ព្រះ​មន្ត្រី​សង្ឃ​ទូទាំង​ខេត្តកំពត​ចូលជួប​សំណេះសំណាល និង​ប្រោះព្រំ​ជូន​ឯកឧត្តម ជាវ តា​យ អភិបាលខេត្ត ក្នុងឱកាស​ផ្ទេរ​ទៅជា​អភិបាលខេត្ត​ពោធិ៍សាត់​

​នៅ​ព្រឹក​ទី​៩ ខែតុលា ឆ្នាំ​២០២១ នា​សាលា​ខេត្តកំពត ព្រះ​តេជ​គណ ញ៉ែ​ត ចន្ទ​តារា ព្រះ​មេគណ​ខេត្ត បាន​និមន្ត​ដឹកនាំ​ព្រះ​មន្ត្រី​សង្ឃ​គ្រប់​ឋានានុក្រម​ទូទាំង​ខេត្តកំពត ដើម្បី​និមន្ត​ជួប​សំណេះសំណាល និង​ប្រោះព្រំ​ពរជ័យ​ជូន ឯកឧត្តម ជាវ តា​យ អភិបាល នៃ​គណៈ​អភិបាលខេត្ត ក្នុងឱកាស​ដែល​ឯកឧត្តម ត្រូវបាន​ផ្ទេរចេញ​ទៅកាន់ តំណែង​ជា​អភិបាលខេត្ត​ពោធិ៍សាត់​ពេលខាងមុខ​នេះ​។​

​ក្នុងឱកាស​នោះ​ឯកឧត្តម ជាវ តា​យ អភិបាលខេត្ត បាន​សម្ដែង​នូវ​សមានចិត្ត​អរ​ព្រះ​គុណ នូវ​ការស្រឡាញ់​រាប់អាន​ពី​សំណាក់​ព្រះ​មន្ត្រី​សង្ឃ​គ្រប់​ឋានានុក្រម រួម​នឹង​ព្រះសង្ឃ អាចារ្យ​គណៈកម្មការ​វត្ត ប្រជា​ពុទ្ធបរិស័ទ ក្នុង​ខេត្តកំពត​ទាំងមូល ដែល​តែងតែ​ផ្ដល់នូវ​កម្លាំងកាយ​ចិត្ត កិត្តិយស ការស្រឡាញ់​រាប់អាន និង​គាំទ្រ​នូវ​សកម្មភាព របស់​រដ្ឋបាល​ខេត្តកំពត ក្រោម​ការដឹកនាំ និង​គ្រប់គ្រង​របស់​ឯកឧត្តម​នា​រយៈពេល​កន្លងមក ទាំង​វិស័យ​ពុទ្ធចក្រ អាណាចក្រ និង​វិស័យ​មនុស្សធម៌ ក្នុង​គោលដៅ​ការបម្រើ ជាតិ សាសនា ព្រះមហាក្សត្រ និង​ប្រជាពលរដ្ឋ​។

តែ​ទោះបីយ៉ាងណា ឯកឧត្តម ជាវ តា​យ អភិបាលខេត្ត ក៏បាន​បញ្ជាក់ថា ការផ្ទេរ​ភារៈកិច្ច​នេះ គឺជា​ក្រឹ​ត​ក្រម​ប្រព្រឹត្តទៅ​នៃ​ច្បាប់រដ្ឋបាល​ធម្មតា តែ​ចំណុច​សំខាន់​ឯកឧត្តម និង​ខិតខំ​ប្រឹងប្រែង​បន្ថែមទៀត ក្នុងការ​ដឹកនាំ​និង​អភិវឌ្ឍន៍​ដើម្បី​បម្រើ​ជាតិ និង​ប្រជាជន​នៅ​ខេត្តពោធិ៍សាត់ ឱ្យបាន​កាន់តែ​ល្អ និង​រីកចម្រើន​បន្តទៀត​។​

​មាន​សង្ឃដីកា​ក្នុងឱកាស​នោះដែរ ព្រះ​តេជគុណ ញ៉ែ​ត ចន្ទ​តារា ព្រះ​មេគណ​ខេត្ត រួម​នឹង​មន្ត្រី​សង្ឃ ដែល​បាន​និមន្ត​ចូលរួម បាន​សម្ដែង​សមានចិត្ត​កោតសរសើរ និង​ការ​នឹករឭក ចំពោះ​សកម្មភាព នៃ​ការដឹកនាំ​របស់​ឯកឧត្តម ជាវ តា​យ អភិបាលខេត្ត នា​រយៈពេល​ជិត​៤ ឆ្នាំ​កន្លងមកនេះ ធ្វើឱ្យ​ខេត្តកំពត មានការ​អភិវឌ្ឍ​រីកចម្រើន​លើ​គ្រប់​វិស័យ ទាំង​វិស័យ​ពុទ្ធចក្រ និង​អាណាចក្រ ដែល​សមិទ្ធផល​ទាំងអស់នេះ ធ្វើឱ្យ​ប្រជាពលរដ្ឋ​មាន​អំណរ​សាទរ ត្រេកអរ ចំពោះ​ការដឹកនាំ និង​សកម្មភាព​របស់​ឯកឧត្តម​អភិបាលខេត្ត​។

​ពិសេស​សម្រាប់​ក្នុង​មជ្ឈដ្ឋាន​មន្ត្រី​សង្ឃ​គ្រប់​ឋានានុក្រម រួម​នឹង​ព្រះសង្ឃ អាចារ្យ​គណៈកម្មការ​វត្ត ពុទ្ធបរិស័ទ​ក្នុង​ខេត្ត មានការ​កោតសរសើរ​នូវ​គុណ​តម្លៃ នៃ​ការខិតខំ​ជំរុញ​ក្នុង​កិច្ច​អភិវឌ្ឍ និង​បម្រើប្រជាជន​នៅក្នុង​ខេត្តកំពត​កន្លងមកនេះ​។ តាមរយៈ​នៃ​ការខិតខំ​បញ្ចេញ​នូវ​សកម្មភាព បន្សល់​នូវ​សមិទ្ធផល និង​កិត្តិយស​សម្រាប់​ជូន​ដល់​ប្រជាពលរដ្ឋ​ក្នុង​ខេត្តកំពត​កន្លងមក បានធ្វើឱ្យ​មន្ត្រី​សង្ឃ​គ្រប់​ឋានានុក្រម រួម​នឹង​ព្រះសង្ឃ ប្រជា​ពុទ្ធបរិស័ទ​គ្រប់​មជ្ឈដ្ឋាន​ក្នុង​ខេត្ត​មានការ​នឹករឭក និង​សោកស្ដាយ​ចំពោះ​សកម្មភាព​ដឹកនាំ​របស់​ឯកឧត្តម ជាវ តា​យ ដែល​នឹងត្រូវ​ផ្ទេរ​ទៅកាន់​តំណែង​ជា​អភិបាលខេត្ត​ពោធិ៍សាត់​នាពេល​ខាងមុខនេះ​។

​ក្នុងឱកាស​នោះ​ឯកឧត្តម ជាវ តា​យ អភិបាលខេត្ត ក៏បាន​នាំមក​នូវ​បច្ច័យ​ចំនួន ២១​លាន​រៀល​របស់​សម្ដេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង​សម្ដេច​កិត្តិ​ព្រឹទ្ធ​បណ្ឌិត ប៊ុនរ៉ានី ហ៊ុនសែន ប្រធាន​កាកបាទក្រហមកម្ពុជា​តា​មរយៈ​រដ្ឋបាលខេត្ត ប្រគេន​ដល់​ព្រះ​ព្រះ​មេគណ​ខេត្តកំពត ដើម្បី​ចាត់ចែង​និង​ដំណើរការ​អភិវឌ្ឍ​ក្នុង​វិស័យ​ព្រះពុទ្ធសាសនា​ក្នុង​ខេត្ត​បន្តទៀត​ផងដែរ​៕

​អត្ថបទ​៖ មន្ទីរ​ព័ត៌មាន​ខេត្តកំពត​