រដ្ឋមន្រ្តីក្រសួងព័ត៌មានប្រកាសប្រែក្លាយ AKP ឱ្យទៅជាទីភ្នាក់ងារជាតិមួយឈានមុខ និងជាសំឡេងរបស់រាជរដ្ឋាភិបាល

AKP ភ្នំពេញ ថ្ងៃទី០៥ ខែកញ្ញា ឆ្នាំ២០២

រដ្ឋមន្រ្តីក្រសួងព័ត៌មានបានប្រកាសពីការប្រែក្លាយទីភ្នាក់ងារសារព័ត៌មានកម្ពុជា (AKP) ឱ្យទៅជាទីភ្នាក់ងារជាតិឈានមុខ និងជាសំឡេងរបស់រាជរដ្ឋាភិបាលកម្ពុជា ក្នុងឋានៈ​ឯកឧត្ដម​ជារដ្ឋមន្រ្តីក្រសួងព័ត៌មាននៃរាជរដ្ឋាភិបាលអាណត្តិទី៧នេះ។ នេះគឺជាការ​ប្រ​កាស​របស់​ឯកឧត្តម នេត្រ ភក្រ្តា រដ្ឋមន្រ្ដីក្រសួងព័ត៌មានក្នុង​កិច្ច​ប្រជុំជាមួយថ្នាក់ដឹកនាំ និង​មន្រ្តីរាជការអគ្គនាយកដ្ឋានទី​ភ្នាក់ងារសារព័ត៌មានកម្ពុជា (AKP) នាព្រឹកថ្ងៃទី០៥ ខែកញ្ញា ឆ្នាំ២០២៣ នៅអគារនៃអគ្គនាយកដ្ឋានទី​ភ្នាក់ងារសារព័ត៌​មាន​កម្ពុជា ក្រសួងព័ត៌មាន។

ឯកឧត្តម នេត្រ ភក្រ្ដា បានគូសបញ្ជាក់ថា ក្នុងអាណត្ដិទី៧នេះ ត្រូវធ្វើយ៉ាងណាឱ្យ AKP ដើរមុខគេលើប្រព័ន្ធផ្សព្វផ្សាយឯកជន​ផ្សេងៗ​នា​ពេល​បច្ចុប្បន្ន។ ឯកឧត្ដមបានអះអាង​ថា ដើម្បីឱ្យទីភ្នាក់ងារជាតិនេះឈានមុខគេក្នុងប្រព័ន្ធផ្សព្វផ្សាយនោះ លុះត្រាតែត្រូវ​គិត​គូរឡើងវិញលើការងារសរសេរព័ត៌មានឱ្យមានគុណភាព និងមានល្បឿនលឿនជាងនេះ។​ឯកឧត្តមរដ្ឋមន្រ្ដីបញ្ជាក់ទៀតថា ត្រូវខិតខំធ្វើយ៉ាងណាឱ្យទីភ្នាក់ងារជាតិមួយនេះ ក្លាយ​ជា​ទីភ្នាក់ងារមួយ ដែលប្រព័ន្ធផ្សព្វផ្សាយឯកជនផ្សេងៗយកធ្វើជាប្រភពក្នុង​ការផ្សព្វផ្សាយ​ទៅ​កាន់សាធារណជន។ «ការកសាងឱ្យមានទំនុកចិត្តគឺជា​កិច្ចការ​សំខាន់ដែលទីភ្នាក់​ងារ​ជាតិមួយនេះត្រូវគិតគូរឡើងវិញ ដើម្បីទទួលបានប្រភពព័ត៌​មាន​ច្រើនពីសំណាក់​ស្ថាប័ន​ពាក់ព័ន្ធ ដើម្បីឱ្យទីភ្នាក់ងារជាតិមួយនេះឈានមុខគេលើសមរភូមិ​ផ្សព្វផ្សាយនាពេល​បច្ចុប្បន្ននេះ និងទទួលបានប្រភពព័ត៌មានច្រើនយកទៅផ្សព្វផ្សាយ»។ នេះគឺជាការគូស​បញ្ជាក់បន្ថែម​របស់ឯកឧត្ដ នេត្រ ភក្ដ្រា។

បើតាមឯកឧត្តមរដ្ឋមន្រ្ដីបានឱ្យដឹងទៀតថា ដើម្បីកសាងនូវទំនុកចិត្តនេះ​គឺវាទាម​ទារ​ធ្វើយ៉ាងណាពង្រឹងឱ្យបាននូវគុណភាពព័ត៌មាន ល្បឿនព័ត៌មាន និងការផ្សព្វផ្សាយ​ឱ្យ​បានទូលំទូលាយ៕

ដោយ៖ ចាន់ សុធីវង្ស