គណៈប្រតិភូ​ខេត្តកំពត ចូលរួម​ទទួល​ជ័យលាភី​ទីក្រុង​ទេសចរណ៍​ស្អាត​អាស៊ាន​នៅ​ប្រទេស​ព្រុយ​ណេ

សូម​អបអរសាទរ !
​ជា​មោទនភាព​ថ្មី​មួយទៀត​សម្រាប់​កម្ពុជា​យើង ដោយ​ទីក្រុង​ទេសចរណ៍​របស់​កម្ពុជា ចំនួន៣ រួមមាន ទីក្រុង​កំពត ខេត្តកំពត ទីក្រុង​តាខ្មៅ ខេត្តកណ្ដាល និង​ខណ្ឌដូនពេញ (​រាជធានី​ភ្នំពេញ​)​ បានទទួល​ជ័យលាភី​ទីក្រុង​ទេសចរណ៍​ស្អាត​អាស៊ាន នៅក្នុង​ពិធី​ចែក​ជ័យលាភី​រង្វាន់​ទេសចរណ៍​អាស៊ាន ដែល​បាន​ប្រព្រឹត្តទៅ​កាលពី​រសៀល​ថ្ងៃទី​១៦ ខែមករា ឆ្នាំ​២០២០ នាឱកាស​វេទិកា​ទេសចរណ៍​អាស៊ាន ឆ្នាំ​២០២០​នៅ​រដ្ឋធានី​បង់​ដារ​សេរី​បេ​ហ្គា​វ៉ាន​ប្រទេស​ព្រុយ​ណេ​។​

​រដ្ឋមន្ត្រី​ទេសចរណ៍​អាស៊ាន បានប្រគល់​រង្វាន់​ទីក្រុង​ទេសចរណ៍​ស្អាត​អាស៊ាន ដល់ទី​ក្រុង​ទេសចរណ៍ ចំនួន ២១ នៅក្នុង​តំបន់​។ ក្នុងនោះ​ម្ចាស់​ជ័យលាភី នៃ​ទីក្រុង​កំពត ខេត្តកំពត​ត្រូវបាន ដឹកនាំ​ចូលរួម​ទទួល​ដោយ ឯកឧត្តម ជាវ តា​យ អភិបាល​នៃ​គណៈ​អភិបាលខេត្ត ឯកឧត្តម ជឹ​ង ផល្លា​ប្រធាន ក្រុមប្រឹក្សា​ខេត្ត​។​

​ការប្រគល់​រង្វាន់​នេះ​ធ្វើឡើង​ដើម្បី​ពង្រឹង​ភាព​ឲ​ឲ​ទាក់ទាញ និង​បង្កើន​ភាព​ប្រកួតប្រជែង​របស់​ទីក្រុង​ទេសចរណ៍​អាស៊ាន ពង្រឹងគុណភាព​ផលិតផល និង​សេវាកម្ម​ទេសចរណ៍​នៅក្នុង​តាម​បណ្តា​ទីក្រុង​របស់​អាស៊ាន ក៏ដូចជា​ជម្រុញ​ដល់​ការ​រៀបចំ​មជ្ឈដ្ឋាន​រស់​នៅ​របស់​ប្រជាពលរដ្ឋ​តាម​បណ្តា​ទីក្រុង​ឲ្យ​កាន់តែ​ប្រសើរឡើង ព្រមទាំង​ចូលរួម​យ៉ាង​មាន​ប្រសិទ្ធភាព​ដល់​ការអភិវឌ្ឍ​ទីក្រុង​ប្រកបដោយ​និរន្តរភាព​។​

​គួរ​បញ្ជាក់ថា ស្តង់ដា​ទីក្រុង​ទេសចរណ៍​ស្អាត​អាស៊ាន​ត្រូវបាន​ដឹកនាំ​រៀបចំ​ដោយ​ក្រសួងទេសចរណ៍​កម្ពុជា និង​គណៈកម្មាធិការ​ជាតិ​វាយតម្លៃ​ទីក្រុង​ស្អាត តាំងពី​ឆ្នាំ ២០១១ ដោយមាន​ការគាំទ្រ​ពី​រដ្ឋមន្ត្រី​ទេសចរណ៍​អាស៊ាន ហើយ​ស្តង់​ដារ​​នេះ​ត្រូវ​បានអនុម័ត និង​ដាក់​ឲ្យ​អនុវត្ត​ជា​ផ្លូវការ កាលពី​វេទិកា​ទេសចរណ៍​អាស៊ាន ឆ្នាំ​២០១៥​។ គណៈកម្មាធិការ​ជាតិ​វាយតម្លៃ​ទីក្រុង​ស្អាត​បាន​នឹង​កំពុង​ជម្រុញ​ចលនា​ប្រឡងប្រណាំង​ទីក្រុង​ស្អាត ទាំង​នៅ​កម្រិត​ថ្នាក់ជាតិ និង​កម្រិត​តំបន់​អាស៊ាន សំដៅ​ចូលរួម​ដល់​ការ​ជម្រុញ​ការកសាង​ទីក្រុង​ឆ្លាត​វៃ (Smart City) នៅក្នុង​តំបន់​អាស៊ាន​។

នេះ​ឆ្លុះបញ្ចាំង​ពី​តួនាទី និង​ការចូលរួម​របស់​កម្ពុ​ជា​ក្នុង​តំបន់ ក្រោម​ការដឹកនាំ​ដ៏​ឈ្លាសវៃ​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​។​
(​អរគុណ សន្តិភាព​)
​អត្ថ​ប​ទៈ លោក សាយ យាវ​