AKP ភ្នំពេញ ថ្ងៃទី០៧ ខែកញ្ញា ឆ្នាំ២០២៣
ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មានបានណែនាំដល់ថ្នាក់ដឹកនាំ មន្រ្តីរាជការគ្រប់ជាន់ថ្នាក់របស់វិទ្យុជាតិកម្ពុជា ត្រូវបន្ដខិតខំប្រឹងប្រែងរួមគ្នា ផលិតព័ត៌មាន ដែលល្អ តម្រូវតាមអ្នកស្ដាប់ អ្នកទស្សនា ព្រោះ ខ្លឹមសារគឺជាស្ដេច ដែលអាចទាក់ទាញយកចិត្តរបស់ប្រជាពលរដ្ឋ អ្នកអាន និងសាធារណជនមកលើសារព័ត៌មានជាតិ។ ការណែនាំរបស់ឯកឧត្ដមរដ្ឋមន្រ្ដីបែបនេះ ក្នុងកិច្ចប្រជុំជាមួយថ្នាក់ដឹកនាំ និងមន្រ្ដីរាជការអគ្គនាយកដ្ឋានវិទ្យុជាតិកម្ពុជា នាព្រឹកថ្ងៃទី០៧ ខែកញ្ញា ឆ្នាំ២០២៣ នៅសាលប្រជុំ ក្រសួងព័ត៌មាន។
ឯកឧត្តម នេត្រ ភក្ត្រា បានមានប្រសាសន៍ថា វិទ្យុជាតិកម្ពុជា គឺជាផ្នែកមួយដែលមានសារៈសំខាន់ ត្រូវដើរតួនាទីជាអ្នកផ្សព្វផ្សាយមួយដែលទុកចិត្តបាន លឿន រហ័ស សម្រាប់ប្រជាពលរដ្ឋ អ្នកស្ដាប់ និងអ្នកទស្សនា។ ឯកឧត្ដមបានថ្លែងថា ដូច្នេះថ្នាក់ដឹកនាំ មន្រ្តីគ្រប់ជាន់ថ្នាក់ ត្រូវតែខិតខំប្រឹងប្រែងរួមគ្នាធ្វើទំនើបកម្មខ្លួនឯង ធ្វើជាប្រព័ន្ធផ្សព្វផ្សាយបែបទំនើបកម្ម ដើម្បីឱ្យសាធារណជនបានដឹងពីប្រព្រឹត្តិការណ៍ដែលកំពុងកើតឡើងនៅក្នុងប្រទេស ជាពិសេសសារព័ត៌មានគឺជាអំណាចទី៤ នៅក្នុងប្រទេសកម្ពុជា ដែលមានតួនាទីសំខាន់ណាស់ ក្នុងការចូលរួមអភិវឌ្ឍន៍ និងពង្រឹងលទ្ធិប្រជាធិបតេយ្យ។
ឯកឧត្តមបញ្ជាក់ផងដែរថា ការងារអាទិភាពដែលឯកឧត្តមនឹងត្រូវធ្វើ ក្នុងនាមជារដ្ឋមន្រ្ដីក្រសួងព័ត៌មានផ្ដោតជាសំខាន់ គឺធ្វើទំនើបកម្មស្ថាប័ន និងរដ្ឋបាលទំនើប ដើម្បីធ្វើឱ្យក្រសួងព័ត៌មាន ក្លាយទៅជាស្ថាប័នទំនាក់ទំនងសាធារណៈរបស់រាជរដ្ឋាភិបាលកម្ពុជា សំដៅធ្វើយ៉ាងណាគឺផ្សព្វផ្សាយពីការពិតរបស់កម្ពុជាយើងទៅកាន់មជ្ឈដ្ឋានជាតិ និងអន្ដរជាតិ។ ឯកឧត្ដមរដ្ឋមន្រ្ដីអះអាងថា បេសកកម្មរបស់យើងទៅមុខ ទី១ ចក្ខុវិស័យរបស់ក្រសួងព័ត៌មាន ដែលត្រូវធ្វើជាចក្ខុវិស័យ គឺធ្វើយ៉ាងណាប្រែក្លាយក្រសួងព័ត៌មានឱ្យទៅជាស្ថាប័នទំនាក់ទំនងសាធារណៈរបស់រាជរដ្ឋាភិបាលមួយដែលប្រកបដោយ បុរេសកម្ម សកម្ម អន្តរសកម្ម ប្រសិទ្ធភាព និងគុណភាព។ ឯកឧត្ដមរដ្ឋមន្រ្ដីបានឱ្យដឹងទៀតថា ស្ថាប័នទំនាក់ទំនងសាធារណៈរបស់រាជរដ្ឋាភិបាល គឺសំដៅទៅលើច្រកចេញចូលនៃទំនាក់ទំនងព័ត៌មានរវាងរដ្ឋាភិបាលនិងសាធារណៈជន គឺសំដៅទៅលើប្រជាពលរដ្ឋ។
ឯកឧត្ដម នេត្រ ភក្រ្ដា បានបន្ថែមថា៖ «ដូចនេះ ក្រសួងព័ត៌មាន មានប្រព័ន្ធផ្សព្វផ្សាយសាធារណៈរបស់រដ្ឋ មានវិទ្យុ មានទូរទស្សន៍ មានកាសែត ទស្សនាវដ្ដី គឺមានទាំងអស់ ហើយការកសាងនៅជំនឿទុកចិត្តឈរនៅលើមូលដ្ឋានខ្លឹមសារ។ ក៏ប៉ុន្តែចំណុចមួយទៀតគឺល្បឿននៃការបញ្ចេញព័ត៌មានរបស់យើងក៏ជាចំណុចនៃការប្រកួតប្រជែងនៅក្នុងទីផ្សារព័ត៌មានដែរ»៕
ដោយ៖ រិទ្ធី, រូបថត៖ ខឹម សុវណ្ណារ៉ា
0 Comments