ខេត្តកំពតនឹងមានឆ្នេរខ្សាច់សមុទ្រកម្សាន្តបន្ទាប់ពីស្ថាបនារួចរាល់ឆ្នេរព្រែកកំពង់បាយ

ខេត្តកំពតរំពឹងថា នឹងមានឆ្នេរខ្សាច់ដ៏ស្រស់ស្អាតនៅមាត់សមុទ្រសម្រាប់ប្រជាពលរដ្ឋកម្សាន្ត ដូចបណ្ដាខេត្តដទៃ ជាប់មាត់សមុទ្រនៃប្រទេសកម្ពុជាដែរ បន្ទាប់ពីបានស្ថាបនាឆ្នេរដៃព្រែកកំពង់បាយ គឺ(ឆ្នេរកោះស្មៅ) ក្នុងខណៈដែលបច្ចុប្បន្នរដ្ឋបាលខេត្តកំពត កំពុងជំរុញលើការយកចិត្តទុកដាក់អភិវឌ្ឍគម្រោង ដំណាក់កាលទី ១រួចរាល់ឆ្នាំ ២០២៣ខាងមុខនេះ។

ថ្លែងក្នុងកិច្ចប្រជុំគណៈកម្មការរៀបចំពិធីប្រណាំងទូក ង ខេត្តកំពត នៅសាលប្រជុំសាលាខេត្ត នាព្រឹក ថ្ងៃទី២៤ ខែតុលា ឆ្នាំ២០២២ ដើម្បីដាក់ផែនការ ការងារឱ្យសម្រេចបានលទ្ធផលជោគជ័យដែលខេត្តកំពតនឹងត្រៀម ធ្វើព្រឹត្តិការណ៍ដ៏មានខ្លឹមសារអត្ថន័យនេះនៅដើមខែវិច្ជកាក្រោយនេះ។

ឯកឧត្តមក ម៉ៅ ធនិន អភិបាលខេត្តកំពត បានអះអាង លើកបញ្ជាក់ថា ជាជំហ៊ានបន្ទាប់ក្រោយពេលស្ថាបនាឆ្នេរព្រែកកំពង់បាយ (ឆ្នេរកោះស្មៅ) ជាមួយនិងសួនច្បារ ក្នុងក្រុងកំពតដែលបច្ចុប្បន្នកំពុងដំណើរការសាងសង់ឲ្យបានសម្រេចរួចរាល់ ហើយនោះ ។ ឈានដល់ការអនុវត្តគម្រោង ដំណាក់កាលទីពីរគឺ រដ្ឋបាលខេត្តនឹងមានគម្រោង ស្ថាបនាឆ្នេរខ្សាច់សម្រាប់ងូតទឹកសមុទ្រកម្សាន្តថ្មីមួយទៀត ក្នុងគោលបំណង ប្រែក្លាយខេត្តកំពត ដែលជាខេត្តមាត់សមុទ្រ សម្រាប់ ទាក់ទាញអារម្មណ៍ ភ្ញៀវទេសចរ មកសម្រាកកំសាន្តឱ្យបានកាន់តែច្រើនថែមទៀតនៅក្នុងខេត្តកំពត ។

ក្នុងគម្រោងការសាងសង់នេះ ឯកឧត្តមអភិបាលខេត្តក៏បានបញ្ជាក់ឲ្យដឹងថា ជាដំណើរការនៃគម្រោងការសាងសង់ឆ្នេរខ្សាច់នៅពេលខាងមុខនេះ ពេលចាប់ផ្ដើមសាងសងនៃគម្រោង ដើម្បីទៅដល់ឆ្នេរសមុទ្រថ្មីនេះ នៅពេលចាប់ផ្ដើម ត្រូវធ្វើផ្លូវមួយខ្សែមានប្រវែងប្រមាណជាង ៤គីឡូម៉ែត្រ ដោយធ្វើជាផ្លូវភ្លោះមានទទឹង ៣០ម៉ែត្រឲ្យមានសោភ័ណភាពស្រស់ស្អាតផងដែរ។

ជាមួយនឹងគម្រោងការសាងសង់នៃខ្សាច់នេះដែរ ក្នុងឱកាសនោះ ឯកឧត្តមអភិបាលខេត្តក៏បានស្នើឱ្យមន្ទីរជំនាញនិងអាជ្ញាធរ ពាក់ព័ន្ធត្រូវទៅត្រៀមនឹងចូលរួមការសិក្សាប្លង់គម្រោងមេ ក្នុងការធ្វើផ្លូវ ក៏ដូចជាការ រៀបចំទីតាំងដីទំហំប្រមាណ ៤ទៅ៥ហិកតា ដើម្បីបូមខ្សាច់ដាក់បង្កើតជាឆ្នេរសមុទ្រ ដែលឆ្នេរនេះអាចឱ្យភ្ញៀវទេសចរ និងបងប្អូនប្រជាពលរដ្ឋមកលេងកម្សាន្ត ព្រមទាំងអាចមើលឃើញនូវកោះនានាក្នុងខេត្តកែប រួមទាំងកោះនៃប្រទេសជិតខាងផងដែរ។

ឯកឧត្តមអភិបាលខេត្តក៏បានគូសបញ្ចាក់ថា នេះគឺជាការតាំងចិត្តមួយរបស់ឯកឧត្តមក្នុងនាមរដ្ឋបាលខេត្តក្នុងការអភិវឌ្ឍនតំបន់ទេសចរណ៍ថ្មីៗក្នុងបំណងទាក់ទាញនូវភ្ញៀវទេសចរជាតិ អន្តរជាតិឱ្យមកកម្សាន្ត ហើយអ្វីដែលគោលដៅសំខាន់នោះគឺ ដើម្បីលើកកម្ពស់ជីវភាពប្រជាពលរដ្ឋនៅក្នុងខេត្ត ទៅលើវិស័យឯកជន និងវិស័យទេសចរណ៍ ព្រមទាំងដើម្បីលើកកតិ្តនាម កិត្តិយសខេត្តកំពតផងដែរ។

សូមបញ្ជាក់ថា ក្នុងកិច្ចប្រជុំនាពេលនេះ គឺដើម្បីត្រួតពិនិត្យការងារតាមអនុគណៈកម្មការនីមួយៗ ក្នុងការ រៀបចំពិធីប្រណាំងទូក ង ប្រពៃណី ដែលនឹងប្រព្រឹត្តទៅនៅថ្ងៃទី៦-៧ ខែវិច្ឆិកា និងពិធីបណ្តែតប្រទីប អកអំបុក សំពះព្រះខែ នៅថ្ងៃទី៨ ខែវិច្ឆិកា ឆ្នាំ២០២២ខាងមុខ ក្នុងអត្ថន័យខ្លឹមសារដើម្បីចូលរួម អបអរសាទរព្រះរាជពិធីបុណ្យអុំទូក បណ្តែតប្រទីប អកអំបុក សំពះព្រះខែដែលជាបុណ្យប្រពៃណីជាតិខ្មែរ ពីបុរាណកាល។

ក្នុងកិច្ចប្រជុំនេះ ឯកឧត្តមអភិបាលខេត្តក៏បានអំពាវនាវ ក៏ដូចជាកាតណែនាំដល់អភិបាលក្រុងកំពត និងស្រុកទឹកឈូ ត្រូវផ្សព្វផ្សាយដល់ប្រជាពលរដ្ឋ ឱ្យចូលរួមសំអាតអនាម័យបរិស្ថានជុំវិញផ្ទះរៀងៗខ្លួន និងត្រូវទុកដាក់សម្រាមឱ្យបានត្រឹមត្រូវ ពិសេសបំផុសឱ្យប្រជាពលរដ្ឋ មន្ត្រីរាជកា ស្ថាប័ន្តឯកជន ចូលរួមតុមតែងលម្អភ្លើងពណ៌តាមទីតាំងរបស់ខ្លួន ដើម្បីរួមចំណែកក្នុងការបង្កើនសោភ័ណ្ឌភាពក្រុងនាឱកាសនៃពិធីប្រណាំងទូកងខេត្តកំពតខាងមុខនេះ៕

អត្ថបទៈ មន្ទីរព័ត៌មានខេត្តកំពត