ពិធីបើកការដ្ឋាន​សាងសង់​ផ្លូវ​បេតុង១​ខ្សែ​ ស្ថិតនៅ​ភូមិ​សុវណ្ណ​សាគរ​ សង្កាត់​កំពង់​កណ្ដាល ​ក្រុង​កំពត​ ខេត្តកំពត​

ឯកឧត្តម ជាវ តា​យ អភិបាល​នៃ​គណៈ​អភិបាលខេត្ត ឯកឧត្តម​ ជឹ​ង ផល្លា ប្រធាន​ក្រុម ប្រឹក្សា​ខេត្ត រួម​និង​សមាជិក​សមាជិកា​ក្រុមប្រឹក្សា គណៈ​អភិបាលខេត្ត ព្រមទាំងថ្នាក់​ដឹ​នាំ​ខេត្ត មន្ទីរ​អង្គភាព​ជុំវិញ​ខេត្ត​ អាជ្ញាធរ​ និង​ប្រជាពលរដ្ឋ​ក្នុង​មូលដ្ឋាន​នៃ​ក្រុង​កំពត​។ កាលពី​រសៀល​ថ្ងៃទី​១៦​ខែកក្កដា​ឆ្នាំ​២០១៩ បាន​ចូលរួម​ក្នុង​ពិធីបើកការដ្ឋាន​សាងសង់ នូវ​ផ្លូវ​បេតុង​ចំនួន​០១​ខ្សែ​ដែល ស្ថិតនៅ​ភូមិ​សុវណ្ណ​សាគរ​សង្កាត់​កំពង់​កណ្ដាល​ក្រុង​កំពត​ខេត្តកំពត​។​

លោក​ លាង រឿន​សុធី​ អភិបាល​នៃ​គណៈ​អភិបាលក្រុង​កំពត​បានអោយដឹងថា​៖ ​ផ្លូវ​០១​ខ្សែ​ដែល​ត្រូវ​បើក​ការដ្ឋាន​សាងសង់​នាពេលនេះ​គឺជា​ផ្លូវ​លេខ​៧៣៥ ឈ្មោះថា​ផ្លូវ​សម្ដេច​ជួន​ណាត មាន​ប្រវែង​ ១,០៩១​ម៉ែត្រ​មាន​ទទឹង ១១,២​ម៉ែត្រ ធ្វើ​ពី​បេង​តុង​ស​សៃ​ដែក​កម្រាស់ ០,១៥​ម៉ែត្រ ជា​គម្រោង​របស់​រដ្ឋបាល​ខេត្តកំពត​។

​មានប្រសាសន៍​សំណេះសំណាល​ឯកឧត្តម ជាវ តា​យ អភិបាល​ខេត្តកំពត បានបញ្ជាក់ថា​សម្រាប់​ខេត្តកំពត​ចាប់ពី​ពេល​ឥឡូវនេះ​តទៅ ទាំង​រដ្ឋបាលខេត្ត​និង​ក្រុង​កំពត​ព្រមទាំង​មន្ទីរ អង្គភាព ជុំវិញ​ខេត្ត និង​ស្រុក​ផ្សេងទៀត ត្រូវតែមាន​ការងារ​ម​មារ​ញឹក​រួមចំណែក​រៀ​ប​ចំ​សោភ័ណភាព សណ្ដាប់ធ្នាប់ និង​អនាម័យ បរិស្ថាន ក្នុង​ខេត្ត អោយមាន​ភាពល្អប្រសើរ​ពិសេស នៅក្នុង​ក្រុង​កំពត​នា​ចុងឆ្នាំ​២០១៩​ខាងមុខនេះ​នឹងត្រូវ​ទទួល​រៀបចំ​ធ្វើជា​ម្ចាស់ផ្ទះ​នូវ​ព្រឹត្តិការណ៍​បុណ្យ​សមុទ្រ​លើក​ទី​៨​ជុំ​ទី​២​។

​ឯកឧត្ដមអភិបាលខេត្ត ក៏បាន​មានប្រសាសន៍ វាយតម្លៃ​ខ្ពស់​ចំពោះ​សមិទ្ធផល​ទាំងឡាយ​ដែល​រដ្ឋបាល​ក្រុង​កំពត​សម្រេចបាន​កន្លងមក​ព្រមទាំង​បានចាត់ទុក​ផ្លូវ​០១​ខ្សែ​ដែល​ត្រូវ​ដំណើរការ សាងសង់​នៅពេលនេះ គឺ​ពិត​នឹង​ក្លាយជា​សមិទ្ធ​ផល​​ថ្មី​បន្ថែមទៀត​ក្នុងចំណោម​សមិទ្ធ​នានា​របស់​ខេត្ត​ក៏ដូចជា​សមិទ្ធ​នៅ​ទូទាំងប្រទេស​ក្នុងការ​ឆ្លើយតប​ដើម្បី​បម្រើ​សេចក្ដីត្រូវការ​និង​ផលប្រយោជន៍​ប្រជាពលរដ្ឋ​និង​ផលប្រយោជន៍​សាធារណៈ​ទូទៅ​ដែល​រាជរដ្ឋាភិបាល​ក្រោម​ដឹកនាំ​ដ៏​ត្រឹមត្រូវ​របស់​សម្ដេច តេ​ជោ​ហ៊ុន សែន​ជា​ប្រមុខ​ដ៏​ឈ្លាសវៃ​តែងតែបាន​យកចិត្តទុកដាក់​ជាប្រចាំ​ពោល​គឺមាន​ផ្លូវ​គឺមាន​ក្ដីសង្ឃឹម​។​

ពាក់ព័ន្ធ​ការងារ​សាងសង់​ផ្លូវ​នេះដែរ​ឯកឧត្ដម​ ជាវ តា​យ ​អភិបាលខេត្ត ​ក៏បាន​បញ្ជាក់ថា ការកសាង​ការអភិវឌ្ឍ​អ្វីមួយ គឺ​ពិត​តែងមាន​រង​ការ​ផលប៉ះពាល់​អ្វីមួយ​មិន​ខាន​។ ដូចនេះ​នៅពេល​ក្រុមការងារ​អនុវត្ត​សាងសង់ សូម​សំណូមពរ​អោយ​អាជ្ញាធរ និង​ប្រជាពលរដ្ឋ មានការ​ចូលរួម​សហកា​រ​ជាមួយ​ក្រុមការងារ ដើម្បី​ធ្វើអោយ​ការងារ​សាងសង់​ប្រកបដោយ​រលូន​លឿន​ឆាប់រហ័ស​និង​ទទួលបាន​លទ្ធផល​ជោគជ័យ​។

​រីឯ​ចំណែក​អ្នកទទួល​ការសាងសង់​វិញ​ក៏ត្រូវ​យកចិត្តទុកដាក់​អនុវត្ត​ការងារ​សាងសង់​អោយបាន​ត្រឹមត្រូវ​តាម​បទដ្ឋាន​បច្ចេកទេស​ដើម្បី​ធានា​គុណភាព​ប្រើប្រាស់​បាន​ជាប់​យូរអង្វែង​ផងដែរ​។​ ជាមួយ​ឱកាស​នោះ​ឯកឧត្តម​អភិបាលខេត្ត​ក៏​បាន​​បន្ត​សង្កត់ធ្ងន់​ទៀតថា​សមិទ្ធផល​ជាច្រើន​ដែល​រាជរដ្ឋាភិបាល​សម្រេចបានក្នុងពេល​កន្លងមក ពិតជា​មិនអាច​កាត់ផ្តាច់​ចេញពី​កត្តា​សន្តិភាព​បានឡើយ ព្រោះ​ប្រសិនបើ​ប្រទេសជាតិ​មាន​សង្គ្រាម​យើង​មិនអាច​ដឹកនាំ​កសាង និង​អភិ​វឌ្ឍន៍​​ប្រទេស​រីកចម្រើន​ដូច​បច្ចុប្បន្ននេះ​ទេ​។​ ​

ហើយ​មូលដ្ឋានគ្រឹះ​នៃ​សុខសន្តិភាព​នេះហើយ គឺ​បានមក​ដោយសារ​ការលះបង់​អាយុជីវិត​របស់​អ្នកស្នេហាជាតិ ពិសេស​សម្តេច​តេ​ជោ ហ៊ុន សែន ដែលជា​ស្ថាបនិក​នៃ​សន្តិភាព​។ ដូច្នេះ​សូម​បងប្អូន​ត្រូវ​ចូលរួម​ការពារ​សន្តិភាព​មួយ​នេះ​អោយបាន ទោះ​ក្នុងតម្លៃ​ណាក៏ដោយ​ដើម្បី​អនាគត​យើង កូនចៅ​យើង ប្រទេសជាតិ​យើង​សម្រាប់​មនុស្ស​ជំនាន់​ក្រោយៗ​ទៀត​៕
​អត្ថ​ប​ទៈ លោក សាយ យាវ​