​មន្ត្រី​ជំនាញ​ក្រសួងបរិស្ថាន​លើកឡើងថា​បរិស្ថាន​ស្អាត​សុខភាព​ល្អ ទាក់ទាញ​ទេសចរ បង្កើន​ប្រាក់ចំណូល

មន្ត្រី​ជំនាញ​ក្រសួងបរិស្ថាន​បាន​លើកឡើងថា បរិស្ថាន​ផ្សារភ្ជាប់​ជាមួយ​ជីវិត​រស់នៅ ប្រសិនបើ​បរិស្ថាន​ស្អាត ប្រជាពលរដ្ឋ​នឹងមាន​សុខភាព​ល្អ ហើយ​ទេសចរ​នឹង​កាន់តែ​មក​សម្រាក​កម្សាន្ត​ច្រើន បង្កើន​មុខរបរ បង្កើន​ចំណូល​កាន់តែច្រើន​។

​មានប្រសាសន៍​នៅក្នុង​ទិវា​អនាម័យ​បរិស្ថាន​ជាតិ ២៣ វិច្ឆិកា ក្រោម​ប្រធានបទ​“​ភូមិឋាន​ស្អាត សុខភាព​ល្អ ជីវិត​រីករាយ​” ដែល​បាន​ធ្វើឡើង​នៅ​ភូមិ​ត្រពាំងរ​ពៅ សង្កាត់​ព្រែក​ត្នោត ក្រុង​បូកគោ ខេត្តកំពត នៅ​ព្រឹក​ថ្ងៃទី ២៣ ខែវិច្ឆិកា​នេះ ឯកឧត្តម នេត្រ ភ​ត្រា រដ្ឋលេខាធិការ​ក្រសួងបរិស្ថាន បាន​លើកឡើងថា ការ​ប្រា​រព​ទិវា​អនាម័យ​បរិស្ថាន​នៅពេលនេះ​គ្រាន់តែ​ជា​និមិត្តរូប ដើម្បី​ជំរុញ​នឹង​លើកទឹកចិត្ត​ឲ្យ​ប្រជាពលរដ្ឋ​ចូលរួម​ប្រតិបត្តិ​មេត្រី​បរិស្ថាន, បណ្តុះ​ស្មារតី​ឲ្យ​ពលរដ្ឋ​ស្រឡាញ់​បរិស្ថាន គោរព​បរិស្ថាន ចូលរួម​ក្នុងការ​សម្អាត​អនាម័យ​បរិស្ថាន និង​ជា​ចលនា​ជាតិ​មួយ​ដើម្បី​ឲ្យ​សហគមន៍ សង្គមជាតិ​យើង​មាន​បរិស្ថាន​ស្អាត​តែប៉ុណ្ណោះ ប៉ុន្តែ​អ្វី​ក្រសួង​ក៏ដូចជា​រាជរដ្ឋាភិបាល​ចង់បាន គឺ​ការចូលរួម​អនុវត្ត​របស់​បងប្អូន​ប្រជាពលរដ្ឋ​គ្រប់រូប គ្រប់​ទីកន្លែង​ព្រោះ​បរិស្ថាន​ស្អាត​ផ្តើមចេញពី​យើងទាំងអស់គ្នា ។

​ឯកឧត្តម​បាន​បញ្ជាក់ថា បើទោះជា​ខេត្តកំពត​ជា​ខេត្ត​គោលដៅ​ទេសចរណ៍ មាន​តំបន់​កម្សាន្ត​ច្រើន មាន​ម្ហូប​ឆ្ងាញ់ ប៉ុន្តែ​បើ​បរិស្ថាន​មិន​ស្អាត ភ្ញៀវ​ទេសចរណ៍​ក៏​មិន​មក​ដែរ ផ្ទុយទៅវិញ​បើ​យើង​រួមគ្នា​រក្សា​អនាម័យ បរិស្ថាន​ស្អាត សុខភាព​ក៏​ល្អ ទេសចរ​ក៏​មក​ច្រើន បង្កើន​មុខរបរ បង្កើន​ចំណូល​កាន់តែច្រើន​។

​ឯកឧត្តមរ​ដ្ខ​លេខាធិការ ក៏បាន​ស្នើ​ដល់​ប្រជាពលរដ្ឋ​ត្រូវ​ចេះ​គ្រប់​គ្រង់​សំណល់​សំរាម និង​កាត់បន្ថយ​ការប្រើ​ថង​ប្លា​ស្ទិ​ក​ឲ្យ​បាន​ច្រើន​បំផុត ព្រោះ​នៅ​កម្ពុជា​ក្នុង​មួយថ្ងៃ​សំរាម​ជាង​មួយ​ម៉ឺន​តោន​ត្រូវបាន​បង្កើតឡើង , មួយឆ្នាំ​ប្រមាណ​ជាង​៤​លាន​តោន​។

ដោយឡែក​នៅក្នុង​ខេត្តកំពត​ក្នុង​មួយថ្ងៃ​មាន​សំរាម​ជិត​មួយរយ​តោន​ត្រូវបាន​បង្កើតឡើង ហើយ​ក្នុង​សំរាម​ទាំងនោះ មាន​៦៥ ទៅ​៦៨​ភាគរយ​ជា​សំណល់​សរីរាង្គ ចំណែក​២០​ភាគរយ​ទៀត ជា​សំណល់​ប្លា​ស្ទិ​ក ដែលជា​សំណល់​ប្រឈម​យូរអង្វែង ព្រោះ​វា​យូរ​រលាយ ហើយ​ពេល​វារ​លាយ ឬ​យក​វា​ទៅ​ដុត ក៏​បំពុល​ដី ទឹក និង​ខ្យល់ ខណៈដែល​បច្ចុប្បន្ន​នៅតាម​ទីប្រជុំជន តាម​ក្រុង ស្រុក ការប្រមូល​សំរាម​បាន​ទៅ​ចោល​នៅ​ទីលាន​ចាក់សំរាម​ទើបបាន ៦០ ទៅ​៧០​ភាគរយ​តែប៉ុណ្ណោះ ចំណែកឯ​៣០​ភាគរយ​ទៀត ត្រូវបាន​បោះចោល​តាម​ទីប្រជុំជន តាម​ដងផ្លូវ ឬ​ប្រភពទឹក ហើយ​បំពុល​ទៅដល់​បរិស្ថាន​រស់នៅរ​បស់បង​ប្អូន​ប្រជាពលរដ្ឋ ៕

​អត្ថបទ​៖ មន្ទីរ​ព័ត៌មាន​ខេត្តកំពត​