​ឯកឧត្តម ជាវ តា​យ​ អភិបាលខេត្ត ជួបប្រជុំសម្របសម្រួល​ដោះស្រាយ​ទំនាស់​ដីធ្លី រ៉ាំរ៉ៃ​តាំងពី​ឆ្នាំ​២០១៦​ រវាង​ប្រជាពលរដ្ឋ និង​ម្ចាស់​ដីឡូត៍ មាន​ទីតាំង​ស្ថិតក្នុង​ឃុំ​កំពង់​គ្រែង​ស្រុក​ទឹកឈូ​ខេត្តកំពត​

បញ្ហា​ទំនាស់​ដីធ្លីដែល​ពាក់ព័ន្ធ​និង​ព្រំ​ផ្លូវ និង​លំនៅស្ថាន​រវាង​ប្រជាពលរដ្ឋ និង​ម្ចាស់​ដីឡូត៍​ដែលមាន​ភាព​រ៉ាំរ៉ៃ តាំងពី​ឆ្នាំ​២០១៦​មក​ម្លេះ​ ដែល​ស្ថិតនៅ​ទីតាំង​ក្នុង​មូលដ្ឋាន​ភូមិ​ព្រៃ​ត្នោត​ឃុំ​កំពង់​គ្រែង ស្រុក​ទឹកឈូ​ខេត្តកំពត​ជា​យូរ​ឆ្នាំ​កន្លង​មក​នេះ។​ ​នៅ​រសៀល​ថ្ងៃទី​២​៤​ ខែកុម្ភៈ ​ឆ្នាំ​២០២០ ត្រូវបាន​ឯកឧត្តម ជាវ តា​យ​ អភិបាល​នៃ​គណៈ​អភិបាល​ខេត្តកំពត និង​មានការ​ចូលរួម​ពី​លោក​អភិបាលរង​ខេត្ត​ទទួលបន្ទុក​ការងារ​ដីធ្លី​ព្រមទាំង ថ្នាក់ដឹកនាំ​មន្ទីរ​អង្គភាព​ពាក់ព័ន្ធ អាជ្ញាធរ​មូលដ្ឋាន ភូមិ​ឃុំ​និង​ស្រុក​ទឹកឈូ បាន​បើក​កិច្ចប្រជុំ​ជួប​រវាង​ប្រជ​ពលរដ្ឋ​និង​ម្ចាស់​ដីឡូត៍ ដែលជា​គូភាគី​ទំនាស់ ដើម្បី​ធ្វើការ​សម្របសម្រួល​ដោះស្រាយ ក្នុង​គោលការណ៍​ឈ្នះ​ឈ្នះ​ទាំងសង្ខាង​រវាង​ប្រជាពលរដ្ឋ​និង​ម្ចាស់​ដីឡូត៍​។​

​កិច្ចប្រជុំ​បន្ទាប់ពី​បាន​ស្ដាប់​នូវ​រាយការណ៍​បណ្ដឹង​កន្លង​មករ​បស់​ប្រជាពលរដ្ឋ ដែល​បាន​ដាក់ជូន​ឲ្យ​អាជ្ញា​ធរមាន​សមត្ថកិច្ច​ជួយ អន្តរាគមន៍​ដោះស្រាយពាក់ព័ន្ធ​ជាមួយ​ម្ចាស់​ដីឡូត៍ ដែល​បាន​បិទផ្លូវ​ឆ្លងកាត់​ចេញចូល​ដីស្រែ​និង​លំ​នៅ​ស្ថាន​​របស់​ពួកគាត់ និង​មតិ​សំណូមពរ​របស់​ប្រជាពលរដ្ឋ​ក្នុង​កិច្ចប្រជុំ​នេះ ដែល​ភាគច្រើនសុំ​ស្នើអោយ​ម្ចាស់​ដីឡូត៍ គូភាគី​ទំនាស់អោយជួយសម្របសម្រួល​ដោះស្រាយ​បើកផ្លូវ​អោយ​ពួកគាត់​បានធ្វើ​ដំណើរ​ចេញចូល​ឆ្លងកាត់​ដីស្រែ​ឬ​លំ​នៅ​ស្ថាន​​របស់​ពួកគាត់​រួចមក​។​

​ជា​លទ្ធផល​កិច្ចប្រជុំ ឯកឧត្តម ​ជាវ តា​យ ​អភិបាលខេត្ត បានធ្វើការ​សម្របសម្រួល​ដល់​គូភាគី​ទំនាស់ រវាង​ប្រជាជន​និង​ម្ចាស់​ដីឡូត៍​ឱ្យ​មានការ​សម្បទាន​យោគយល់​គ្នា​ទៅវិញទៅមក​ដោយ​ធ្វើយ៉ាងណា ការដោះស្រាយ​តាម​គោលការណ៍​ឈ្នះ​​ឈ្នះ​រវាង​ភាគី​ទំនាស់​ទាំងសង្ខាង។ ឯកឧត្តម​អភិបាលខេត្ត​បាន​បញ្ជាក់ថា រដ្ឋបាលខេត្ត​គឺជាសេនាធិការ​ឱ្យ​រាជរដ្ឋាភិបាល​ហើយ​ការដោះស្រាយ​ទំនាស់​ដីធ្លី​ក្នុង​ជំហាន​ដំបូង​គឺ រដ្ឋបាលខេត្តពុំមាន​ជម្រើស​ណាក្រៅពី​ការ​សម្រប​សម្រួល​​​​សម្បទា​ន​គ្នា​រវាង​ភាគី​ទំនាស់​បានឡើយ គឺ​អនុវត្តន៍​ទៅតាម​គោលការណ៍​ឈ្នះ​ឈ្នះ​ទាំងអស់គ្នា ក្រៅ​ប្រព័ន្ធតុលាការ​។

ដូច្នេះ​ឯកឧត្តម ​ជាវ តា​យ ​អភិបាលខេត្ត ក៏បាន​ដាក់​សំណូមពរ​ស្នើសុំ​ទៅប្រជាពលរដ្ឋ​ឱ្យ​មានការ​ស្ងប់ចិត្ត រីឯ​ម្ចាស់​ដីឡូត៍​ដែល​បាន​បិទផ្លូវ សូម​ឲ្យ​មានការ​ឆ្លើយតប​យ៉ាង​ឆាប់ ពោលគឺ​ឆ្លើយតប​តាម​ការកំណត់​ស្នើសុំ​របស់​ម្ចាស់​ដីឡូត៍​ឲ្យ​បាន​ត្រឹម​ថ្ងៃទី​២៧ ខែកុម្ភៈ ​ឆ្នាំ២០២០ នេះ​បើ​ពុំ​ដូច្នោះ​ទេ​រដ្ឋបាលខេត្ត​នឹង​ចាត់វិធានការ​អនុវត្ត​ផ្អែកលើ​មូលដ្ឋាន​ទៅតាម​នីតិវិធី​ច្បាប់​និង​ដោយ​យោងតាម ពាក្យ​ប្ដឹង​របស់​ប្រជាពលរដ្ឋ​និង​អាជ្ញាធរ​មូលដ្ឋាន​។

តែ​ទោះបីយ៉ាងណា​ឯកឧត្តម​អភិបាលខេត្ត​ក៏បាន​សម្ដែង​ក្ដីសង្ឃឹម​ចំពោះ​ម្ចាស់​ដីឡូត៍​និង​គិតពិចារណា​ធ្វើការ​សម្របសម្រួល ក្នុង​ទឹកចិត្ត​មនុស្សធម៌​ដើម្បី​បើកផ្លូវ​ជូន​ប្រជាពលរដ្ឋ​ប្រើប្រាស់​ដោយ​ចាត់ទុកជា​ខ្មែរ​កាន់​ព្រះពុទ្ធសាសនា​ក្នុងការ​ធ្វើបុណ្យ​ក៏ដូចជា​កិត្តិយស​របស់ខ្លួន​ផងដែរ​។ ចំណែក​ឯការ ដោះស្រាយ​ធ្វើ​ផ្លូវ មួយ​ខ្សែ​នៅក្នុង​ទីតាំង​នៃ​មូលដ្ឋាន​នោះ​ក្រៅពី​មានការ​សម្របសម្រួល​ដំណោះស្រាយ​រួចរាល់ ក្នុង​កិច្ចប្រជុំ​នេះឯកឧត្តម​អភិបាលខេត្ត​ នឹង​បាន​ចាត់​បញ្ជូន​គ្រឿងចក្រ​ឲ្យ​ធ្វើការ​ស្ថាបនា​ផ្លូវ​នេះ​ជូន​ប្រជាពលរដ្ឋ​ប្រើប្រាស់​ឲ្យ​បាន​ឆាប់ៗ​ពេលខាងមុខ​នេះ​ផងដែរ​។​

-​សូមបញ្ជាក់ថា កិច្ចប្រជុំ​ស្ដីពី​បញ្ហា​ទំនាស់​ដីធ្លី​នេះ បន្ទាប់ពី​បាន​ជ្រាប​នូវ​របាយការណ៍​របស់​អាជ្ញាធរ ក៏​ដូច​ការស្នើសុំ អន្តរាគមន៍​របស់​ប្រជាពលរដ្ឋ​ក្នុង​មូលដ្ឋាន ឱ្យមាន​ការសម្របសម្រួល​ដោះស្រាយ ជូន​ពួកគាត់​និង ផ្អែកលើ ចំណាត់​ការ​​របស់​ឯក​ឧ​ត្ត​ម​អភិបាលខេត្ត​បាន​ចាត់​បញ្ជូន​ឲ្យ​មន្ត្រី​ជំនាញ និង​អាជ្ញាធរ​មូលដ្ឋាន មាន​ការចុះ​សិក្សា​ស្វែងយល់​ជាក់ស្តែង​ដល់ទី​តាំង​ដី​ទំនាស់​កាលពីពេល​ថ្មីៗ​កន្លងទៅនេះ ដើម្បី​បានជា​មូលដ្ឋាន​ធ្វើការ​សម្របសម្រួល​ដោះស្រាយ​ជូន​ប្រជាពលរដ្ឋ​៕
​អត្ថ​ប​ទៈ លោក សាយ យាវ​