បណ្ឌិត យង់ ពៅ៖ ដើម្បីគ្រួសារ និងសង្គមខ្លាំង កូនខ្មែរត្រូវតែជាតិនិយមនិងប្រឹងប្រែងឱ្យលើសពីអាហារ ៣ពេល

ថ្លែងក្នុងឱកាសអញ្ជើញធ្វើបាឋកថា ស្ដីពី សភាពការណ៍ថ្មីៗ ករណីជម្លោះព្រំដែនកម្ពុជា-ថៃ កាលពីរសៀលថ្ងៃសុក្រ ទី២៩ ខែសីហា ឆ្នាំ២០២៥ នៅសាលប្រជុំធំសាលាស្រុកទឹកឈូ ខេត្តកំពត ដែលផ្តួចផ្តើមគំនិត និងសហការរៀបចំដោយរាជបណ្ឌិត្យសភាកម្ពុជា, រដ្ឋបាលស្រុកទឹកឈូ និងសមាគមនិស្សិតរាជបណ្ឌិត្យសភាកម្ពុជា លោកបណ្ឌិត យង់ ពៅ អគ្គលេខាធិការដ្ឋានរាជបណ្ឌិត្យសភាកម្ពុជា បានលើកឡើងថា កើតជាកូនខ្មែរត្រូវតែប្រឹងប្រែងឱ្យលើសអាហារ ៣ពេល ដើម្បីគ្រួសារ និងសង្គម ហើយត្រូវតែជាតិនិយម ទើបសង្គមខ្លាំង។ លោកថ្លែងដោយយកន័យធៀបថា សង្គមជាតិមួយណាក៏ដោយ បើគ្មានពលរដ្ឋខ្លាំងទេ ប្រៀបបីដូចជាមនុស្សម្នាក់ ដែលហូបអាហារមិនគ្រប់គ្រាន់។  

ទស្សនាទានរបស់លោកបណ្ឌិត យង់ ពៅ មិនមែនឱ្យមនុស្សប្រឹងលើសអាហារ ៣ពេល ហើយកើតគំនិតលោភលន់នោះទេ ប៉ុន្តែជាមតិដាស់សតិស្មារតីមនុស្ស ឱ្យខិតខំកសាងខ្លួន និងមានជាតិនិយមខ្ពស់។ កាលណាបុគ្គលទន់ខ្សោយ នឹងនាំឱ្យមានគ្រួសារទន់ខ្សោយ ហើយជិះឥទ្ធិពលដល់សង្គមបែបនោះដែរ។ "បើគិតត្រឹមតែអាហារ ៣ពេល មនុស្សយើងមិនប្រឹងនោះទេ មិនខុសពីការរស់ ១ថ្ងៃ គិត ១ថ្ងៃ។ ប៉ុន្តែ បើគិតលើសពីអាហារ ៣ពេល មនុស្សនឹងប្រឹង ហើយខំកសាងខ្លួន ដើម្បីខ្លួនឯង គ្រួសារ និងសង្គមជាតិ"។ លោកបណ្ឌិត យង់ ពៅ បញ្ជាក់បែបនេះ។

ក្នុងឱកាសនោះដែរ លោកបណ្ឌិត បានលើកពីទ្រឹស្តីសេរីរៈរបស់លោក Friedrich Ratzel មកពន្យល់ថា៖

*រដ្ឋប្រៀបបានជាសរីរាង្គមានជីវិត វាមានអាយុកាលកើតនិង ស្លាប់ តាមរយៈការកើនឡើងនិងការធ្លាក់ចុះនៃអំណាច

*រដ្ឋត្រូវការចំណីអាហារដើម្បីរស់ ហើយចំណីអាហារទាំង នោះទទួលបានពីទឹកដីរបស់រដ្ឋ ដែលមានអំណាចតិចជាង

*រដ្ឋត្រូវការលំហនៃការរស់នៅ ហើយរដ្ឋនឹងស្លាប់បើមិនបាន ពង្រីកខ្លួនទេ

*ការពង្រីកព្រំដែនបង្កើននូវកម្លាំងនិងសុខភាពរបស់រដ្ឋ ហើយសមុទ្រគឺជាប្រភពដ៏ប្រសើរបំផុត៕