ការជំរុញ​វិស័យ​ទេសចរណ៍​ឲ្យ​រីកចម្រើន​ឡើង​នឹង​ផ្តល់​ផល​ជាច្រើន​ដល់​សេដ្ឋកិច្ច សង្គម និង​ការងារ

​រដ្ឋមន្ត្រី​ស្តីទី​ក្រសួងទេសចរណ៍​ថា វិស័យ​ទេសចរណ៍​គឺជា​វិស័យ​មួយ​សំខាន់ គឺ​ឆ្អឹងខ្នង​មួយ​ដ៏​មាន​ប្រសិទ្ធភាព​ខ្ពស់បំផុត​ក្នុងការ​ទ្រទ្រុង​សេដ្ឋកិច្ច​របស់​ប្រទេសជាតិ​។ ឯកឧត្តម​អំពាវនាវ​ឲ្យ​មន្ត្រី​ជំនាញ និង​អ្នកពាក់ព័ន្ធ​វិស័យនេះ​ទាំងអស់គ្នា ត្រូវ​ចូលរួម​អភិវឌ្ឍន៍​វិស័យ​ទេសចរណ៍​កាន់តែ​រីកចម្រើន​ឡើង ព្រោះ​ឯកឧត្តម​អះអាងថា បើ​វិស័យ​ទេសចរណ៍​រីកចម្រើន​ឡើង នោះ​វា​នឹង​ផ្តល់​ផលប្រយោជន៍​ជាច្រើន​ដល់​សេដ្ឋកិច្ច សង្គម និង​ការងារ​ដល់​ប្រជាពលរដ្ឋ​ដោយផ្ទាល់​និង​ដោយ​ប្រយោល​។

​វិស័យ​ទេសចរណ៍​កម្ពុជា​ជា​ទេសចរណ៍វប្បធម៌ និង​ធម្មជាតិ ហើយ​ទេសចរណ៍​គឺជា​មាស​បៃតង មានន័យថា​វិស័យនេះ​បាន​ជួយ​ជាច្រើន​នៅក្នុង​ការអភិវឌ្ឍន៍​បៃតង ការផ្តល់​នូវ​ចំណូល​សេដ្ឋកិច្ច ការអភិវឌ្ឍន៍​សង្គម​និង​ការងារ ដូច្នេះហើយ​ទើបរាជរដ្ឋាភិបាល​បានកំណត់​ចេញ​នូវ​ចក្ខុវិស័យ ក៏ដូចជា​យុទ្ធសាស្ត្រ​នៃ​ការអភិវឌ្ឍន៍​វិស័យ​ទេសចរណ៍​នេះ​។

​ឆ្នាំ​កន្លងទៅ​ពិភពលោក​មាន​កំណើន​ភ្ញៀវ​ទេសចរណ៍​ក្នុង​រង្វង់ពី ៤​ទៅ​៥​ភាគរយ គឺ​ប្រមាណ​ជាជាង​មួយ​ពាន់​បួន​រយ​លាន​នាក់ ហើយនឹង​កើនឡើង​មួយ​ពាន់​ប្រាំបី​រយ​លាន​នាក់​នៅ​ឆ្នាំ​២០៣០។ ដោយឡែក​កម្ពុជា​កាលពី​ឆ្នាំ​២០១៨ ទូទាំង​ប្រទេស​មាន​ភ្ញៀវទេសចរ​អន្តរជាតិ ប្រាំមួយ​លាន​កន្លះ និង​ភ្ញៀវទេសចរ​ជាតិ​ដប់​លាន​កន្លះ ដែលមាន​កំណើន​រង្វង់​ប្រមាណ​ប្រាំ​ភាគរយ​។

​នេះ​បើតាម​ការលើកឡើង​រប​ស់ឯកឧត្តម ទិ​ត្យ ចន្ថា រដ្ឋមន្ត្រី​ស្តីទី​ក្រសួងទេសចរណ៍ នៅក្នុង​ពី​ធី​អបអរសាទរ​ទិវា​ទេសចរណ៍​ពិភពលោក ២០១៩ ក្រោម​ប្រធានបទ “​ទេសចរណ៍ និង​ការងារ​៖ អនាគត​កាន់តែ​ប្រសើរ​សម្រាប់​យើងទាំង​អស់​គ្នា​” ដែល​បាន​ប្រារ​ព​ធ្វើ​នៅ​សាលប្រជុំ​សាលាខេត្ត​កំពត នៅ​ព្រឹក​ថ្ងៃទី ២៥ ខែកញ្ញា ឆ្នាំ ២០១៩។

​ឯកឧត្តម​បាន​បន្តថា នៅ​ទូទាំងប្រទេស អ្នក​ដែល​ទទួលបាន​ការងារ​ដោយផ្ទាល់​ពី​វិស័យ​ទេសចរណ៍​មាន ចំនួន​៦២​ម៉ឺន​នាក់ ហើយ​ការងារ​ដោយ​ប្រយោល​ប្រមាណ​ជា ពីរលាន​នាក់ ក្នុងនោះ​សូម្បីតែ​អ្នក​ដាំ​បន្លែ​ផ្លែឈើ អ្នកផ្គត់ផ្គង់​សាច់ អ្នក​ចិញ្ចឹមសត្វ អ្នកនេសាទ អ្នក​ប្រក​បរបរ​ខាង​ដឹកជញ្ជូន។​ល​។ ទាំងនេះ​សុទ្ធតែ​បានទទួល​បាន​ផល និង​បម្រើ​ដល់​ការអភិវឌ្ឍន៍​វិស័យ​ទេសចរណ៍​ផងដែរ​។ ឯកឧត្តម​រដ្ឋមន្ត្រី​ស្តីទី​ក្រសួងទេសចរណ៍ បាន​បញ្ជាក់ថា អ្នកធ្វើការងារ​ក្នុង​វិស័យ​ទេសចរណ៍​ម្នាក់​អាច​ចិញ្ចឹម​គ្រួសារ​បាន​បីនាក់ ។ ដូច្នេះហើយ ការជំរុញ​ធ្វើ​ឲ្យ​វិស័យ​ទេសចរណ៍ រីកចម្រើន​ឡើង វា​នឹង​ផ្តល់​ផល​ជាច្រើន​ដល់ សេដ្ឋកិច្ច សង្គម និង​ការងារ។

​នៅក្នុង​ឱកាស​នោះដែរ ឯកឧត្តម ក៏បាន​អំពាវនាវ ដល់​មន្ត្រី​ជំនាញ និង​អ្នកពាក់ព័ន្ធ រួមទាំង​ប្រជាពលរដ្ឋ​ផង​ត្រូវ​បង្កើន​ការយកចិត្តទុកដាក់ ក្នុងការ​ចូលរួម​អភិវឌ្ឍន៍​វិស័យ​ទេសចរណ៍​នៅក្នុង​តំបន់ និង​ខេត្ត​របស់ខ្លួន ទាំង​ការអភិវឌ្ឍន៍​កន្លែង​ក​ម្សា​ន្ត​ឲ្យ​សំបូរបែប មាន​អនាម័យ និង​បរិស្ថាន​បៃតង​ស្អាត ព្រមទាំង​បង្កើន​ការយកចិត្តទុកដាក់​ប​ន្ថែ​ម​ទៀត នូវ​ការផ្តល់​សេវាកម្ម​ល្អ ដល់​ភ្ញៀវ​ទេសចរណ៍ ដើម្បី​ឲ្យ​ភ្ញៀវ​ទេសចរណ៍​មក​កម្សាន្ត​ស្នាក់នៅ​បានយូរ មក​ម្តង​ហើយ​ចង់​មក​ម្តងទៀត​៕
​អត្ថ​ប​ទៈ លោក សារឹម អាន​