អភិបាល​ខេត្តកំពត​ដឹកនាំ​មន្ត្រី​ចុះជួយ​អន្តរាគមន៍​បូមទឹក​សង្គ្រោះ​ស្រូវប្រាំង​របស់​ប្រជាពលរដ្ឋ​ជាង​៥​រយ​ហិច​តា​នៅ​ស្រុក​បន្ទាយមាស​

ស្រូវប្រាំង​ជាង​ប្រាំ​រយ​ហិច​តា​នៅក្នុង​ឃុំ​ត្នោត​ចុង​ស្រង់ ស្រុក​បន្ទាយមាស ខេត្តកំពត ដែល​កំពុង​ប្រឈម​បញ្ហា​រងគ្រោះ​ដោយសារ​កង្វះ​ទឹក ត្រូវបាន​កំពុង​ជួយសង្គ្រោះ​បន្ទាន់ តាមរយៈ​រដ្ឋបាលខេត្ត​កំពត ក្នុងការ​ជំរុញ​កិច្ចសហការ​ជាមួយ​មន្ត្រី​​ជំនាញ​នៃ​មន្ទីរ​ធនធានទឹក ​និង​ឧតុនិយម​ខេត្ត​ នាំយក​នូវ​ម៉ាស៊ីន​បូម​ទឹ​ក​​ជាបឋម​​ចំនួន​៤​គ្រឿង ដើម្បី​បញ្ចៀសនូវ​ការ​ខូច​ខាត់​ដំណាំ​ស្រូវប្រាំង​របស់​ពលរដ្ឋ​។

​បន្ទាប់ពី​ទទួលបាន​នូវ​ព័ត៌មាន​ស្រូវប្រាំង របស់​ប្រជាពលរដ្ឋ​កំពុង​ប្រឈម​នឹង​បញ្ហា​ការ​ខូច​ខាត់ ដោយសារ​គ្រោះ​កង្វះ​ទឹក មិនអាច​ប្រមូល​ផល​បាន ឯកឧត្តម ជាវ តា​យ អ​ភី​បាល​នៃ​គណៈ​អភិបាល​ខេត្តកំពត នៅ​ព្រឹក​ថ្ងៃទី​១៣ ខែធ្នូ ឆ្នាំ​២០១៩ បាន​ដឹកនាំ​មន្ត្រី​ជំនាញ ពាក់ព័ន្ធ​និង​មន្ទីរ​អង្គភាព​ជុំវិញ​ខេត្ត​រួម​និង​អាជ្ញាធរ​មូលដ្ឋាន​បាន​ចុះ​ពិនិត្យ​ដល់​វាលស្រែ​ស្រូវប្រាំង​ជាក់ស្តែង​របស់​ប្រជាកសិករ និង​បាន​ជួយ​អន្តរាគមន៍​បូមទឹក​ដាក់​ស្រែប្រាំង​ដើម្បី​សង្គ្រោះ​ស្រូវ​ជូន​បងប្អូន​ប្រ​ជាពលរដ្ឋ​នៅ​ភូមិ​អ​ង្គុ​ញ ឃុំ​ត្នោត​ចុង​ស្រង់ ស្រុក​បន្ទាយមាស​ខេត្តកំពត​ដែលមាន​ទំហំ​ផ្ទៃដី​ប្រមាណ​ជាង​ប្រាំ​រយ​ហិច​តា​។

​មានប្រសាសន៍​ជួប​សំណេះសំណាល​ជាមួយ​ប្រជាពលរដ្ឋ​នាឱកាស​នោះ ឯកឧត្តម ជាវ តា​យ​ អភិបាលខេត្ត បាន​លើកឡើងថា ការគិតគូ​ពី​សុខទុក្ខ​របស់​ប្រជាពលរដ្ឋ ជា​រឿង​ចម្បង​បំផុត​សម្រាប់​ថ្នាក់ដឹកនាំ​ខេត្ត ហើយ​ការ​ចុះមក​នៅ​ថ្ងៃ​នេះ​​ក៏​មិនមែន​មក​ដើម្បី​តែ​បូម​ទឺ​ក​ជួយសង្គ្រោះ​ស្រូវ​ជូន​ប្រជាពលរដ្ឋ​មួយ​មុខ​នោះទេ គឺ​លោក​ចង់​ជួយ​ដោះស្រាយ បញ្ហា និង​ទុក​ខ្វល់​ផ្សេងៗ​នៅក្នុង​មូលដ្ឋាន​របស់​ពលរដ្ឋ​បន្ថែមទៀត​ផងដែរ​។​

​ឯកឧត្តម​បាន​បន្តថា ក្រោយពី​បាន​ស្តាប់​នូវ​ការលើកឡើង​របស់​មេឃុំ និង​សំណើរ​ប្រជាពលរដ្ឋ មាន​បញ្ហាសំខាន់​បី​ដែល​រដ្ឋបាលខេត្ត​និង​មន្ត្រី​ជំនាញ​ត្រូវ​ដោះស្រាយ​ជូន ទី​១.​ការជួយ​បូមទឹក​ដាក់​ស្រែប្រាំង ដើម្បី​សង្គ្រោះ​ស្រូវ​ឲ្យ​បាន​ទាន់​ពេលវេលា ទី​២.​ស្វែងរក​ទីផ្សារ​ស្រូវ​ឲ្យ​បាន​ថ្លៃ​ជាង​មុន ប្រធានសភា​ពាណិជ្ជកម្ម​ខេត្ត​ត្រូវ​ប្រឹង​ឲ្យ​អស់​លទ្ធភាព​ក្នុងការ​កៀងគរ​អ្នកវិនិយោគ ឬ​ឈ្មួយ​ស្រូវ​ធំៗ​ឲ្យ​បាន​ច្រើន និង​ទី​៣.​មន្ទីរ​ធនធានទឹក​និង​ឧតុនិយម​ខេត្ត​ត្រូវ​ចុះ​សិក្សា​ប្រពន្ធ​ប្រ​ឡាយ​​ទឺ​ក​ឲ្យ​បានច្បាស់លាស់ តើ​ត្រូវ​ស្តារ​តាម​ការស្នើ​របស់​ពលរ​ដ្ឋ​ឬ​ធ្វើយ៉ាងណា​។

តែ​ទោះបីយ៉ាងណាក៏ដោយ ឯកឧត្តម ជាវ តា​យ ​បានស្នើ​ឲ្យ​ប្រជាពលរដ្ឋ​ធ្វើ​ស្រូវប្រាំង​ឬ​ស្រូវពូជ​ប្រភេទ​(​អ៊ី​អ៊ែ​) តែ​២​ដង​បាន​ហើយ​ក្នុងឆ្នាំនេះ ព្រោះ​ទឺ​ក​ទន្លេ​វិញ​ទេ​របស់​វៀតណាម​ដែល​ហូរ​មក​ស្រោចស្រប់ ស្រុក​បន្ទាយមាស បាន​ស្រក់​ចុះ​ខ្លាំង​ខុសពី​ប្រក្រតី ខណៈដែល​ការព្យាករណ៍​ថា​កម្ពុជា​អាច​នឹង​ប្រឈម​អូសបន្លាយ​ភាព​គ្រោះ​រាំង​ស្រួត​មាន​រយៈពេល​យូរ​។ ម្យ៉ាងទៀត​ត្រូវ​ពិចារណា​មើល ថា​តើ​ការធ្វើ​ស្រែប្រាំង​ចំណេញ​ឬ​អត់​? ឬ​ត្រូវ​ដាំ​ដំណាំ​អ្វី ដែល​ប្រើ​ទឹក​តិច ហើយ​ចំណេញ​បាន​ច្រើនជាង​ដាំ​ដំណាំ​ស្រូវ​។

-​សូមបញ្ជាក់ថា​តាម​របាយការណ៍​របស់​អភិបាលស្រុក​បន្ទាយមាស លោក មួង នឿន នាឱកាស​នោះបាន​ឲ្យ​ដឹងថា ផ្ទៃដី​ស្រែប្រាំង​ដែល​កំពុង​ប្រឈម​នឹង​ការខូចខាត​ដោយសារ​កង្វះ​ទឹក​មាន​ចំនួន​បី​ភូមិ នៅ​ឃុំ​ត្នោត​ចុង​ស្រង់ លើ​ផ្ទៃដី​ដាំ​ដុះ​សរុប​ប្រមាណ ៥១២​ហិកតា​។ មកដល់​បច្ចុប្បន្ន​ដំណាំ​ស្រូវប្រាំង​មិនទាន់​រង​ការ​ខូច​ខាត់​នៅឡើយ​ទេ ប៉ុន្តែ​ដោយសារ​ប្រជាពលរដ្ឋ​គ្មាន​លទ្ធភាព​ក្នុងការ​បូមទឹក​ដាក់​ស្រែ ទើប​ស្នើសុំ​ដល់​រដ្ឋបាលខេត្ត គាត់​ដូច​មន្ត្រី​ជំនាញ និង​អ្នកពាក់ព័ន្ធ​ជួយ​អន្តរាគមន៍​សង្គ្រោះបន្ទាន់​ផងដែរ​៕
​អត្ថ​ប​ទៈ លោក សាយ យាវ​