​យុវតី​ជ័យលាភី​អាហារូបករណ៍ ១០០​នាក់ មកពី​តំបន់​ជនបទ​ក្នុងប្រទេស​កម្ពុជា បានបញ្ចប់​កម្មវិធី​កសាង​សមត្ថភាព​យុវតី និង​ភាពជា​អ្នកដឹកនាំ​

រាជធានី​ភ្នំពេញៈ ថ្ងៃទី ២៣ ខែ ធ្នូ ឆ្នាំ ២០១៩ – ក្រុមហ៊ុន Shiseido Asia Pacific និង​អង្គការ​មូលនិធិ​អាស៊ី បានបញ្ចប់​កម្មវិធី​កសាង​សមត្ថភាព​យុវតី និង​ភាពជា​អ្នកដឹកនាំ (​ហៅ​កាត់​ថា GLL) ប្រកបដោយ​ជោគជ័យ​។ កម្មវិធី​នេះ គឺជា​កម្មវិធី​ដែល​ផ្ដល់​ភាព​អង់អាច​ដល់​យុវតី​វ័យក្មេង​ជួប​ការលំបាក ក្នុងពេលដែល​យុវតី​ជាច្រើន​នាក់​បាន​បោះបង់ចោល​ការសិក្សា ក្នុង​គោលបំណង​ស្វែងរក​ការងារ​ធ្វើ ដើម្បី​ទទួលបាន​ប្រាក់កម្រៃ​។ យុវតី​ក្រុម​ដំបូង​ចំនួន ១០២ នាក់ ក្នុងប្រទេស​កម្ពុជា បានបញ្ចប់​កម្មវិធីរ​យៈ​ពេល ៨ ខែ​នេះ ជាមួយនឹង​លទ្ធផល​សិក្សា​គួរឱ្យកត់សម្គាល់ និង​ទទួលបាន​ការអភិវឌ្ឍ​ជំនាញ​ទន់​សំខាន់ៗ​ជាច្រើន​។ ជាមួយនឹង​ជោគជ័យ​នៃ​ការអនុវត្ត​សាកល្បង​កម្មវិធី GLL នេះ ក្នុង​ឆ្នាំ ២០២០ កម្មវិធី​នេះ​គ្រោង​នឹង​ពង្រីក​ទៅកាន់​វិទ្យាល័យ​បន្ថែមទៀត​ក្នុងប្រទេស​កម្ពុជា ក៏ដូចជា​ទៅកាន់​បណ្ដា​ប្រទេស​ដទៃទៀត​នៅ​អាស៊ីអាគ្នេយ៍​ក្នុង​រយៈពេល​វែង​។ សូម​អាន​បន្ថែម​អំពី​កម្មវិធី​នេះ​ត្រង់ចំណុច​នេះ​។​

​កម្មវិធី​សាកល្បង​ដែល​ដំណើរការ​ពី​ខែ ឧសភា ដល់​ខែ ធ្នូ ឆ្នាំ ២០១៩ សម្រាប់​ថ្នាក់​ទី ១០ – ១២ នៅ វិទ្យាល័យ​នរោត្តម ក្នុង​ខេត្តព្រៃវែង ដែលជា​ខេត្ត​ជនបទ បានទទួល​លទ្ធផល​គួរឱ្យកត់សម្គាល់​ដូចជា​៖
●​ ​សិស្ស​រៀន​ថ្នាក់​ទី ១២ ៩៤% បាន​ប្រឡង​ជាប់​ការប្រឡង​មធ្យមសិក្សា​ទុតិយភូមិ បើ​ធៀប​នឹង​មធ្យមភាគ​ទូទាំងប្រទេស ៦៨%
●​ ​សិស្ស​ថ្នាក់​ទី ១២ ចំនួន ២០% បានទទួល​អាហារូបករណ៍ ដើម្បី​សិក្សា​នៅតាម​សាកលវិទ្យាល័យ​អន្តរជាតិ​
●​ ​សិស្ស​ទទួលបាន​អាហារូបករណ៍​ថ្នាក់​ទី ១០ និង​ទី ១១ ១០០% បាន​ឡើង​ថ្នាក់​ប្រកបដោយ​ជោគជ័យ
​បន្ថែម​ពីលើ​ការគាំទ្រ​ដល់​ការសិក្សា កម្មវិធី GLL បាន​ផ្ដួចផ្ដើម​យកចិត្តទុកដាក់​លើ​ការអភិវឌ្ឍ​ជំនាញ​ទន់ សំខាន់ៗ ដែល​នេះ​គឺជា​លក្ខខណ្ឌ​មួយ ដែល​និយោជក​នៅ​កម្ពុជា​ចាត់ទុកថា​ចាំបាច់ ដើម្បីឱ្យ​យុវជន​អា​ចរក​ការងារ​ធ្វើបាន​ប្រកបដោយ​អត្ថន័យ​។

ជ័យលាភី​ដែល​ទទួលបាន​អាហារូបករណ៍ ត្រូវបាន​លើកទឹកចិត្ត​ឱ្យ​អភិវឌ្ឍ​ជំនាញ​ទន់​មួយចំនួន ដូចជា ជំនាញ​ដោះស្រាយ​បញ្ហា ជំនាញ​ត្រិះរិះ​ពិចារណា​ល្អិតល្អន់ ជំនាញ​ដឹកនាំ ជំនាញ​ប្រាស្រ័យ​ទាក់ទង និង​ជំនាញ​ធ្វើការ​ងារ​ជា​ក្រុម តាមរយៈ​សេណា​រី​យ៉ូ ឬ​គម្រោង​សកម្មភាព​ពិតៗ ដែល​ត្រូវបាន​រៀបចំឡើង ដើម្បី​នាំមក​នូវ​ការផ្លាស់ប្តូរ​ជា​វិជ្ជមាន​ដល់​សាលារៀន និង​សហគមន៍​របស់​ពួកគេ​។ នៅក្នុង​ពិធី​បិទ​បញ្ចប់​កម្មវិធី​កាលពីពេល​ថ្មីៗ​នេះ យុវតី​ដែល​ទទួលបាន​អាហារូបករណ៍​បាន​ឡើង​បង្ហាញ​ពី​គម្រោង​សកម្មភាព​របស់​ពួកគេ និង​បានទទួល​ដំបូន្មាន​ពី​អ្នកគ្រប់គ្រង​ជាន់ខ្ពស់​សំខាន់ៗ​របស់​ក្រុមហ៊ុន Shiseido រួមទាំង​ពី​លោក Jean-Philippe Charrier ប្រធាន និង​នាយក​ប្រតិបត្តិ​របស់​ក្រុមហ៊ុន Shiseido Asia Pacific ផងដែរ​។​

គម្រោង​សកម្មភាព​ដែល​ទទួលបាន​ជ័យលាភី​ក្រោម​ប្រធានបទ “​ក្លឹប​សិក្សា​” គឺជា​គម្រោង​ដែល​បង្កើតឡើង​ដោយ​ជ័យលាភី​អាហារូបករណ៍​មួយក្រុម មាន​គ្នា ១០ នាក់ ក្នុង​គោលបំណង​ផ្ដល់​ការ​បំប៉ន​មុខវិជ្ជា​គណិតវិទ្យា វិទ្យាសាស្ត្រ អំ​ណាន និង​សរសេរ ដល់​សិស្ស​វិទ្យាល័យ​ចំនួន ៧០ នាក់ និង​កុមារ​តូចៗ​នៅក្នុង​សហគមន៍​។ ក្នុង រយៈពេល ២ ខែ កន្លះ យុវតី​ដែល​ទទួលបាន​អាហារូបករណ៍​ទាំងនេះ​បានសម្រេច​លើសពី​គោលដៅ​ដែល​បានគ្រោង​ទុក និង​បាន​ជួយ​បង្រៀន​​សរុប ១១០ ដង ឬ​ប្រមាណ ២២០ ម៉ោង​។ គម្រោង​សកម្មភាព​ដែល​គួរឱ្យកត់សម្គាល់​ផ្សេងទៀត ដូចជា គម្រោង​កែច្នៃ​សំណល់​ប្លា​ស្ទិ​ក​ជា​សម្ភារ​សម្រាប់​សួនច្បារ​ក្នុង​សាលារៀន និង​គំនិត​ផ្ដួចផ្ដើម​ច្នៃ ប្រឌិត​ប្រើប្រាស់​សិល្បៈ​ដើម្បី​អប់រំ​ផ្សព្វផ្សាយ​សារ​អប់រំ​ជាដើម​។
​យុវតី ប៉ាវ មករា ប្រធាន​គម្រោង​សកម្មភាព​ដែល​ទទួលបាន​ជ័យលាភី​ពី​ការប្រកួតប្រជែង​នេះ បាន​និយាយថា​៖ “​សមាជិក​ក្រុម​របស់ខ្ញុំ និង​ខ្លួន​ខ្ញុំ​ផ្ទាល់ មាន​ទឹកចិត្ត​រំភើប​យ៉ាងខ្លាំង​ដែល​បានឈ្នះ​ជ័យលាភី​លេខ១​។ យើង​នឹង​បន្ត​ស្ម័គ្រចិត្ត​ចំណាយពេល​វេលា​របស់​យើង ដើម្បី​ជួយ​បង្រៀន​កុមារ​នៅក្នុង​សហគមន៍ និង​មិត្តភក្តិ​របស់​យើង នៅក្នុង​សាលារៀន​។ កម្មវិធី GLL នេះ​បាន​ផ្ដល់នូវ​កម្លាំងចិត្ត​ពិតប្រាកដ​មកដល់​យើងទាំងអស់គ្នា​។ កម្មវិធី​នេះ បានផ្ដល់​ឱ្យ​យុវតី​ដូចជា​ខ្ញុំ​ជាដើម​នូវ​ក្ដីសង្ឃឹម សេចក្ដីក្លាហាន និង​ជួយ​ឱ្យ​យើង​សម្រេច​គោលដៅ​របស់​យើង​។ ខ្ញុំ​សង្ឃឹមថា កម្មវិធី GLL នេះ​នឹង​បន្ត​អនុវត្ត​នៅក្នុង​សាលារៀន​របស់ខ្ញុំ ព្រមទាំង​អនុវត្ត​នៅតាម​សាលារៀន​ផ្សេងទៀត​ទូទាំងប្រទេស​កម្ពុជា​។​”

​ជាមួយនឹង​ការបញ្ចប់​កម្មវិធី​សាកល្បង​នេះ គ្រូ និង​សិស្ស​ដែល​បានទទួល​អាហារូបករណ៍​បាន​សង្កេតឃើញ​ភាពខុសប្លែក​គួរឱ្យកត់សម្គាល់​ក្នុង​សមត្ថភាព​ដឹកនាំ ជំនាញ​និយាយ​ជា​សាធារណៈ និង​ទំនុកចិត្ត​លើ​ខ្លួនឯង​របស់​ពួកគេ​។ ក្រុម​ហ៊ុន Shiseido Asia Pacific និង​មូលនិធិ​អាស៊ី នឹង​រួមគ្នា​បន្ត​ផ្ដល់​ភាព​អង់អាច​ដល់​យុវតី ក៏​ដូច​ជាំ​នាំមក​នូវ​ផល​ជះ​ជា​វិជ្ជមាន​ប្រកបដោយ​អត្ថន័យ​មក​ប្រទេស​កម្ពុជា ក្នុង​ឆ្នាំ ២០២០​។​ ​មូលនិធិ​អាស៊ី គឺជា​អង្គការ​អភិវឌ្ឍន៍​អន្តរជាតិ​មិន​រកប្រាក់​ចំណេញ ដែល​ប្ដេជ្ញា​លើកកម្ពស់​ជីវិត​រស់នៅ​របស់​ប្រជាពលរដ្ឋ​នៅ​នៅ​ទូទាំង​អាស៊ី​ដែលជា​តំបន់​ពោរពេញ​ដោយ​ភាពរស់រវើក និង​កំពុងមាន​ការអភិវឌ្ឍ​។ ផ្អែក​តាម​បទពិសោធន៍​រយៈពេល ៦ ទសវត្សរ៍ និង​ការយល់ដឹង​ស៊ីជម្រៅ​ពី​ស្ថានភាព​នៅក្នុង​ប្រទេស ការងារ​របស់​យើង​នៅក្នុង​តំបន់​នេះ​ផ្ដោត​ការយកចិត្តទុកដាក់​លើ​គោលដៅ​រួម​ចំនួន ៥—​ពង្រឹង​អភិបាលកិច្ច ផ្ដល់​ភាព​អង់អាច​ដល់​ស្ត្រី ពង្រីក​ឱកាស​សេដ្ឋកិច្ច បង្កើន​ភាព​ធន់​របស់​បរិស្ថាន និង​លើកកម្ពស់​កិច្ចសហប្រតិបត្តិការ​ថ្នាក់​តំបន់​៕

អត្ថបទៈ GLL