៩ខែទំនិញចេញចូលតាមច្រកព្រំដែនអន្តរជាតិព្រែកចាក មានទំហំទឹកប្រាក់ជាង ៧លានដុល្លា

បន្ទាប់ពីរាជរដ្ឋាភិបាលបើកប្រទេសឡើងវិញ ចរាចរទំនិញនាំចូល និងនាំចេញ ឆ្លងកាត់តាមច្រកទ្វារព្រំដែនអន្តរជាតិព្រែកចាក កាន់តែមា នភាពប្រសើរ ហើយបើតាមរបាយការណ៍របស់ស្ថាប័នជំនាញបានឲ្យដឹងថា ៩ខែក្នុងឆ្នាំ២០២២ ទំហំពាណិជ្ជកម្មទំនិញនាំចេញនាំចូលមានតម្លៃជាង៧លានដុល្លា។

តាមរបាយការណ៍របស់ទីស្នាក់ការគយប្រចាំនៅច្រកទ្វារព្រំដែនអន្តរជាតិព្រែកចាក ស្ថិតភូមិថ្កូវ ឃុំឬស្សីស្រុកខាងលិច ស្រុកកំពង់ត្រាច ខេត្តកំពតបានបង្ហាញថា បន្ទាប់ពីរាជរដ្ឋាភិបាលបើកប្រទេសឡើងវិញ ចរាចរទំនិញ នាំចេញនាំចូលឆ្លងកាត់តាមច្រកទ្វារមានសកម្មភាពកាន់តែប្រសើរឡើង។ មុខទំនិញនាំចូលសំខាន់ៗ មានប្រេងឆា គ្រឿងឧបភោគបរិភោក ធ្យូងថ្ម ក្រណាត់ ផលិតផលវាយនភ័ណ្ឌ សម្ភារសំណង់ និងទំនិញផ្សេងៗទៀត ចំណែកទំនិញនាំចេញចម្បងបំផុត មានតែស្ករសមួយមុខប៉ុណ្ណោះ។

តាមរបាយកាណ៍ដដែលនោះក៏បានបញ្ជាក់ដែរថា សម្រាប់រយៈពេល៩ខែក្នុងឆ្នាំ២០២២ ទំហំពាណិជ្ជកម្មនៃការនាំទំនិញចេញមាន តម្លៃ៤,៣លានដុល្លា ចំណែកការនាំទំនិញចូលមានតម្លៃ ២,៩លានដុល្លា។

ក្រៅពីនេះ ការធ្វើដំណើរឆ្លងកាត់របស់ពលរដ្ឋ និងភ្ញៀវទេសចរ ក៏មានភាពល្អប្រសើរដែរ។តាមរបាយការណ៍របស់ប៉ុស្តិ៍នគរបាលប្រចាំច្រក បានបង្ហាញដែរថា សម្រាប់រយៈពេល៦ខែដើមឆ្នាំ២០២២ អ្នក ធ្វើដំណើរចូលកមកម្ពុជា សរុប ៧.៤០៧នាក់ ក្នុងនោះជនបរទេស ៦.០៦២នាក់ អ្នកធ្វើដំណើរចេញទៅវៀតណាមមានចំនួន ៨.១០២នាក់ ជនបរទេស ៦.២៩៣នាក់។

ក្នុងរបាយការណ៍ក៏បានបង្ហាញដែរថា ក្នុងឆ្នាំ២០២២នេះ កម្លាំងនគរបាលប្រចាំច្រកព្រំដែនអន្តរជាតិព្រែក សហការជាមួយកុងស៊ុលវៀតណាម និងកងកម្លាំងរបស់ខេត្តព្រះសីហនុបានបញ្ជូនជនអន្តោប្រវេសន៍ខុសច្បាប់ទៅប្រទេសវៀតណាម ចំនួន៧លើក សរុបមានចំនួន៣៧១នាក់ ស្រី៥៨នាក់៕

អត្ថបទៈ មន្ទីរព័ត៌មានខេត្តកំពត