ថ្ងៃ Count Down ឆ្លងឆ្នាំ ខេត្តកំពតមានភ្ញៀវទេសចរជាតិនិងអន្តរជាតិជិត ៤០ម៉ឺននាក់

ប្រធានមន្ទីរទេសណ៍ខេត្តកំពត លោក សយ ស៊ីណុល បានប្រាប់ឲ្យដឹងថា ដោយមានការយកចិត្តទុកដាក់ ចង្អុលបង្ហាញ និងដឹកនាំដោយផ្ទាល់ពី សំណាក់ឯកឧត្តម ម៉ៅ ធនិន អភិបាលខេត្តកំពត ក្នុងការរៀបចំតុបតែងកែលម្អសោភ័ណភាពក្រុង ពិសេសការអភិវឌ្ឍន៍តំបន់ឆ្នេរ និងកម្មវិធីកម្សាន្តសប្បាយច្រើនផងនោះ បានធ្វើឲ្យព្រឹត្តិការណ៍ឆ្លងឆ្នាំនៅខេត្តកំពត មានភាពអធឹកអធម គគ្រឹកគគ្រេង ពោពេញដោយភាពសប្បាយរីករាយក្រៃលែង។ លោកប្រធានមន្ទីរបានប្រាប់ឲ្យដឹងថា  សម្រាប់ថ្ងៃទី៣១ ខែធ្នូ (ថ្ងៃCount Downឆ្លងឆ្នាំ)ខេត្តកំពត មានទេសចរសរុបចំនួន៣៨៦ ៤៨៨ នាក់ ក្នុងនោះ ៖ ភ្ញៀវទេសចរកំសាន្តតាមរមណីយដ្ឋាន សហគមន៏ទេសចរណ៏នានាសរុបចំនួន ៥៦ ៤៨៨ នាក់  (ភ្ញៀវអន្តរជាតិចំនួន២៤៨៨នាក់)  ខណៈដែលភ្ញៀវទេសចរជាតិ អន្តរជាតិ បងប្អូនប្រជាពលរដ្ឋ ចូលរួមកំសាន្តសប្បាយកម្មវិធីរាប់ថយក្រោយ(Count Down)ក្នុងក្រុង មានចំនួនសរុប ៣៣០ ០០០នាក់ (ភ្ញៀវទេសចរអន្តរជាតិចំនួន១៥០០នាក់ )។

ភ្ញៀវទេសចរមកពីរាជធានីភ្នំពេញ បានបង្ហាញចំណាប់អារម្មណ៍សប្បាយរីករាយរបស់ខ្លួនថា ពួកគាត់សម្រេចចិត្តមកលេងខេត្តកំពត ពិតជាមិនខុសបំណងទេ  កំពតមានកន្លែងដើរលេងច្រើន ហើយការរៀបចំព្រឹត្តិការណ៍ឆ្លងឆ្នាំបានស្អាត មានសណ្តាប់ធ្នាប់ សន្តិសុខ សុវត្ថិភាព អនាម័យបរិស្ថានល្អ សេវាកម្មផ្សេងៗមានតម្លៃសមរម្យ អ្នកដែលខកខានមិនបានមកឆ្លងឆ្នាំនៅខេត្តកំពតពិតជាស្តាយក្រោយ។

តំណាងអាជីវករលក់ដូរ និងម្ចាស់ទូកទេសចរណ៍ដឹកភ្ញៀវកម្សាន្តតាមដងព្រែកកំពង់បាយ បានប្រាប់ឲ្យដឹងដែរថា រយៈពេលពីរថ្ងៃ(៣០ និង៣១ ខែធ្នូ)នេះ ភ្ញៀវទេសចរជាតិ និងអន្តរជាតិមកលេងកំពតច្រើនខ្លាំង ទូកទេសចរណ៍ក៏មានអ្នកមកជិះច្រើនដែរ។ អាជីវកររូបនេះបានថ្លែងអំណរគុណដល់រាជរដ្ឋាភិបាល ពិសេសឯកឧត្តមអភិបាលខេត្ត ដែលលោកតែងតែគិតគូរដល់សុខទុក្ខ និងជីវភាពរស់នៅរបស់ប្រជាពលរដ្ឋ។

តាមការបញ្ជាក់របស់ប្រធានមន្ទីរទេសចរណ៍ខេត្ត ថាព្រឹត្តិការណ៍ឆ្លងឆ្នាំ(២០២៣ ចូល២០២៤) បានព្រឹត្តិទៅល្អប្រសើរ មិនមានបញ្ហាអ្វីកើតឡើងគួរឲ្យកក់សំគាល់នោះឡើយ ហើយបើទោះជាមានទេសចរមកលេងពេញក្រុងកំពត និងគ្រប់គោលដៅទេសចរណ៍ និងរមណីយដ្ឋានយ៉ាងណាក៏ដោយ រដ្ឋបាលខេត្តនៅតែរក្សាបាននូវ សន្តិសុខ សុវត្ថិភាព សណ្តាប់ធ្នាប់ល្អ គ្មានការកក់ស្ទះចរាចរណ៍ ធ្វើឲ្យភ្ញៀវទេចរមានទទួលបានភាពសប្បាយរីករាយ និងកក់ក្តៅក្នុងចិត្តយ៉ាងខ្លាំង៕

អត្ថបទ៖ មន្ទីរព័ត៌មានខេត្តកំពត, រូបភាព៖ អាំង សំណាង