នៅថ្ងៃទី២៧ ខែសីហា ឆ្នាំ២០២៥ សិស្សានុសិស្សដែលត្រូវប្រឡងបាក់ឌុបនៅថ្ងៃស្អែក បាននាំគ្នាមកពិនិត្យមើលឈ្មោះ និងលេខបន្ទប់នៅតាមមណ្ឌលប្រឡងនានានៅទូទាំងខេត្ត។ អ្នកខ្លះក៏បានសែនព្រេនបួងសួងសុំសេចក្តីសុខ និងមានស្មារតីចងចាំល្អក្នុងពេលប្រឡង ហើយស្របពេលដែលមានការជួយជ្រោមជ្រែងឧបត្ថម្ភគាំទ្រផ្សេងៗពីអាជ្ញាធរខេត្ត និងក្រុមយុវជនផងនោះ ពួកគេរំពឹងថានឹងទទួលបានលទ្ធផលប្រឡងល្អ។
សិស្សានុសិស្សដែលមកពីតាមបណ្តាស្រុកនានក្នុងខេត្តកំពត បានធ្វើដំណើរមកពិនិត្យមើលឈ្មោះ និងលេខបន្ទប់ប្រឡង និងបានស្វែងរកកន្លែងស្នាក់នៅផងដែរដោយចាប់ផ្តើមចូលសម្រាកពីយប់នេះតទៅ។ ពួកគេថា ការរៀបចំមណ្ឌលប្រឡងបានស្អាត និងមានអនាម័យល្អ ព្រមទាំងមានការរៀបចំកន្លែងសម្រាប់ជួយសម្រួលដល់សិស្ស ដូចជាកន្លែងផ្ញើកងម៉ូតូ កន្លែងផ្តល់ជូនអាហារ និងភេសជ្ជៈ ពិសេសផ្តល់ជូនកន្លែងស្នាក់នៅដល់សិស្សមកពីគ្រួសារខ្វះខាតថែមទៀតផង។ សិស្សានុសិស្សដែលត្រូវប្រឡងមានចិត្តសប្បាយរីករាយ ហើយរំពឹងថា លទ្ធផលប្រលងបាក់ឌុបឆ្នាំនេះនឹងកាន់តែល្អប្រសើរជាងឆ្នាំមុនៗ។អនុប្រធានយុវជន ស.ស.យ.ក ស្រុកទឹកឈូ លោក អំ តារា បានប្រាប់ឱ្យដឹងថា ក្រោមការយកចិត្តទុកដាក់ ពីសំណាក់ ឯកឧត្តម ម៉ៅ ធនិន អភិបាលខេត្តកំពត ពិសេសលោក អ៊ឹម ច័ន្ទសោធន អភិបាលស្រុកទឹកឈូ ក្នុងការជួយសម្រួលដល់ការប្រឡងរបស់ប្អូនៗសិស្សានុសិស្ស ដែលត្រូវមកប្រឡងនៅតាមមណ្ឌលនានាក្នុងស្រុក ក្រុមការងារយុវជន ស.ស.យ.ក បានត្រៀមកន្លែងផ្ញើកងម៉ូតូដោយឥតគិតថ្លៃ ការផ្តល់ម្ហូបអាហារ និងភេសជ្ជៈ រួមជាមួយបន្ទប់ស្នាក់នៅដោយឥតគិតថ្លៃសម្រាប់បេក្ខជនដែលជួបការលំបាកផងដែរ។
ប្រធានមន្ទីរអប់រំ យុវជន និងកីឡាខេត្តកំពត លោក សូ ភារិទ្ធ បានបញ្ជាក់ប្រាប់ថា សម្រាប់ការប្រឡងសញ្ញាបត្រមធ្យមសិក្សាទុតិយភូមិសម័យប្រឡង ២៨ សីហា ២០២៥ ស្អែកនេះ ខេត្តកំពតមានមណ្ឌលប្រឡង ១០មណ្ឌល ស្មើ ២១៥បន្ទប់ មានបេក្ខជនសរុប ៥,៣១៧នាក់ ក្នុងនោះស្រី ២.៩៩៥នាក់ ដែលក្នុងនោះថ្នាក់វិទ្យាសាស្ត្រមាន ៣មណ្ឌល (វិទ្យាល័យកំពតក្រុង ២មណ្ឌល និងអនុវិទ្យាល័យហ៊ុនសែនអង្គរជ័យ ១មណ្ឌល) ស្នើ ៥៥បន្ទប់ មានបេក្ខជនសរុប ១,៣៤៤នាក់ ស្រី៨៥៨នាក់។ ថ្នាក់វិទ្យាសាស្ត្រសង្គមមាន ៧មណ្ឌល (មានវិទ្យាល័យព្រះរាជសម្ភារ វិទ្យាល័យឌីប៉ុកសាមគ្កី វិទ្យាល័យត្រសេកកោង អនុវិទ្យាល័យហ៊ុនសែនជុំគ្រៀល វិទ្យាល័យព្រះនរោត្តមរណឫទ្ធិ វិទ្យាល័យជាស៊ឹមអង្គរជ័យ និងសាលាបឋម អេងមាសតានី) មាន ១៦០បន្ទប់ បេក្ខជនសរុប ៣,៩៧៣នាក់ ស្រី ២,១៣៧នាក់៕
អត្ថបទ និងរូបភាព៖ មន្ទីរព័ត៌មានខេត្តកំពត
0 Comments