មន្ត្រី​ជំនាញ​ថា​ឆ្នាំ​២០១៩​សន្ទុះ​កំណើន​ភ្ញៀវទេសចរ​ខេត្តកំពត​កើនឡើង​ខ្ពស់​

មន្ត្រី​ជំនាញ​បាន​លើកឡើងថា​នៅក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ កំណើន​ភ្ញៀវ​ទេស​ជាតិ និង​អន្តរជាតិ មក​ទស្សនា​ខេត្តកំពត​កើន​ឡើងជា​លំដាប់​ក្នុង​រង្វង់​អត្រា​មិន​លើសពី​៣​ភាគរយ​ទេ​។ ប៉ុន្តែ​បើ​ផ្អែក​តាម​បាយ​ការណ៍​ភ្ញៀវទេសច​រយៈពេល​៦​ខែ​ដើមឆ្នាំ​២០១៩​នេះ ភ្ញៀវ​ជាតិ​និង​អន្តរជាតិ​កើនឡើង​ក្នុង​អត្រា​ជាង​២០​ភាគរយ ហើយ​បើតាម​ការព្យាករណ៍​ថា កំណើន​ភ្ញៀវ​នឹង​បន្ត​កើនឡើង​រហូត​។

ប្រធាន​មន្ទីរ​ទេសចរណ៍​ខេត្តកំពត លោក សយ ស៊ី​ណុល បាន​ប្រាប់​ឲ្យ​ដឹងថា នៅក្នុង​រយៈពេល​ចុងក្រោយ​នេះ ខេត្តកំពត​មាន​ប្រជាប្រិយ​ទាក់ទាញ​យ៉ាងខ្លាំង មិន​ចាញ់​បណ្តា​ខេត្ត​ជាប់​ឆ្នេរសមុទ្រ​ផ្សេងៗ​របស់​កម្ពុជា​នោះទេ​។ ​ខេត្តកំពត​មាន​សក​ត្តា​នុព​ល​ខ្លាំង​លើ​គ្រប់​វិស័យ កសិកម្ម ឧស្សាហកម្ម ដេ​ដ្ឋ​កិច្ច ពិសេស​វិស័យ​ទេសចរ​ដ៏​សំបូរបែប ហើយ​កំពត​ត្រូវបាន​រាជរដ្ឋាភិបាល​កំណត់ថា ជា​ខេត្ត​ទេសចរណ៍វប្បធម៌​ធម្មជាតិ និង​ក​សិ​ទេសចរណ៍​។


​លោក​ប្រធាន​មន្ទីរ​បាន​បន្តទៀតថា ក្រោម​កិច្ចខិតខំ​ប្រឹងប្រែង​រប​ស់​រដ្ឋបាលខេត្ត មន្ទីរជំនាញ​នឹង​ពាក់ព័ន្ធ ពិសេសឯកឧត្តម ជាវ តា​យ អភិបាល​ខេត្តកំពត ក្នុង​កិច្ចការងារ​ជំរុញ​ការអភិវឌ្ឍន៍ និង​កែលម្អ​សោ​ភាព​ក្រុង នៅ​ឆ្នាំ​២០១៨ ខេត្តកំពត​ទទួលបាន​ភ្ញៀវ​ទេសចរណ៍ សរុប​ចំនួន ១,៦២៩,៥៣០​នាក់ កើនឡើង ១,៨​ភាគរយ ធៀប​ក្នុង​រយៈពេល​ដូចគ្នា​ក្នុង​ឆ្នាំ ២០១៧​។ ក្នុងនោះ​ភ្ញៀវទេសចរ​ជាតិ​មាន​ចំនួន ១,៤៦១, ៧៩៥​នាក់ កើនឡើង ១.៦២​ភា​គា​រយ និង​ភ្ញៀវ​​​ទេសចរណ៍​អន្តរជាតិ មាន​ចំនួន ១៦៧,៧៣៥​នាក់ កើនឡើង​៣.៤៣​ភាគរយ​។


ដោយឡែក​រយៈពេល​៦​ខែ ដើមឆ្នាំ​២០១៩ កន្លងមកនេះ ខេត្តកំពត​ទទួលបាន​ភ្ញៀវ​ទេសចរណ៍ សរុប​ចំនួន ១,០៩១,៣២០​នាក់ កើនឡើង​២៧,២៦​ភាគរយ​ធៀប​នឹង​រយៈពេល​ដូចគ្នា​នៅ​ឆ្នាំ២០១៨។ ក្នុងនោះ​ភ្ញៀវ​ទេសចរណ៍​ជាតិ មាន​ចំនួន ៩៧៨,០៤៥ នាក់ កើនឡើង ២៧.៨៨​ភាគរយ និង​ភ្ញៀវទេសចរ​អន្តរជាតិ មាន​ចំនួន​១១៣,២៧៥​នាក់ កើនឡើង​២១.១៧​ភាគរយ។

លោក សយ ស៊ី​ណុល ​បាន​បញ្ជាក់ថា​អត្រា​នៃ​កំណើន​ភ្ញៀវទេសចរ​នៅ​រយៈពេល​៦​ខែ​ដើមឆ្នាំ​២០១៩​នេះ ជា​អត្រាកំណើត​មួយ​ខ្ពស់បំផុត​សម្រាប់​ខេត្ត ហើយ​បើ​ពិ​និ​ត​តាម​ចំនួន​លំហូរ​ភ្ញៀវទេសចរ ជាពិសេស​ចុងឆ្នាំ​នេះ​ខេត្តកំពត​ទទួល​រៀបចំ​ព្រិ​ត្តិ​ការណ៍​បុណ្យ​សមុទ្រ​ផង​នោះ លោក​អាច​សណ្តាន​បាន​ថា​ភ្ញៀវទេសចរ​និង​នៅតែ​បន្ត​កើនឡើង ព្រោះ​កំពត​មាន​សមិទ្ធិផល​ទេសចរណ៍​ថ្មីៗ​ជាច្រើន​បាន​នឹង​កំពុង​លេចចេញ​ជា​រូបរាង​បណ្តើរៗ​ពីមួយ​ខែ​ទៅ​មួយខែ​៕
​អត្ថ​ប​ទៈ សារឹម អាន​