ថ្ងៃ សៅរ៍ ១៣កើត ខែជេស្ឋ ឆ្នាំកុរ ឯកស័ក ព.ស. ២៥៦៣ រាជធានីភ្នំពេញ ថ្ងៃទី១៥ ខែមិថុនា ឆ្នាំ២០១៩ អង្គការមូលនិធិអាស៊ីប្រចាំកម្ពុជា បានរៀបចំកម្មវិធីបង្កើតសៀវភៅរឿងសម្រាប់កុមារលើកទី៦ (BookLab) ដើម្បីបង្កើតសៀវភៅកុមារ ១០បន្ថែមទៀត ដែលកម្មវិធីនេះ ជាផ្នែកមួយនៃគម្រោង Let’s Read ដើម្បីពង្រឹងសមត្ថភាពអ្នកបង្កើតសៀវភៅក្នុងស្រុកបង្កើតធនធានអំណានឱ្យមានគុណភាពខ្ពស់ និងជំរុញទម្លាប់នៃការអានរបស់កុមារ។ បណ្ណាល័យឌីជីថល Let’s Read បានបង្កើនចំនួនសៀវភៅជាភាសាខ្មែរជិត៣០០ក្បាល និងមានសៀវភៅជាង២០០០ក្បាលផ្សេងទៀតក្នុង ២៣ភាសាផ្សេងគ្នា។ បណ្ណាល័យឌីជីថលនេះ បានឆក់យកឱកាសក្នុងយុគសម័យដែលទូរសព្ទស្មាតហ្វូន និងថេប្លែតកំពុងតែពេញនិយម ហើយសាធា-រណជនក៏អាចរកអានសៀវភៅតាមរយៈគេហទំព័រ និងកម្មវិធីក្នុងទូរសព្ទ Android។
ឯកឧត្តមបណ្ឌិត អុឹម កុច រដ្ឋលេខាធិការក្រសួងអប់រំ យុវជន និងកីឡា ជាមួយនឹងអ្នកស្រី មេឡូនី លីនប៊ឺក តំណាងអង្គការមូលនិធិអាស៊ីប្រចាំកម្ពុជា បានផ្តល់កិត្តិយសចូលរួមបើកកម្មវិធី BookLab ដែលប្រព្រឹត្តទៅរយៈពេល២ថ្ងៃពេញ។
ឯកឧត្តមបណ្ឌិត អុឹម កុច បានមានប្រសាសន៍ថា៖ «ក្រសួងអប់រំ គាំទ្រជាខ្លាំងទៅលើការងាររបស់អង្គការមូលនិធិអាស៊ី ដែលមានគោលដៅស្របទៅនឹងគោលដៅរបស់រាជរដ្ឋាភិបាល ក៏ដូចជាក្រសួងផ្ទាល់ ក្នុងការពង្រឹងសមត្ថភាពធនធានមនុស្ស បង្កើតធនធានអប់រំដែលមានគុណភាពខ្ពស់ ជាពិសេសជំរុញទម្លាប់នៃការអាន និងការគិតពិចារណាល្អិតល្អន់ (critical thinking)របស់កុមារតូចៗនៅកម្ពុជា។»
អ្នកស្រី មេឡូនី លីនប៊ឺក ក៏បានលើកឡើងថា៖ «សៀវភៅរឿងថ្មីៗដែលនឹងត្រូវផលិតក្នុងកម្មវិធី BookLab នេះទាក់ទងទៅនឹងប្រធានបទផ្សេងៗ ដូចជា ភាពក្លាហាន ភាពតស៊ូអត់ធ្មត់ ក៏ដូចជាមិត្តភាព និងភាពច្នៃប្រឌិត។ រឿង “សៀវភៅវេទមន្ត” និយាយពីក្មេងប្រុសម្នាក់ឈ្មោះ “វិទូ” ដែលទើបដឹងថា មូលហេតុដែលធ្វើឱ្យប្អូនស្រីរបស់ខ្លួនមានចំណេះដឹងច្រើន គឺដោយសារតែនាងមានទម្លាប់អានសៀវភៅជារៀងរាល់ថ្ងៃ។ នៅពេលដែលវិទូចាប់ផ្តើមអានសៀវភៅប្រចាំថ្ងៃជំនួសឱ្យការលេងវីដេ-អូហ្គេម វិទូមានការយល់ដឹងច្រើនជាងមុន ហើយអាចដោះស្រាយចំណោទបញ្ហា និងអាចចូលរួមប្រកួតប្រជែងចំណេះដឹងនៅក្នុងសាលា ព្រមទាំងទទួលបានរង្វាន់ទៀតផង។ នេះគ្រាន់តែជារឿងមួយក្នុងចំណោមរឿងល្អៗផ្សេងទៀត ដែលមានសារអប់រំល្អ អាចទាក់ទាញចំណាប់អារម្មណ៍របស់ក្មេង និងជំរុញឱ្យពួកគេចាប់ផ្តើម ឬបន្តទម្លាប់អានសៀវភៅ»។
កម្មវិធី Let’s Read ត្រូវបានគាំទ្រឧបត្ថម្ភដោយក្រុមហ៊ុន Smart Axiata ដែលជាក្រុមហ៊ុនទូរគមនាគមន៍នាំមុខគេនៅប្រទេសកម្ពុជា។ លោក Jonathan Yap ជាប្រធានផ្នែកគ្រប់គ្រង និងកិច្ចការសហការ នៃក្រុមហ៊ុន Smart Axiata បានថ្លែងថា៖ «សៀវភៅឌីជីថល ដែលបង្កើតចេញពីកម្មវិធី BookLab មុនៗ ទាក់ទាញអ្នកអាននៅកម្ពុជាជាច្រើននាក់។ វាស្តែងចេញពីចំណាប់អារម្មណ៍ខ្ពស់តាមរយៈគេហទំព័រហ្វេសប៊ុក Smart for Cambodia របស់ក្រុមហ៊ុន Smart Axiata។ យើងមានការជឿជាក់ខ្ពស់ក្នុងការប្រើប្រាស់បច្ចេកវិទ្យាដើម្បីចូលរួមធ្វើឱ្យប្រសើរឡើងនូវការអប់រំ ជាពិសេសខ្លឹមសារច្នៃប្រឌិតខ្ពស់ និងមានលក្ខណៈជំរុញទឹកចិត្ត ដូចជាសៀវភៅរឿងដែលត្រូវបាន ផលិតនៅក្នុងកម្មវិធី Let’s Read នេះជាដើម។ យើងរំពឹងថា នឹងមានក្មេងៗច្រើនបន្ថែមទៀតប្រើប្រាស់បណ្ណា- ល័យឌីជីថលមួយនេះដើម្បីបង្កើតទម្លាប់អានសៀវភៅ និងចាប់ផ្តើមការស្រមើស្រមៃខ្ពស់”។
គម្រោង Let’s Read គឺជាកិច្ចផ្តួចផ្តើមឡើងដោយអង្គការមូលនិធិអាស៊ី ហើយក៏ជាគម្រោងដែលកំពុងរីកដុះដាលយ៉ាងលឿន ដោយពឹងផ្អែកទៅលើទំនាក់ទំនងយ៉ាងជិតស្និទ្ធរវាងមូលនិធិអាស៊ីដែលមានការិយាល័យនៅ១៨ប្រទេសនៅក្នុងតំបន់ ជាមួយនឹងសហគមន៍ក្នុងការកសាងបណ្ណាល័យឌីជីថល ជាភាសាក្នុងតំបន់។ សៀវភៅរឿងក្នុងបណ្ណាល័យនិយាយអំពីប្រធានបទផ្សេងៗដូចជា បរិស្ថាន ភាពចំរុះគ្នា ការតស៊ូ និងការអត់ឱន យេនឌ័រ និងស្ទែម (STEM)។ គម្រោងនេះក៏បណ្តុះនូវទម្លាប់អានដែលជួយដល់កុមារ ក្រុមគ្រួសាររបស់គាត់ និងសហគមន៍របស់គាត់ ឱ្យរីកចម្រើនក្នុងកំឡុងពេលផងដែរ។ គម្រោងនេះក៏មានគោលបំណងបន្តកសាងសហគមន៍អ្នកបង្កើតសៀវភៅ អ្នកបកប្រែសៀវភៅដែលចង់ឃើញអនាគតដែលពោរពេញទៅដោយសៀវភៅកុមារ។
អំពីអង្គការមូលនិធិអាស៊ី
អង្គការមូលនិធិអាស៊ី គឺជាអង្គការអភិវឌ្ឍន៍អន្តរជាតិមួយដែលមិនស្វែងរកប្រាក់ចំណេញ ដែលចូលរួមក្នុងការលើកកម្ពស់ការរស់នៅរបស់ប្រជាជននៅជុំវិញទ្វីបអាស៊ី។ អង្គការមូលនិធិអាស៊ីមានបទពិសោធន៍ការជាងប្រាំមួយទសវត្សរ៍ ដែលការងាររបស់អង្គការមូលនិធិអាស៊ីភាគច្រើនផ្តោតទៅលើគោលដៅធំៗចំនួនប្រាំ រួមមាន ការពង្រឹងអភិបាលកិច្ច ការលើកកម្ពស់ស្ត្រី ការលើកកម្ពស់កលានុវត្តភាពសេដ្ឋកិច្ច ការលើកកម្ពស់បរិស្ថាន និងការលើកកម្ពស់កិច្ចសហប្រតិបតិ្តការនៅក្នុងតំបន់។ សម្រាប់ព័ត៌មានបន្ថែម សូមចូលទៅកាន់គេហទំព័ររបស់អង្គការមូលនិធិអាស៊ី www.asiafoundation.org។
