ឯកឧត្តម ​សោម ចិន ​បន្ត​ចុះសួរសុខទុក្ខ​ និង​នាំ​អំណោយ​ជូន​គ្រួសារ​ចាស់ជរា​ប្រឈម​ការខ្វះខាត​ក្នុងដំណាក់កាលទប់ស្កាត់​ការឆ្លង​ជំងឺ​កូ​វីដ​១៩ ​ក្នុង​សង្កាត់​អណ្ដូង​ខ្មែរ​ ក្រុង​កំពត​

ដើម្បី​ជួយ​សម្រួល​ដល់​ជីវភាព​ខ្វះខាត និង​ការយល់ដឹង​ដល់​ប្រជាពលរដ្ឋ ដែល​ស្ថិតក្នុង​ស្ថានភាព រួមគ្នា បង្ការ ទប់ស្កាត់​ការរីក​រាលដាល​នៃ​ជំងឺឆ្លង​កូ​វីដ​១៩ ឲ្យ​មាន​ប្រសិទ្ធភាព​ក្នុង​មូលដ្ឋាន​សហគមន៍ ជាមួយ​រាជរដ្ឋាភិបាល​។​ ​ឯកឧត្តម​ សោម ចិន អ្នកតំណាងរាស្ត្រ​មណ្ឌល​កំពត និង​ជា​ប្រធាន​ក្រុមការងារ​ចុះជួយ​ក្រុង​កំពត រួម​និង​មន្ត្រី​អាជ្ញាធរ​មូលដ្ឋាន នៅ​ថ្ងៃទី២៦ ខែមេសា ឆ្នាំ​២០២០​បាន​បន្ត​អញ្ជើញ​ចុះ សួរសុខទុក្ខ​និង អប់រំ​ផ្សព្វផ្សាយ​ណែនាំ​អំពី​វិធានការ ការពារ​ទប់ស្កាត់​ការឆ្លងជម្ងឺ​កូ​វីដ​១៩ និង​នាំយក​អំណោយ​រួមមាន អង្ករ ទឹកត្រី ទឹកស៊ីអ៊ីវ ត្រីខ សំលៀកបំពាក់ ក្រមារ​ទឹក​អាកុល នឹង​ថវិកា​មួយចំនួន ដើម្បី​ផ្ដល់ជូន​ដល់​គ្រួសារ​ចាស់ជរា ដែល​ប្រឈម​ជីវភាព​ខ្វះខាត នៅតាម​ខ្នង​ផ្ទះ ក្នុងភូមិ​អូរ​តូច សង្កាត់​អណ្ដូង​ខ្មែរ ក្រុង​កំពត​ខេត្តកំពត​។​

មានប្រសាសន៍​សំណ​សំ​ណា​ល ជាមួយ​ប្រជាពលរដ្ឋ លោកយាយ លោកតា ឯកឧត្តម​ សោម ចិន អ្នកតំណាងរាស្ត្រ​​បាន​បញ្ជាក់ថា ស្ថិតក្នុង​ស្ថានភាព​ប្រទេសជាតិ​យើង ជួប​បញ្ហា​ទុក្ខលំបាក ជា​រៀង​រហូតមក សម្ដេច​តេ​ជោ​ ហ៊ុន សែន​ប្រមុខ​រាជរដ្ឋាភិបាល​កម្ពុជា តែងតែមាន​ការយកចិត្ត​ទុកដាក់​គិតគូរ​ខ្ពស់ រួមសុខ​រួមទុក្ខ​លំបាក​និង​ដោះស្រាយ​ជាមួយ​ប្រជាពលរដ្ឋ​គ្រប់​កាលៈទេសៈ​។ ជាក់ស្ដែង​ស្ថិតក្នុង​ស្ថានភាព​ដែល​ពិភពលោក ក៏​ដូច​កម្ពុជា​យើង​កំពុង​រួមដៃគ្នា​ប្រយុទ្ធ​បង្ការ​​ទប់ស្កាត់​ការរីក​រាលដាល​ជំងឺឆ្លង​កូ​វីត​១៩​ដ៏​កាច​សាហាវ​ដែលជា​បន្ទុក​ធ្ងន់ធ្ងរ​សម្រាប់​ពិភពលោក​យើង​នា​បច្ចុប្បន្ននេះ សម្ដេច​តេ​ជោ ​ហ៊ុន សែន ​តែងតែបាន​អំពាវនាវ​និង​ណែនាំ​ដល់​ថ្នាក់ដឹកនាំ​មន្ត្រីរាជការ គ្រប់​ក្រសួង​ស្ថាប័ន អាជ្ញាធរ កងកម្លាំង​គ្រប់​ថ្នាក់​គ្រប់ផ្នែក​ត្រូវ​រួម​សាមគ្គី​គ្នា ចុះ​ដល់​មូលដ្ឋាន​ជួយ​ដល់​ប្រជាពលរដ្ឋ ដើម្បី​អប់រំ​ណែនាំ​ផ្សព្វផ្សាយ ពី​ការបង្ការ​និង​ទប់ស្កាត់​ជំងឺ​កូ​វីដ​១៩ និង​ការផ្គត់ផ្គង់​សម្ភារៈ​បរិក្ខារ​រួម​នឹង​ស្បៀងអាហារ​ទំនុកបំរុង​ជូន​ដល់​ប្រជាពលរដ្ឋ​ដែល​ប្រឈម​ការខ្វះខាត ដោយ​មិន​ទុកចោល​ឱ្យ​ប្រជាពលរដ្ឋ​ណា​ម្នាក់ ស្លាប់​ដោយ​ខ្វះ​ស្បៀងអាហារ ដែល​រដ្ឋាភិបាល​ក៏ដូចជា​អាជ្ញា​ធរមាន​សមត្ថកិច្ច មិនបាន​ដឹង​និង​មិនបាន​ដោះស្រាយ​ឡើយ​។​

ឯកឧត្តម​អ្នកតំណាងរាស្ត្រ ក៏បាន​សំណូមពរ​ចំពោះ​លោកយាយ លោកតា​សូមឱ្យ​ជួយ មានការ​ក្រើនរំលឹក​ដល់​កូនចៅ​ប្រជាពលរដ្ឋ​ក្នុងភូមិ បើ​ពុំមាន​ការចាំបាច់​ទេ​ក្នុងដំណាក់កាល​នេះ គួរ​កុំ​ធ្វើដំណើរ​ចេញពីផ្ទះ ឬ​ចូលរួម​ក្នុង​កម្មវិធី​ប្រ​មូល​​ផ្ដុំគ្នា​មាន​មនុស្ស​ច្រើន ដែល​ងាយ​នាំ​ឲ្យ​ប្រឈម​នឹង​ការឆ្លង​ជំងឺ​កូ​វីដ​១៩ ហើយ​ត្រូវ​ស្តាប់​និង​អនុវត្តតាម​ការណែនាំរ​បស់​រាជរដ្ឋាភិបាល ក៏​ដូច​វិធានការ​ណែនាំ​របស់​ក្រសួងសុខាភិបាល​ដែល ដែល​អាជ្ញាធរ​សង្កាត់​បាន​ចាក់​សារ​ជា​សំ​ឡេង​​​ផ្សព្វផ្សាយ តាម​មេក្រូ​នៅក្នុង​ភូមិ សង្កាត់​នា​សព្វថ្ងៃនេះ​ឱ្យបាន​យល់ដឹង​ទាំងអស់គ្នា អំពី​វិធាន​ការថែទាំ សុខភាព​ឱ្យបាន​ល្អ ដើម្បី​រួមគ្នា ប្រយុទ្ធប្រឆាំង​ទប់ស្កាត់ ការរីក​រាលដាល មេរោគ​កូ​វីដ ១៩​នេះ​ឲ្យ​ទទួលបាន​ប្រសិទ្ធភាព​នៅក្នុង​សហ​គមន៍​របស់​យើង​។​

ដូច្នេះ​ជាមួយគ្នានេះដែរ​ក៏​សូម​ឲ្យ លោកយាយ លោកតា រួម​នឹង​ប្រជាពលរដ្ឋ​យើងទាំងអស់គ្នា ត្រូវ​ប្រកាន់ខ្ជាប់ នូវ​អនាម័យ​ខ្ពស់ គឺ​ការហូប​ស្អាត ផឹក​ស្អាត រស់នៅ​ស្អាត ពិសេស​ត្រូវ​ប្រកាន់ខ្ជាប់​នូវ​ការពាក់​ម៉ាស ការ​លាងដៃ​សម្អាត ដោយ​សាប៊ូ​ឬ​ទឹក​អាកុល ឲ្យ​បាន​ញឹកញាប់​ជាប្រចាំ ហើយ​បើ​មាន​ករណី​សង្ស័យ​នូវ​ការឆ្លង​ជំងឺ​ផ្សេងៗ​សូម​ប្រញាប់​អញ្ជើញ​ទៅ​មណ្ឌល​សុខភាព​ដែល​នៅ​ជិត​ផ្ទះ​របស់ខ្លួន ។ ដើម្បី រក្សាបាន​នូវ​សុខភាព​ល្អ ជៀសផុត ការឆ្លង នៃ វីរុស​កូ​វីដ​១៩​នេះ​មកលើ​សង្គម​គ្រួសារ​និង​សហគមន៍​យើង​៕
​អត្ថ​ប​ទៈ លោក សាយ យាវ​