ខេត្តកំពត​រយៈពេល​ឈប់សម្រាក​បុណ្យ​ភ្ជុំបិណ្ឌ​២​ថ្ងៃ មាន​ភ្ញៀវទេសចរ​ជាង ៦​ម៉ឺន​នាក់​បានមក​សម្រាក​កម្សាន្ត​

ខេត្តកំពត​គឺជា​ខេត្ត​គោលដៅ​ទេសចរណ៍​មួយ ដែល​សម្បូរ​ទៅដោយ​រមណី​ដ្ឋា​ន​ធម្មជាតិ អេកូ​ទេសចរណ៍ កន្លែង​កម្សាន្ត​ជាច្រើន​គួរឱ្យ​ទាក់ទាញ ដែល​ភ្ញៀវទេសចរ​ដែល​មកកាន់​ទឹកដី​នៃ​ខេត្ត​មួយ​នេះ​អាច​មានឱកាស​ទៅ​ក​ម្រា​ន្ត​បាន​ច្រើន​កន្លែង​ដោយ​ប្រើ​រយៈពេល​ខ្លី​។​

​ជាក់ស្តែង​ក្នុង​រយៈពេល​២​ថ្ងៃ នៃ​ថ្ងៃ​ឈប់សម្រាក​នៃ​ពិធីបុណ្យ​ភ្ជុំបិណ្ឌ ខេត្តកំពត​ទទួលភ្ញៀវ​ទេសចរ​មក​សម្រាក​ក​ម្រា​ន្ត​ចំនួន ៦៧.២០៣​នាក់ ក្នុងនោះ​ភ្ញៀវទេសចរ​ជាតិ​ចំនួន ៦៦.៦១២​នាក់ ភ្ញៀវទេសចរ​អន្តរជាតិ​ផ្ទៃក្នុង​មាន​ចំនួន ៥៩១​នាក់ នេះ​បើ​យោងតាម​របាយការណ៍រ​បស់​មន្ទីរ​ទេសចរណ៍​ខេត្តកំពត​។​

​លោក សយ ស៊ី​ណុល ប្រធាន​មន្ទីរ​ទេសចរណ៍​ខេត្តកំពត បាន​បញ្ជាក់ថា ភ្ញៀវទេសចរ​ដែល​ធ្វើដំណើរ​មក​សម្រាក​កម្សាន្ត​នាឱកាស​បិ​ណ្យ​ភ្ជុំបិណ្ឌ​ក្នុង​ឆ្នាំ​២០២១​នេះ មានការ​កើនឡើង​ជាង​ឆ្នាំ​២០២០ ដោយនៅ​ថ្ងៃទី​១ ភ្ញៀវ​ទេសចរណ៍​មាន​ចំនួន ៣០.៤៥៥​នាក់​កើនឡើង ប្រមាណ ៥៩,៩០​ភាគរយ បើ​ធៀប​នឹង​ថ្ងៃទី​១ នៃ​បុណ្យ​ភ្ជំបិណ្ឌ ឆ្នាំ​២០២០ ហើយ​ថ្ងៃទី​២ ភ្ញៀវ​ទេសចរណ៍​មាន​ចំនួន ៣៦.៧៤៨​នាក់ កើនឡើង​ប្រមាណ ៥២.៣៨​ភាគរយ បើ​ធៀប​នឹង​ថ្ងៃទី​២ នៃ​បុណ្យ​ភ្ជុំបិណ្ឌ ឆ្នាំ​២០២០​កន្លងទៅ ហើយ​ចំពោះ​សេវាកម្ម​ស្នាក់នៅ​ក្នុង​ខេត្តកំពត ទាំង​ផ្ទះសំណាក់ សណ្ឋាគារ គឺ​ត្រូវបាន​ភ្ញៀវ​សម្រាក​ពេញ​ទាំងអស់ គិត​ត្រឹម​ម៉ោង ៦​ល្ងាច ថ្ងៃទី​០៦ ខែតុលា ឆ្នាំ​២០២១​។​

​លោក​ប្រធាន​មន្ទីរ​បាន​បន្ថែមថា ចំពោះ​ការអនុវត្ត​វិធាន​សុ​វ​តិ្ត​ភាព និង​សារា​ចរណ៍​ណែនាំ​នានា របស់​ប្រមុខ​រាជរដ្ឋាភិបាល ក្រសួងសុខាភិបាល និង​ក្រសួងទេសចរណ៍ តាម​ការអង្កេត​របស់​មន្ត្រី​នៃ​មន្ទីរ​ទេសចរណ៍​ខេត្ត​បាន​គាត់​សម្គាល់​ឃើញថា ទាំង​ប្រ​ត្តិ​ប​ត្ត​ករ​ទេសចរណ៍ ភ្ញៀវ​ទេចរ​បាន​អនុវត្តន៍​បាន​យ៉ាង​ល្អ ដោយ​ប្រកាន់​ភ្ជាប់​នូវ​វិធាន​សុ​វត្តិភាព ៣​កុំ ៣​ការពារ​។​

​ចំពោះ​ផ្នែក​សន្តិសុខ​សណ្តាប់ធ្នាប់​សាធារណៈ កម្លាំង​នគរបាល នៃ​ស្នងការដ្ឋាន​នគរបាល​ខេត្តកំពត បានចេញ​ប្រតិបត្តិ​ការណ៍​ក្នុងការ​សម្រួល​ចរាចរណ៍​នៅ​ចំណុច​ស្ពាន​ព្រែក​កំពង់បាយ (​ស្ពាន​ថ្មី​) ដើម្បី​កុំឱ្យ​មានការ​កកស្ទះ​ចរាចរណ៍​យូរ ដែល​ក្នុងនោះ​ក៏មាន​ការចូលរួម​ពី​កម្លាំង​នៃ​បញ្ជាការដ្ឋាន​កងរាជអាវុធហត្ថ​ក្រុង​កំពត​ផងដែរ​៕

​អត្ថបទ​៖ មន្ទីរ​ព័ត៌មាន​ខេត្តកំពត​