អាជ្ញាធរខេត្តកំពតកំពុងមមារញឹកក្នុងការតុបតែងលម្អក្រុងកំពតដើម្បីទាក់ទាញភ្ញៀវទេសចរនាឱកាសបុណ្យអុំទូកខាងមុខនេះ

អាជ្ញាធរខេត្តកំពតបាននិងកំពុងមមារញឹកក្នុងការតុបតែងលម្អក្រុងកំពត ដោយមានការលាបថ្នាំពណ៌ ការរៀបចំតែងលម្អភ្លើងតាមដើមឈើ កាត់មែកឈើ តបណ្តាញភ្លើងបំភ្លឺតាមដងផ្លូវ ពិសេសតុបតែងលម្អស្ពានឥន្ធនូ(ស្ពានចាស់) និងស្ពានព្រែកកំពង់បាយ(ស្ពានថ្មី) លម្អទៅដោយភ្លើងពណ៌ ដើម្បីធ្វើយ៉ាងណាឱ្យមានភាពទាក់ទាញសម្រាប់ព្រះរាជពិធីបុណ្យអុំទូកខាងមុខនេះ។

ក្រោមការដឹកនាំ និងចង្អុលបង្ហាញពីឯកឧត្តមបណ្ឌិត ម៉ៅ ធនិន អភិបាលខេត្តកំពត អាជ្ញាខេត្តបានរៀបពិធីប្រណាំងទូកង ខ្នាតប្រពៃណី និងពិធីបណ្តែតប្រទីប អកអំបុក និងសំពះព្រខែមានរយៈពេល៣ថ្ងៃ នាឱកាសនៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែនាពេលខាងមុខ។

ទន្ទឹមនេះ ដើម្បីជាការទាក់ទាញភ្ញៀវទេសចរឱ្យមកកម្សាន្តក្នុងឱកាសនោះកាន់តែច្រើន អាជ្ញាធរខេត្តបានរៀបចំតុបតែងលម្អគ្រប់ទីតាំងសំខាន់ៗទាំងអស់ក្នុងខេត្ត ដោយមានការលាបថ្នាំពណ៌ឡើងវិញតាមជញ្ចើមផ្លូវ ការតុបតែងលម្អភ្លើងពណ៌ ឧបករណ៍បាញ់ទឹកនៅរង្វង់មូលទុរេន និងតាមបណ្តាសួនច្បារសំខាន់ៗ ការតបណ្តាញភ្លើងបំភ្លឺផ្លូវក្នុងក្រុង កាប់មែកឈើរួមទាំងការតុបតែងភ្លើងពណ៌តាមដើមឈើតាមសួនច្បារមាត់ព្រែកជាច្រើនកន្លែងផងដែរ។

ជាមួយគ្នានេះដែរ ក្នុងកិច្ចប្រជុំត្រួតពិនិត្យលើការងាររៀបចំពិធីប្រណាំងទូក កាលពីថ្ងៃទី២៤ ខែតុលា ឆ្នាំ២០២២កន្លងទៅនេះ ឯកឧត្តមបណ្ឌិត ម៉ៅ ធនិន អភិបាលខេត្តបានលើកបញ្ជាក់ថា រដ្ឋបាលខេត្តបានរៀបចំតុបតែងភ្លើងលើស្ពានទាំងពីរក្នុងខេត្ត ដោយជួលអ្នកជំនាញផ្នែកអគ្គិសនី និងតុបតែងមកតម្លើងភ្លើងពណ៌ ធ្វើយ៉ាងណាឱ្យមានភាពស្រស់ស្អាត និងទាក់ទាញបំផុត។

ជាមួយគ្នានេះដែរ ឯកឧត្តមអភិបាលខេត្តក៏បានអំពាវនាវបងប្អូនដល់ប្រជាពលរដ្ឋក្នុងខេត្តទាំង ឱ្យចូលរួមសំអាតអនាម័យបរិស្ថានជុំវិញផ្ទះរៀងៗខ្លួន ពិសេសត្រូវទុកដាក់សម្រាមឱ្យបានត្រឹមត្រូវ ហើយចូលរួមតុមតែងលម្អភ្លើងពណ៌តាមគេហដ្ឋានរបស់ខ្លួន ដើម្បីរួមចំណែកក្នុងការបង្កើនសោភ័ណ្ឌភាពក្រុងនាឱកាសនៃពិធីប្រណាំងទូកងខេត្តកំពតខាងមុខនេះផងដែរ។

សូមបញ្ចាក់ថា ខេត្តកំពតនឹងរៀបចំពិធីប្រណាំងទូកងខ្នាប្រពៃណី ពិធីបណ្តែតប្រទីប អកអំបុក និងសំពះព្រះខែ រយៈពេល ៣ថ្ងៃ គឺចាប់ពីថ្ងៃទី៦ ដល់ថ្ងៃទី៨ ខែវិច្ឆិកា ឆ្នាំ២០២២ខាងមុខនេះ ដើម្បីចូលរួមអបអរសាទរព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នឹងដើម្បីទាក់ទាញភ្ញៀវទេសចរឱ្យមកសម្រាកកម្សាន្តក្នុងខេត្តឱ្យបានច្រើនផងដែរ។

តាមការរំពឹងទុក ក្នុងរយៈពេលបីថ្ងៃនៃពីធីនេះ នឹងអាចមានភ្ញៀវទេសចរមកសម្រាកកម្សាន្តក្នុងខេត្ត និងនៅតាមបណ្តារមណីដ្ឋាន កន្លែងកម្សាន្ត ផ្ទះសំណាក់ សណ្ឋាគារ ក្នុងចន្លោះពី ៤០ ទៅ ៥០ម៉ឺននាក់ ហើយប្រាក់ចំណូលទាំងអស់និងបានស្រោចស្របទៅលើប្រជាពលរដ្ឋក្នុងខេត្ត៕

អត្ថបទៈ មន្ទីរព័ត៌មានខេត្តកំពត