AKP ភ្នំពេញ ថ្ងៃទី១៤ ខែកញ្ញា ឆ្នាំ២០២៣
រដ្ឋមន្ត្រីក្រសួងព័ត៌មានបានគូសបញ្ជាក់ថា ចាប់ពីពេលនេះតទៅ ត្រូវរៀបចំធនធានមនុស្សនៅក្នុងក្រសួងព័ត៌មានឱ្យក្លាយជាធនធានមនុស្សដែលមានសមត្ថភាពអាចធ្វើការបានដើម្បីបម្រើរមហាជន និងគេទទួលស្គាល់។ នេះគឺជាការគូសបញ្ជាក់របស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងពិធីសំណេះសំណាលជាមួយមន្ត្រីជាប់កិច្ចសន្យារបស់ក្រសួងព័ត៌មាន នារសៀលថ្ងៃទី១៤ ខែកញ្ញា ឆ្នាំ២០២៣ សាលចតុម្មុខមង្គល ក្រសួងព័ត៌មាន។
ឯកឧត្តម នេត្រ ភក្ត្រា បានលើកឡើងថា ក្រសួងព័ត៌មាននឹងធ្វើការបណ្តុះបណ្តាលមន្ត្រី របស់ក្រសួងនូវជំនាញព័ត៌មានដើម្បីឱ្យពួកគាត់មានសមត្ថភាពក្នុងការសរសេរព័ត៌មាន ដែលមានវិជ្ជាជីវៈក្នុងមានជាស្ថាប័នសាធារណៈរបស់រាជរដ្ឋាភិបាល។ ឯកឧត្តម រដ្ឋមន្រ្តីក្រសួងព័ត៌មាន ក៏ដើម្បីពិនិត្យមើលពីសមិទ្ធផលដែលសម្រេចបានក្នុងរយៈពេលកន្លងមក ក្តោបក្តាប់បញ្ហាប្រឈម និងស្វែងរកដំណោះស្រាយឆ្លើយតប ព្រមទាំងគិតគូររួមគ្នាពីចក្ខុវិស័យវែងឆ្ងាយ ក្នុងគោលដៅប្រែក្លាយក្រសួង ព័ត៌មានឱ្យទៅជាស្ថាប័នទំនាក់ទំនងសាធារណៈរបស់រាជរដ្ឋាភិបាលដែលសកម្ម បុរេសកម្ម អន្តរសកម្ម ហើយប្រកបដោយគុណភាព និងប្រសិទ្ធភាពខ្ពស់ ។
តាមរបាយការណ៍លើកឡើងរបស់ ឯកឧត្តម ប៉ែត ពិសី ទីប្រឹក្សាក្រសួង និងជាប្រធាននាយកដ្ឋានបុគ្គលិក ក្រសួងព័ត៌មានបានឱ្យដឹងថា មន្រ្តីជាប់កិច្ចសន្យាមានចំនួនសរុប ៧១៥ នាក់ ក្នុងនោះស្រី ២៩០ នាក់ ចែកចេញជាផ្នែកនៅថ្នាក់ជាតិចំនួន ២៩១ នាក់ ថ្នាក់ក្រោមជាតិ ៤២៤ រូប៕
ដោយ៖ ប៊ុនរិទ្ធ, រូបថត៖ ខឹម សុវណ្ណារ៉ា
0 Comments