ពលរដ្ឋ​ក្នុង​សង្កាត់​ក្រាំង​អំពិល សារ​ទរ​ចំពោះ​ការបើក​វេទិការ​សាធារណៈ​របស់​ស្នងការដ្ឋាន​នគរបាល​ខេត្តកំពត​

ក្រោយពី​មានការ​ប្រកាស​ព័ត៌មាន​ជា​ផ្លូវការ​អំពី​ការបើក​វេទិការ​សាធារណៈ ជួប​ជាមួយ​ប្រជាពលរដ្ឋ​តាម​មូលដ្ឋាន​ឃុំ​-​សង្កាត់​ទាំង​៩៣ ក្នុង​ខេត្តកំពត​កាលពី​ថ្ងៃទី​១៤ ខែតុលា ឆ្នាំ​២០២១ របស់លោក​ឧ​ត្ត​ម​សេនីយ៍​ទោ ម៉ៅ ច័ន្ទ​មធុ​រិ​ទ្ធ ស្នងការ​នគរបាល​ខេត្តកំពត រួចមក​។ នៅ​រសៀល​ថ្ងៃទី​១៩ ខែតុលា ឆ្នាំ​២០២១ ស្នងការដ្ឋាន​នគរបាល​ខេត្តកំពត​បាន​ដំណើរ​ការបើក​អង្គ​វេទិការ​សាធារណៈ​ជា​លើក​ទី​១ ឡើង ដើម្បី​ជួប​ជាមួយ​ប្រជាពលរដ្ឋ​ក្នុង​មូលដ្ឋាន​នៃ​សង្កាត់​ក្រាំង​អំពិល ក្រុង​កំពត ដែល​វេទិកា​នេះ​ធ្វើឡើង​ក្នុង​មណ្ឌល​កីឡដ្ឋាន​ខេត្ត ដើម្បី​ស្វែងរក​បញ្ហា​ផ្សេងៗ និង​ដំណោះស្រាយ​ជូន​បងប្អូន​ប្រជាពលរដ្ឋ សំដៅ​ធ្វើអោយ​ការអនុវត្ត​នូវ​គោលនយោបាយ​ភូមិ​-​ឃុំ មាន​សុវត្ថិភាព​កាន់​តែមាន​ប្រសិទ្ធភាព​ខ្ពស់​។

ក្នុង​វេទិការ​នេះ ត្រូវបាន​ដឹកនាំ​ធ្វើឡើង​ដោយ​លោក​ឧ​ត្ត​ម​សេនីយ៍​ទោ ម៉ៅ ច័ន្ទ​មធុ​រិ​ទ្ធ ស្នងការ​នគរបាល​ខេត្តកំពត ដោយមាន​ការអញ្ជើញ​ចូលរួម​ពី​លោក​ស្នងការរង​គ្រប់​ផែន នៃ​ស្នងការដ្ឋាន​នគរបាល​ខេត្ត​និង​មេ​ប៉ុស្តិ៍ រួម​នឹង​ប្រជាពលរដ្ឋ​ក្នុង​សង្កាត់​ក្រាំង​អំពិល ក្រុង​កំពត ដែល​តែងមាន​ជួប​បញ្ហា ដែល​តម្រូវ​ទាមទារ​ឲ្យ​អាជ្ញា​ធរមាន​សមត្ថកិច្ច​ជួយ​អន្តរាគមន៍​ដោះស្រាយ​ជូន​ពួកគាត់​។​

​តាមរយៈ​អង្គ​វេទិការ​នេះ បានទទួល​នូវ​សំណូមពរ និង​សំណើរ​ចំនួន ១៨​ករណី ដែល​ភាគច្រើន​ជាការ​ស្នើសុំ​ពាក់ព័ន្ធ​នឹង​ការស្នើសុំ​ធ្វើ​ផ្លូវ​នៅក្នុង​មូលដ្ឋាន​នៃ​សង្កាត់​។ ជាការ​ឆ្លើយតប​ក្នុង​នៅក្នុង​អង្ក​វេទិកា​នេះ លោកស្នងការ​នគរបាល​ខេត្ត​បាន​បញ្ជាក់ថា ចំពោះ​សំណើរ​ដែល​ប្រជាពលរដ្ឋ​បានស្នើ​មក​នោះ​ក្នុង​អង្ក​ការ​នេះ ហើយ​មិន​ពាក់ព័ន្ធ​នឹង​ដែន​សមត្ថកិច្ច​របស់​ស្នងការដ្ឋាន​នគរបាល​ខេត្ត លោក​នឹង​ពាំនាំ​សំណើ​ទាំងអស់នោះ​ទៅជូន​ឯកឧត្តម ម៉ៅ ធនិន អភិបាល​ខេត្តកំពត ក្នុងនាម​ជា​សេនាធិការ​របស់​គណៈបញ្ជាកា​រ​ឯកភាព​រដ្ឋបាលខេត្ត​។​

ចំណែកឯ​បញ្ហា​ប្រជាពលរដ្ឋ​លើក​ជា​សំណូមពរ ពាក់ព័ន្ធ​ការធ្វើ អត្តសញ្ញាណប័ណ្ណ​និង​បញ្ហា​ផ្សេងៗ​ដែល​ទាក់ទង​នឹង​ដែន​សមត្ថកិច្ច​នគរបាល គឺ​ស្នងការដ្ឋាន​នគរបាល​ខេត្ត​បាន​ខិតខំ​យកចិត្តទុកដាក់​ដោះស្រាយ​ជូន​ប្រជាពលរដ្ឋ​ដោយ​ស្រង់​ឈ្មោះ​ដើម្បី​ធ្វើ​ជូន​ឱ្យបាន​ទាន់ពេលវេលា​និង​ការដោះស្រាយ​ឲ្យ​មាន​ប្រសិទ្ធភាព​ខ្ពស់​។ ចំណែកឯ​បញ្ហា​ការអនុវត្ត​គោ​នយោបាយ​ភូមិ​-​ឃុំ មាន​សុវត្ថិភាព​ក្នុង​សង្កាត់​ក្រាំង​អំពិល ក្រុង​កំពត​នា​រយៈពេល​កន្លងមក គឺ​នៅក្នុង​អង្ក​វេទិកា​នេះ ត្រូវបាន​ទទួល​ការ​សារ​ទរ និង​លើកសរសើរ​ពី​សំណាក់​ប្រជាពលរដ្ឋ​រស់នៅក្នុង​សង្កាត់​នេះ​។

ជាមួយគ្នា​នោះដែរ ប្រជាពលរដ្ឋនៅក្នុង​មូលដ្ឋាន​នៃ​សង្កាត់​ក្រាំង​អំពិល ក្រុង​កំពត​នេះ ក៏បាន​សាទរ​គាំទ្រ និង​សំណូមពរ​ចំពោះ​ការបើក​វេទិការ​សាធារណៈ របស់​ស្នងការដ្ឋាន​នគរបាល​ខេត្តកំពត ដូច​ពេលនេះ​ឲ្យ​ធ្វើឡើង​បន្តបន្ទាប់​លើក​ក្រោយៗ​ទៀត ដើម្បី​ឲ្យ​ប្រជាពលរដ្ឋ​បាន​បញ្ចេញ​មតិយោបល់ លើក​ជា​សំណើរ សំណូមពរ​បញ្ហា​ប្រឈម​ជូន​ដល់​អាជ្ញា​ធរមាន​សមត្ថកិច្ច ក៏ដូចជា​អាជ្ញាធរ​ក្នុង​មូលដ្ឋាន ជួយ​រក​ដំណោះស្រាយ​ជូន​ពួកគាត់​។​

​សូមបញ្ជាក់ថា ការធ្វើ​វេទ​កា​សាធារណៈ​នេះ​ឡើង គឺ​ក្នុង​គោលបំណង ដើម្បី​ស្វែងរក​នូវ​សំណូមពរ បញ្ហា​ផ្សេងៗ នឹង​ដើម្បី​រក​ដំណោះស្រាយ ជូន​បងប្អូន​ប្រជាពលរដ្ឋ ពិសេស​ការជំរុញ​ការអនុវត្ត​នូវ​គោលនយោបាយ​ភូមិ​-​ឃុំ មាន​សុវត្ថិភាព របស់​រាជរដ្ឋាភិបាល​ឱ្យបាន​កាន់​តែមាន​ប្រសិទ្ធភាព​ខ្ពស់​នៅតាម​មូលដ្ឋាន​និ​មួយៗ​ក្នុង​ខេត្តកំពត​៕

​អត្ថបទ​៖ មន្ទីរ​ព័ត៌មាន​ខេត្តកំពត​