ខេត្តកំពត​បើក​វគ្គ​បណ្ដុះបណ្ដាល​ស្ដីពី​គោលការណ៍​បែបបទ និង​នីតិវិធី​ផ្ដល់​សេវា​រដ្ឋបាល តាម​ការិយាល័យ​ច្រកចេញចូល​តែមួយ​រដ្ឋបាល​ក្រុង​-​ស្រុក​-​ខណ្ឌ​

នៅ​សាលប្រជុំ​សាលាខេត្ត​កំពត​ កាល​​ព្រឹក​ថ្ងៃ ទី​២៣ ខែវិច្ឆិកា ឆ្នាំ​២០២១ មាន​រៀបចំ​បើក​វគ្គបណ្ដុះបណ្ដាល​ស្ដីពី​គោលការណ៍​បែបបទ និង​នីតិវិធី​នៃ​ការផ្ដល់សេវា រដ្ឋបាល តាម​ការិយាល័យ​ច្រកចេញចូល​តែមួយ របស់​រដ្ឋបាល​ក្រុង-ស្រុក-ខណ្ឌ ក្រោម​អធិបតីភាព​ចូលរួម ឯកឧត្តម​ ប្រាក់ សំអឿន អគ្គនាយក នៃ​អគ្គនាយកដ្ឋាន​រដ្ឋបាល ក្រសួងមហាផ្ទៃ និង​ឯកឧត្តម ​ម៉ៅ ធនិន អភិបាល​ នៃ​គណៈ​អភិបាល​ខេត្តកំពត​។​ ​វគ្គ​បណ្ដុះបណ្ដាល​នេះ​ជា​ជំហាន​ទី​២ រយៈពេល​២​ថ្ងៃ ចាប់ពី​ថ្ងៃ ទី​២៣ ដល់​ថ្ងៃទី​២៤ ខែវិច្ឆិកា ឆ្នាំ​២០២១ ក្រោម​ការរៀបចំ​ឡើង​ដោយ​អគ្គនាយកដ្ឋាន​រដ្ឋបាល​ក្រសួងមហាផ្ទៃ ដែលមាន​សិក្ខាកាម ចូលរួម ដោយផ្ទាល់ ជា​បុគ្គលិក​ពាក់ព័ន្ធ មកពី​រដ្ឋបាល​ក្រុង ស្រុក ក្នុង​ខេត្តកំពត​ចំនួន​៤ គឺ​ស្រុក​អង្គរជ័យ ស្រុក​បន្ទាយមាស ស្រុក​ទឹកឈូ និង​ក្រុង​បូកគោ និង​រដ្ឋបាល​ក្រុងកែប ខេត្ត​កែប។ ដោយឡែក​វគ្គ​បណ្ដុះបណ្ដាល​នេះដែរ ក៏បាន​ធ្វើ​តាមរយៈ​Video Conference (Zoom) ជូន​ដល់​បុគ្គលិក​ពាក់ព័ន្ធ​នៃ​រដ្ឋបាល​ក្រុង ស្រុក ខណ្ឌ ចំនួន​៥៣ ​គោលដៅ នៃ​រាជធានី ខេត្ត​ចំនួន​២២ ក្នុង​ក្របខ័ណ្ឌ​ទូទាំងប្រទេស ផងដែរ។

​​ឯកឧត្តម​ ម៉ៅ ធនិន អភិបាលខេត្ត បានចាត់ទុក​វគ្គប​ណ្ដុះ​បណ្ដាល​នេះ​ពិត​ជាមាន​សារៈសំខាន់ ក្នុងការ​បង្កើន​សមត្ថ​ភាព​ដល់​មន្ត្រី ពាក់ព័ន្ធ កាន់តែ​ប្រសើរ ក្នុង​ការផ្ដល់សេវា​រដ្ឋ​បាល​តាម​ការិយាល័យ ច្រកចេញចូល​តែមួយ​ក្រុង ស្រុក សម្រាប់​យកទៅអនុវត្ត​ការងារ ផ្ដល់​សេវា​ប្រចាំថ្ងៃ​ជូន​ប្រជាពលរដ្ឋ​ឲ្យ​បាន​ឆាប់រហ័ស មាន​ភាពងាយស្រួល មាន​តម្លាភាព​ប្រសិទ្ធភាព គណនេយ្យភាព និង​ការទទួលខុសត្រូវ​ខ្ពស់​។ ឯកឧត្តម​អភិបាលខេត្ត ក៏បាន​ឲ្យ​ដឹង​ដែរ​ថា​ខេត្តកំពត បាន​បង្កើត​ការិយាល័យ​ច្រកចេញចូល​តែមួយ​តាម បណ្ដា​ក្រុង ស្រុក ទាំង​៩ ក្នុង​ខេត្ត ជា​បន្តបន្ទាប់ គឺ​ផ្ដើមដំបូង ការិយាល័យ​ច្រកចេញចូល​តែមួយ​ក្រុង​កំពត​នា ឆ្នាំ​២០១១ និង​ក្រុង ស្រុក មួយចំនួនទៀត ក៏បាន​នឹង​កំពុងដំណើរការ ផ្ដល់​សេវា​រដ្ឋបាល​ជូន​ប្រជាពលរដ្ឋ​តាមរយៈ​ការិយាល័យ​ច្រកចេញចូល​តែមួយ​ទទួលបាន​លទ្ធផល​ល្អប្រសើរ​ផងដែរ​។​

ឯកឧត្តម​ ប្រាក់ សំអឿន អគ្គនាយក​នៃ​អគ្គនាយកដ្ឋាន​រដ្ឋបាល​ក្រសួងមហាផ្ទៃ បាន​លើក​បញ្ជាក់ថា ជានិច្ចកាល រាជរដ្ឋាភិបាល​កម្ពុជា​តែងតែ បង្ហាញ​នូវ​ឆន្ទៈ​យ៉ាង​មុះ​មុត ក្នុងការ​អនុវត្ត​គោលនយោបាយ​កំណែទម្រង់​វិមជ្ឈការ និង​វិសហមជ្ឈការ ក្នុង​គោលបំណង​លើកកម្ពស់​គុណភាព និង​ប្រសិទ្ធភាព នៃ​ការផ្ដល់​សេវាសាធារណៈ ជូន​ប្រជាពលរដ្ឋ ឲ្យ​កាន់តែ​ល្អប្រសើរ​ឡើង។ ទន្ទឹមនឹងនេះ​ការធ្វើកំណែទម្រង់ ការផ្ដល់​សេវាកម្ម​រដ្ឋ​បាល តាមរយៈ​ការិយាល័យ​ច្រកចេញចូល​តែមួយ គឺ​ដើម្បី​បង្កលក្ខណៈ​ងាយស្រួល និង​ឆ្លើយតប នឹង​តម្រូវការ​របស់​អ្នកស្នើសុំ​សេវា ហើយ​នៅតែ​ជា​កិច្ចការ​អាទិភាព​មួយ នៃ​គោលនយោបាយ​កំណែទម្រង់​វិមជ្ឈការ​និង​វិសហមជ្ឈការ ដែល​ត្រូវបាន​ដាក់បញ្ចូល​ទៅក្នុង​យុទ្ធសាស្ត្រ​ចតុកោណ​ដំណាក់កាល​ទី ៤ របស់​រាជរដ្ឋាភិបាល​នីតិកាល​ទី ៦ នៃ​រដ្ឋសភា​។

ដើម្បី​ធានា​ដល់​ការសម្រេចបាន​នូវ​គោលបំណង​នេះ រាជរដ្ឋាភិបាល​បាន​ផ្ដោត​ការយកចិត្តទុកដាក់​យ៉ាងខ្លាំង​ទៅលើ​ការផ្ទេរសិទ្ធិ អំណាច មុខងារ ធនធាន និង​ការទទួលខុសត្រូវ ពី​ក្រសួង​ស្ថាប័ន​នៅ​ថ្នាក់ជាតិ ទៅឱ្យ​រដ្ឋបាល​ថ្នាក់ក្រោម​ជាតិ សំដៅ​បង្ខិត​ការធ្វើ​សេចក្ដីសម្រេចចិត្ត​ក្នុង​ការផ្ដល់​សេវាសាធារណៈ​ជា​មូលដ្ឋាន​និង​ចាំបាច់​នានា​ឱ្យទៅ​កៀក​ជិត​ប្រជាពលរដ្ឋ​។

ឯកឧត្តម ក៏បាន​បន្ត​បញ្ជាក់ទៀតថា បច្ចុប្បន្ន​ការរៀបចំ​ការិយាល័យ​ច្រកចេញចូល​តែមួយ​ក្នុង​បរិបទ​ថ្មី​នេះ​បាន​ធ្វើឡើង​ស្របគ្នា​ទៅនឹង​ស្ថានភាព​កំណែទម្រង់​មុខងារ និង​រចនាសម្ព័ន្ធ​ថ្មី​របស់​រដ្ឋបាល​ក្រុង​ស្រុក​ខណ្ឌ និង​បាន​ផ្សារភ្ជាប់​ទៅនឹង​ចក្ខុវិស័យ​របស់​កម្មវិធី​ជាតិ​ដំណាក់កាល​ទី​២​សម្រាប់​ការអភិវឌ្ឍ​តាមបែប​ប្រជាធិបតេយ្យ​នៅ​ថ្នាក់ក្រោម​ជាតិ ២០២១-២០៣០ ដោយមាន​គោលបំណង​ដាក់ឱ្យ​ប្រើប្រាស់​ប្រព័ន្ធ​បច្ចេកវិទ្យា ព័ត៌មានវិទ្យា សម្រាប់​ការផ្ដល់សេវា​រដ្ឋបាល​ជូន​ប្រជាពលរដ្ឋ​និង​ការរៀបចំ​រដ្ឋបាល​អេ​ឡិច​ត្រូ​និ​ច​ផងដែរ​។

ដូច្នេះ​វគ្គ​បណ្ដុះបណ្ដាល​នេះ​ពិតជា​សំខាន់ លើ​កាល​រៀបចំ​គោលការណ៍​បែបបទ​នីតិវិធី​នៃ​ការអនុវត្ត​មុខងារ ទាំង​មុខងារ​សម្រាប់​ការអភិវឌ្ឍ​និង​មុខងារ​ផ្ដល់​សេវា​រដ្ឋបាល ដែល​រាជរដ្ឋាភិបាល​បាន​ប្រគល់ជូន​រដ្ឋបាល​ថ្នាក់ក្រោម​ជាតិ ដើម្បី​ឲ្យ​ការអនុវត្ត​មុខងារ​ទាំងនោះ​កាន់​តែមាន​ភាពងាយស្រួល ឆាប់រហ័ស តម្លាភាព​និង​គណនេយ្យភាព​ចំពោះ​ប្រជាពលរដ្ឋ​។​

​អត្ថបទ​៖ មន្ទីរ​ព័ត៌មាន​ខេត្តកំពត​