​ពិធី​ចែក​សាច់គោ​គួរ​បាន​ក្នុង​ថ្ងៃបុណ្យ​រ៉​យ៉ា​ហា​ជី​ដល់​ប្រជាពលរដ្ឋ​ខ្មែរឥស្លាម​

កាលពី​ព្រឹក​ថ្ងៃទី​១៣ ខែសីហា ឆ្នាំ​២០១៩ នៅ​ភូមិ​កំពង់កែស​ឃុំ​ត្រពាំង​សង្កែ​ស្រុក​ទឹកឈូ​ខេត្តកំពត។ អង្គការ​មូលនិធិ​អភិវឌ្ឍន៍​មុ​ស្ល៉ី​ម​កម្ពុជា ក្រោម​កិច្ចសហការ​ជំនួយ​ឧបត្ថម្ភ​របស់​អង្គការ​មូល​ធិ​និ​ទួរគី​ឌី​យ៉ា​នេ​តនៃ​ប្រទេស​ទួរគី បានរៀបចំ​ធ្វើ​ពិធី​ចែក​សាច់គោ​គួរ​បាន​ក្នុង​ថ្ងៃបុណ្យ​រ៉​យ៉ា​ហា​ជី​ដល់​ប្រជាពលរដ្ឋ​ខ្មែរឥស្លាម​ក្រោម​វត្តមាន​ចូលរួម​ពី​សំណាក់​ឯកឧត្ដម លី សារី សមាជិក​ព្រឹទ្ធសភា ឯកឧត្ដម ម៉ាត់ សេត ​តំណាង​រា​ស្ត​មណ្ឌល​កំពត​និង​ជា តំណាង​ឯកឧត្ដម​អូស្មាន ហាស្សាន់ ​ប្រធាន​អង្គការ​មូលនិធិ​អភិវឌ្ឍន៍​មុ​ស្ល៉ី​ម​​កម្ពុជា​ព្រមទាំង​ថ្នាក់ដឹកនាំ​ក្នុង​រាជរដ្ឋាភិបាល​មួយចំនួនទៀត​ផងដែរ​។​

​ឯកឧត្ដម​ ម៉ាត់ សេត តំណាង​ឯកឧត្ដម​អូស្មាន ហាស្សាន់​ប្រធាន​អង្គការ​មូលនិធិ​អភិវឌ្ឍន៍​មុ​ស្ល៉ី​ម​កម្ពុជា​បានអោយដឹងថា​៖​គម្រោង​ចែក​សាច់គោ​គួរ​បាន​ក្នុងឱកាស​ថ្ងៃបុណ្យ​រ៉​យ៉ា​ហា​ជី​សម្រាប់​ប្រជាពលរដ្ឋ​ខ្មែរឥស្លាម​នៅ​កម្ពុជា​នា​ពេល​នេះ​​គឺជា​គម្រោង​លើក​ទី​៧​ក្រោម​ជំនួយ​ឧបត្ថម្ភ​របស់​អង្គការ​ទួរគី​ឌី​យ៉ា​នេ​ត​ប្រទេស​ទួរគី​តាមរយៈ​អង្គការ​មូលនិធិ​អភិវឌ្ឍន៍​មុ​ស្ល៉ី​ម​កម្ពុជា ដោយ​ផ្ដោតលើ​ទីតាំង​កន្លែង​គោលដៅ​បែងចែក​មាន​ចំនួន​១៩​រាជធានី​-​ខេត្ត។  ក្នុងនោះ​គោលដៅ​សម្រាប់​​នៅក្នុង​ខេត្តកំពត​មាន​គោ​ដែល​ត្រូវ​បែងចែក​ចំនួន​១០០​ក្បាល សម្រាប់​បែងចែក​មាន​ខេត្ត​ចំនួន​៦ គឺ​ខេត្តកំពត ខេត្ត​កែប ខេត្ត​ព្រះសីហនុ ខេត្តកំពង់ស្ពឺ ខេត្តតាកែវ​និង​ខេត្តកោះកុង ហើយ​ក្នុងនោះដែរ​ខេត្តកំពត ត្រូវបាន​ទទួល​គោ​ចំនួន​៧៥​ក្បាល​សម្រាប់​បែងចែក​ទៅតាម​ភូមិ ឃុំ ក្នុង​ខេត្ត​ផងដែរ​។

មានប្រសាសន៍​សំណេះសំណាល​ក្នុងឱកាស​នោះដែរ ឯកឧត្ដម លី សារី សមាជិក​ព្រឹទ្ធសភា បាន​លើក​បញ្ជាក់ថា​៖ រាជរដ្ឋាភិបាល​កម្ពុជា​យើង ក្រោម​ការដឹកនាំ​ប្រកបដោយ​គតិបណ្ឌិត របស់​សម្ដេច​តេ​ជោ ហ៊ុន សែន​ ជា​នាយករដ្ឋមន្ត្រី គឺ​បាន​ដឹកនាំ​ប្រទេស នាំមក​នូវ សុខសន្តិភាព​ពេញ​បរិបូណ៌​និង​មានការ​អភិវឌ្ឍ​រីកចម្រើន ព្រមទាំង​បាន​នាំមក​នូវ​សុខដុម​ប​នីយកម្ម​សាសនា ដោយមាន​ការសម្របសម្រួល​ជូន​ប្រជាពលរដ្ឋ​នូវ​ការគោរព​ជំនឿ​សាសនា​រៀងៗ​ខ្លួន និង​ប្រ​ជា​ពល​រដ្ឋ​មានការ​រស់នៅ​ប្រកបដោយ​សុខដុម​រម្យ​នា​ក្នុង​គ្រួសារ​។

ឯកឧត្ដម ​លី សារី ក៏បាន​ពាំនាំ​មក​នូវ​ការសាកសួរ​សុខទុក្ខ​ពី​សំណាក់​ថ្នាក់ដឹកនាំ​កំពូល​នៃ​ស្ថ​ប័ន​ជាតិ​ទាំងបី​ជូន​ចំពោះ​ប្រជាពលរដ្ឋ និង​បាន​ថ្លែងអំណរគុណ​កោតសរសើរ​ដល់​បងប្អូន​សាសនិក​ខ្មែរឥស្លាម​នៅ​ទីនោះ​ដែល​តែងតែមាន​ការគាំទ្រ​និង​ជំនឿ​ជឿជាក់​លើ​ការដឹកនាំ​ដ៏​ត្រឹមត្រូវ​របស់​រាជរដ្ឋាភិបាល​ដែលមាន​សម្ដេច​តេ​ជោ ហ៊ុន សែន​ ជា​ប្រមុខ​ដឹកនាំ​ដ៏​ឈ្លាសវៃ​។

ឯកឧត្ដម ​លី សារី​ ក៏បាន​ថ្លែងអំណរគុណ​និង​កោតសរសើរ​ផងដែរ ចំពោះ​អង្គការ​ទួរគី​ឌី​យ៉ា​នេ​តនៃ​ប្រទេស​ទួរគី ដែល​តែងតែ​ធ្វើ​អំណោយ​សប្បុរសធម៌​ដល់​ប្រជាពលរដ្ឋ​សាសនិក​ខ្មែរឥស្លាម ពិសេស​ការធ្វើ​អំណោយ​សាច់គោ​ដល់​ប្រជាពលរដ្ឋ​ក្រីក្រ​ក្នុង​ពិធីបុណ្យ រ៉​យ៉ា​ហា​ជី​ពេលនេះ​គឺជា​អំពើ​កុសលផល​បុណ្យ​ដ៏​ប្រពៃ​សម្រាប់​បុណ្យ​មួយ​នេះ​ផងដែរ​។

ឯកឧត្ដម ​លី សារី ក៏បាន​ផ្ដាំផ្ញើ​បងប្អូន​ប្រជាពលរដ្ឋ​ទាំងអស់​ត្រូវ​អប់រំ​កូនចៅ​ពិសេស​យុវជន​ត្រូវតែ​ចូលរួម​ថែរក្សា​នូវ​សមិទ្ធ​អ្វីៗ​មាន​សព្វថ្ងៃនេះ​ពិសេស​សុខសន្តិភាព​នៅ​កម្ពុជា​យើង​ដែល​រកបាន​មក​ដោយ​លំបាក និង​ក៏ត្រូវ​ចូលរួម​អនុវត្ត​នូវ​គោលនយោបាយ​ភូមិ​ឃុំ​មាន​សុវត្ថិភាព​របស់​រាជរ​ដ្ឋា​ភិ​បាល​អោយបាន​ខ្ជាប់ខ្ជួន​ផងដែរ​ពោលគឺ​គ្មាន​ចោរកម្ម គ្មាន​ល្បែង​ស៉ី​សង​និង​គ្មាន​គ្រឿងញៀន​៕
​អត្ថ​ប​ទៈ លោក សាយ យាវ​