត្តមបណ្ឌិត ប៉ែន ស៊ីម៉ន អ្នកតំណាងរាស្រ្តមណ្ឌលកំពត ប្រធានគណៈកម្មការទី១០ នៃរដ្ឋសភា និងជាប្រធានក្រុមការងារថ្នាក់កណ្តាលចុះជួយខេត្តកំពត ដោយមានការចូលរួមពីសំណាក់ ឯកឧត្តម តាក់ ហាប់ ប្រធានក្រុមប្រឹក្សាខេត្តកំពត ឯកឧត្តម លោកជំទាវ សមាជិក សមាជិកា ព្រឹទ្ធសភា រដ្ឋសភា ក្រុមប្រឹក្សាខេត្ត លោក លោកស្រី អភិបាលរងខេត្ត ប្រធានមន្ទីរ-អង្គភាពជុំវិញខេត្ត អង្គភាពចំណុះសាលាខេត្ត ក្នុងរយៈពេល ២ថ្ងៃ ចាប់ពីថ្ងៃទី២៣ ដល់ថ្ងៃទី២៤ ខែសីហា ឆ្នាំ ២០២៥ បានចុះជួបសំណេះសំណាលជាមួយសាស្ត្រាចារ្យ លោកគ្រូ អ្នកគ្រូ និងសិស្សានុសិស្សថ្នាក់ទី១២ ដែលត្រៀម ប្រឡងសញ្ញាប័ត្រមធ្យមសិក្សាទុតិយភូមិក្នុងឆ្នាំសិក្សា២០២៤-២០២៥ ដែលមកពីវិទ្យាល័យនានានៅទូទាំងខេត្តកំពត សរុបចំនួនជាង ៥,០០០នាក់។ មុនដំណើរការកម្មវិធី អង្គពិធីទាំងមូលបានធ្វើពិធីស្មិងស្មាតអារម្មណ៍ ដើម្បីគោរពវិញ្ញាណក្ខន្ធដល់វីរកងទ័ពកម្ពុជាដែលបានពលីជីវិតលើសមរភូមិប្រយុទ្ធ ក្នុងបុព្វហេតុការពារជាតិ បូរណភាពទឹកដីកម្ពុជា ពីការឈ្លានពានរបស់ទាហានសៀម។
ក្នុងឱកាសនោះដែរ ឯកឧត្តមបណ្ឌិត ប៉ែន ស៊ីម៉ន បានពាំនាំផ្តាំផ្ញើរសាកសួរសុខទុក្ខពីសំណាក់ សម្តេចអគ្គសេនាមហាធិតីតេជោ ហ៊ុន សែន ប្រធានព្រឹទ្ធសភា សម្តេចពញាចក្រី ហេង សំរិន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃប្រទេសកម្ពុជា ជូនដល់សាស្ត្រាចារ្យ លោកគ្រូ អ្នកគ្រូ សិស្សានុសិស្សដែលនៅក្នុងខេត្តកំពតទាំងអស់។ មានប្រសាសន៍ សំណេះសំណាលទៅកាន់សាស្ត្រាចារ្យ លោកគ្រូ អ្នកគ្រូ សិស្សានុសិស្សទាំងអស់ ឯកឧត្តមបណ្ឌិត ប៉ែន ស៊ីម៉ន បានសំដែងការកោតសរសើរ និងវាយតម្លៃខ្ពស់ចំពោះការយកចិត្តទុកដាក់ខិតខំរៀនសូត្ររបស់ចៅៗសិស្សានុសិស្សទាំងអស់ ដោយមានជំនឿយ៉ាងមុតមាំថា លទ្ធផលនៃការប្រឡងសញ្ញាប័ត្រធម្យមសិក្សាទុតិយភូមិ ឆ្នាំសិក្សា២០២៤-២០២៥នេះ ពិតជាមានភាពប្រសើរជាងឆ្នាំមុនៗជាក់ជាពុំខាន។ឯកឧត្តមបណ្ឌិតក៏បានលើកឡើងពីបទពិសោធន៍នៃការសិក្សារៀនសូត្រ និងផ្តល់ពុទ្ធិមួយចំនួនជាមូលដ្ឋានគ្រឹះ សម្រាប់ ចូលរួមប្រឡងសញ្ញាប័ត្រមធ្យមសិក្សាទុតិយភូមិនាខែសីហា ឆ្នាំ២០២៥ខាងមុខនេះជូនដល់សិស្សានុសិស្សដែលត្រូវប្រឡងផងដែរ។ ឯកឧត្តមបណ្ឌិត ប៉ែន ស៊ីម៉ន ក៏បានជូនពរអោយចៅៗទាំងអស់សូមឱ្យប្រឡងជាប់និទ្ទេសល្អគ្រប់ៗគ្នា ដើម្បីបង្ហាញជាកិត្តិយសជូន លោកគ្រូ អ្នកគ្រូ ជូនសាលាយើង គ្រួសារយើង ស្រុកយើង និងខេត្តយើងផងដែរ។ ជាមួយគ្នានេះដែរ ឯកឧត្តមបណ្ឌិត ប៉ែន ស៊ីមន ក៏បានថ្លែងអំណរគុណ កោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់គណៈគ្រប់គ្រងសាលា និងលោកគ្រូ អ្នកគ្រូ ដែលបានយកចិត្តទុកដាក់ បំពេញភារកិច្ចប្រកបដោយទទួលខុសត្រូវខ្ពស់ ដើម្បីផ្តល់នូវការអប់រំប្រកបដោយគុណភាពដល់សិស្សានុសិស្ស ។
យោងតាមរបាយការណ៍របស់លោក សូ ភារិទ្ធ ប្រធានមន្ទីរអប់រំយុវជន កីឡា និងខេត្តកំពត បានគូសបញ្ជាក់ថា សម្រាប់ឆ្នាំសិក្សា២០២៤-២០២៥នេះ ខេត្តកំពតមានបេក្ខជនដែលត្រូវប្រឡងយកសញ្ញាប័ត្រមធ្យមសិក្សាទុតិយភូមិមានចំនួន ៥,៣១៧ស្រី ២,៩៩៥នាក់ ចែក ចេញជា ១០មណ្ឌល ស្មើរនិង ២១៥បន្ទប់។ លោកប្រធានក៏បានថ្លែងអំណរគុណចំពោះឯកឧត្តមបណ្ឌិត ប៉ែន ស៊ីម៉ន និងលោកជំទាវ ដែលបានឧបត្ថម្ភគាំទ្រលើកស្ទួយវិស័យអប់រំសិក្សាធិការនៅក្នុងខេត្តជាបន្តបន្ទាប់ តាមរយៈការផ្តល់អាគារសិក្សា អាហាររូបករណ៍ និងផ្តល់ថវិកាដល់ លោកគ្រូ អ្នកគ្រូ បើកវគ្គបំពាក់បំប៉នផងដែរ។
ក្នុងពិធីនេះឯកឧត្តមបណ្ឌិត ប៉ែន ស៊ីម៉ន ក៏បានជូនថវិកាលើកទឹកចិត្តដល់បេក្ខជនមកពីវិទ្យាល័យនានាក្នុងខេត្តកំពត សរុបចំនួន ៥,៣១៧នាក់ ក្នុងម្នាក់ៗទទួលបានថវិកា ៥ម៉ឺនរៀល លោកគ្រូ អ្នកគ្រូចំនួន ៤៤៩នាក់ ក្នុងម្នាក់ថវិកា ១០ម៉ឺនរៀល គណៈគ្រប់គ្រងសាលាសរុបចំនួន ៧២នាក់ ម្នាក់ៗថវិកា ១០ម៉ឺនរៀល កងកម្លាំងប្រដាប់អាវុធចូលរួមការពារក្នុងកម្មវិធី ម្នាក់ៗថវិកា ២ម៉ឺនរៀល ក្រុមគ្រូពេទ្យប្រចាំការ ម្នាក់ៗថវិកា ៥ម៉ឺនរៀល សរុបទឹកប្រាក់អស់ប្រមាណចំនួន ៣០០,០០០,០០០៕
0 Comments