អភិបាលខេត្តកំពត​ក្រើនរំលឹក​ដល់​អាជ្ញាធរ និង​កងកម្លាំង​សមត្ថ​កិច្ច​ពាក់​ព័ន្ធ​យក​ចិត្ត​ទុក​ដាក់​ថែ​រក្សា​​ពង្រឹង​​ស្ថិរភាព សន្តិ​សុខ​សណ្ដាប់​ធ្នាប់​សាធារណៈ នៅ​​មូល​ដ្ឋាន​​អោយបាន​រឹងមាំ​ជូន​ប្រជាពលរដ្ឋ​

ការធានា​នូវ​ស្ថិរភាព​សន្តិសុខ​សណ្ដាប់ធ្នាប់​សាធារណៈ​សង្គម​ ជារួម​គឺជា​ភារកិច្ច​ចាំបាច់​ត្រូវតែ​យក​ចិត្តទុកដាក់​​បំផុត​របស់​រាជរដ្ឋាភិបាល ក៏ដូចជា​កងកម្លាំង​សមត្ថកិច្ច និង​អាជ្ញាធរ​គ្រប់​ជាន់ថ្នាក់​នៅក្នុង​មូលដ្ឋាន​ដើម្បី​បន្ត​អោយមាន​និរន្ត​រភាព​ការអភិវឌ្ឍ​ប្រទេស​និង​ជីវភាព​រស់នៅ របស់​ប្រជាពលរដ្ឋ​។ ​ការលើកឡើង​ដូច្នេះ​របស់​ឯកឧត្តម ជាវ តា​យ អភិបាល នៃ​គណៈ​អភិបាលខេត្ត និង​ជា​ប្រធាន​គណៈបញ្ជាការ​ឯកភាព​រដ្ឋបាលខេត្ត នៅក្នុង​ឱកាស​ឯកឧត្ដម​អភិបាលខេត្ត បាន​ដឹកនាំ​កិច្ចប្រជុំ​គណៈបញ្ជាការ​ឯកភាពរ​ដ្ឋ​បាល​ខេត្ត និង​ការងារ​ផ្សព្វផ្សាយ​ស្ដីពី​វិធានការ​ចាំបាច់​នានា​ពាក់ព័ន្ធ​ការងារ​សម្រាប់​ទប់ស្កាត់​សភាពការណ៍​បច្ចុប្បន្ន នា​សាលប្រជុំ​សាលាខេត្ត​កាលពី​ព្រឹក​ថ្ងៃទី​២១ ខែតុលា ឆ្នាំ​២០១៩ ។

​ឯកឧត្ដម ជាវ តា​យ អភិបាលខេត្ត​បាន​លើក​បញ្ជាក់ថា​៖ បច្ចុប្បន្ន​បើទោះបី​ប្រទេសជាតិ​យើង ក្រោម​ការដឹកនាំ​របស់​សម្ដេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា មានការ​រីកចម្រើន​ជឿនលឿន​លើ​គ្រប់​វិស័យ ក្រោម​ម្លប់​​សន្តិភាព សន្តិសុខ​សណ្ដាប់ធ្នាប់​សាធារណៈ​ត្រូវបាន​ធានាអោយមាន​ភាពរឹងមាំ ប្រជាពលរដ្ឋ​រស់នៅ​មាន​ភាពកក់ក្ដៅ​ក្រោម​ដំបូង​នៃ​លទ្ធិប្រជាធិបតេយ្យ សេរី​ពហុបក្ស និង​ការគោរព​សិទ្ធមនុស្ស​។

ក៏ប៉ុន្តែ ក្នុងដំណាក់កាល​ចុងក្រោយ​នេះ ពាក់ព័ន្ធ​នឹង​ឧបាយកល​ពួក​ឧទ្ទាម​នៅក្រៅ​ប្រទេសមួយ​ក្ដាប់​តូច ក្រៅតែពី​ពួកគេ​បាន​ជំរុញ​អោយ​បរទេស​ដាក់​សម្ពាធ និង​ទណ្ឌកម្មសេដ្ឋកិច្ច​មកលើ​ព្រះរាជាណាចក្រ​កម្ពុជា​យើង ពួកគេ​ទាំងនោះ​តែង​​បាន​ខិតខំ​រិះរក​ឧបាយកល​គ្រប់បែបយ៉ាង ក្នុង​ការធ្វើសកម្មភាព​ញុះញុង​បំបែកបំបាក់​ជាតិ ក្នុង​គោលបំណង​ប៉ុនប៉ង​ដណ្ដើម​អំណាច​​តាមរយៈ​ការផ្ដួលរំលំ​រាជរដ្ឋាភិបាល​ស្របច្បាប់ ដែល​កើតចេញពី​ការបោះឆ្នោត​ដោយ​ឆន្ទៈ​របស់​ប្រជា​ពលរដ្ឋ ដែល​ទង្វើ​ទាំងនេះ​ផ្ទុយ​ពី​គោលការណ៍​នៃ​លទ្ធិប្រជាធិបតេយ្យ​។ ដូច្នេះ​ដើម្បី​ចូលរួម​ពង្រឹង​ធានា​នូវ​ស្ថិរភាព សន្តិសុខ​សណ្ដាប់ធ្នាប់​សាធារណៈ​សង្គម ពិសេស​ការថែរក្សា​ការពារ​សុខសន្តិភាព ដើម្បី​ការអភិវឌ្ឍ​រីកចម្រើន​ប្រទេស​ជាតិ និង​ជីវភាព​រស់នៅ​ប្រកបដោយ​សុខដុមរមនា​របស់​ប្រជាពលរដ្ឋ​យើង​អោយបាន​កាន់តែ​ថ្កុំ​ថ្កើ​ន​បន្ត​ទៅមុខ​ថែមទៀត​នោះ​។​

​ឯកឧត្ដម ជាវ តា​យ ក៏បាន​ក្រើនរំលឹក​ណែនាំ​ដល់​អាជ្ញាធរ និង​សមត្ថកិច្ចមន្ទីរ អង្គភាព​ជំនាញ​គ្រប់ផ្នែក និង​កងកម្លាំង​ឯកភាព​គ្រប់​ថ្នាក់​ត្រូវតែ​រួមសហការ​គ្នា ដាក់ចេញ​នូវ​ផែនការ​សកម្មភាព​ជាក់ស្ដែង​ដើម្បី​ជា​វិធានការ​ថែរក្សា​ការពារ​សន្តិសុខ សណ្ដាប់ធ្នាប់​នៅ​បណ្ដា​ភូមិសាស្ត្រ​ក្នុង​ខេត្ត និង​បង្កា​ទប់ស្កាត់​នូវ​រាល់​សភាពការណ៍​ពាក់ព័ន្ធ​ដល់​ផែនការ​ឧបាយកល​ពួក​ឧទ្ទាម​ដែល​កំពុង​បង្ក​អស្ថេរភាព​សន្តិសុខ សណ្ដាប់ធ្នាប់​សាធារណៈ និង​នាំអោយ​អន្តរាយ​ដល់​ប្រទេស​ជាតិ​ ដែល​រំខាន​ដល់​ការអភិវឌ្ឍ និង​ភាពសុខសាន្ត​របស់​ប្រជាពលរដ្ឋ ក៏ដូចជា​ការទាក់ទាញ​វិនិយោគិន​និង​ការបង្កើត​ការងារ​សម្រាប់​ប្រជាជន​កម្ពុជា​យើង​ផងដែរ​។

​ក្នុង​កិច្ចប្រជុំ​នាឱកាស​នោះដែរ បន្ទាប់ពី​មាន​សេចក្ដីរាយការណ៍​ពី​សមាជិក​អង្គប្រជុំ​ពាក់ព័ន្ធ​សភាពការណ៍​រួម​ទូទៅ​ពី​បញ្ហា​ការងារ​សន្តិសុខ សណ្ដាប់ធ្នាប់ ពិសេស​បញ្ហា​បទល្មើស និង​ជំលោះ​ដីធ្លី​ក្នុង​មូលដ្ឋាន ឯកឧត្ដម ជាវ តា​យ​អភិបាលខេត្ត ក៏បាន​ណែនាំ​អោយ​អាជ្ញាធរ​មូលដ្ឋាន និង​សមត្ថកិច្ច​ពាក់ព័ន្ធ ត្រូវ​រួមសហការ​គ្នា​ខិតខំ​រក​វិធី​ដោះស្រាយ​ដោយ​ភាពទន់ភ្លន់​តាម​គោលការណ៍​ឈ្នះ​ឈ្នះ​ជូន​គ្រប់ភាគី​ជំលោះ ហើយ​បើ​ដោះស្រាយ​មិនបាន​សម្រេច​ទេ​ត្រូវតែ​ចាត់​វិធានការណ៍​តាម​នីតិវិធី​ច្បាប់​អោយបាន​ម៉ឺងម៉ាត់​៕
​អត្ថ​ប​ទៈ លោក សាយ យាវ​