​អាជ្ញាធរ និង​មន្ត្រី​ជំនាញ​ប្តេជ្ញា​ធ្វើ​ឲ្យ​ក្រុង​កំពត​មាន​បរិស្ថាន​អនាម័យ​ស្អាត​គ្រប់​រដូវ​កាល​

​ក្រោយពី​បានទទួល​ពានរង្វាន​ជ័យលាភី​ទីក្រុង​ទេសចរណ៍​ស្អាត​អាស៊ាន ខេត្តកំពត​នៅតែ​បន្ត​កិច្ចខិតខំ​ប្រឹងប្រែង ក្នុងការ​សម្អាត​បរិស្ថាន​អនាម័យ ពិសេស​ការ​ទុកដាក់​សំរាម និង​ការប្រមូល​សំរាម​នៅក្នុង​ទីក្រុង​។ បើតាម​ស្មារតី​នៃ​កិច្ចប្រជុំ​ជំរុញ​ការអនុវត្ត​បញ្ហា​ទុកដាក់ និង​គ្រប់គ្រង​សំរាម​ក្រុង​កំពត រដ្ឋបាលខេត្ត ក្រុង សង្កាត់ និង​មន្ទីរជំនាញ​បាន​ប្តេជ្ញា​ធ្វើ​ឲ្យ​បរិស្ថាន​អនាម័យ​ក្រុង​កំពត​ស្រស់ស្អាត​គ្រប់​រដូវ​។​

​នៅ​ថ្ងៃទី​៦ ខែកុម្ភៈ ឆ្នាំ២០២០ នៅ​សាលប្រជុំ​សាលាខេត្ត រដ្ឋបាល​ខេត្តកំពតបាន​ដឹកនាំ​កិច្ចប្រជុំ​មួយ​ដើម្បី​ជំរុញ​ការអនុវត្ត​បញ្ហាការគ្រប់គ្រង​ប្រមូល​ទុកដាក់​សំរាម និង​ការសំអាត​អនាម័យ​បរិស្ថាន​ក្រុង​កំពតឲ្យ​បាន​កាន់តែ​ប្រសើរ​។​ ​កិច្ច​ប្រ​ជុំ​​នោះ​មានការ​ចូលរួម មតិយោបល់ ពិភាក្សា​ពី​អាជ្ញា​ក្រុង សង្កាត់ និង​មន្ត្រី​ជំនាញ និង​ក្រុមហ៊ុន​ប្រមូល​សំរាម លើ​បញ្ហា​ប្រឈម​នានា ដើម្បី​រក​វិធានការ​គន្លឹះ ក្នុងការ​ដោះស្រាយ​លើ​ការងារ​គ្រប់គ្រង​ប្រមូល​ទុកដាក់​សំរាម ក៏​ដូច​បញ្ហា​ការ​សំ​អាត​អានា​ម័​យ​បរិស្ថាន​ក្រុង​កំពត ឱ្យ​កាន់​តែមាន​ភាព​ទាក់ទាញ ទេសចរណ៍ និង​ធានាបាន​នូវ​សុខមាលភាព​សាធារណៈ ឲ្យ​បាន​កាន់តែ​ល្អប្រសើរ​ថែមទៀត ។​

ឯកឧត្តម ​ជាវ តា​យ ​អភិបាលខេត្តបាន​បញ្ជាក់ថា បញ្ហា​ប្រមូល និង​ទុកដាក់​សំរាម ក៏​ដូច​បញ្ហា​សំអាត​អនាម័យ​បរិស្ថាន​ក្រុង គឺជា​បញ្ហា​មួយ​ដែល​អាជ្ញាធរ​គ្រប់​ថ្នាក់​ក្នុង​មូលដ្ឋាន និង​មន្ទីរជំនាញ​ពាក់ព័ន្ធត្រូវតែមាន​ការប្ដេជ្ញាចិត្តរួម​សហ​ការ​គ្នា​ជាប្រចាំក្នុងការ​ពង្រឹង និង​ជំរុញ​ការអនុវត្ត​អោយបាន​ព្រម​គ្នា​។​

​ឯកឧត្តមអភិបាលខេត្ដ​ក៏បាន​បន្តថា រយៈពេល​កន្លងទៅ​បញ្ហា​សំរាម​នៅក្នុង​ក្រុង​កំពត ក៏ដូចជា​ឃុំ​មួយចំនួន​នៃ​ស្រុក​ទឹកឈូ​ដែល​ជាប់​ក្រុង​កំពត មានការ​យកចិត្តទុកដាក់​បានល្អ ពី​សំណាក់​អាជ្ញាធរ​មូលដ្ឋាន ក៏ដូចជា​ប្រជាព​រដ្ឋ ប៉ុន្តែ យើងទាំងអស់គ្នា ត្រូវ​រួមគ្នា​ធ្វើ​បន្តទៀត​ឲ្យ​កាន់តែ​ល្អប្រសើរ​ដើម្បី​ធានា​នូវ​និរន្ត​ភាព ក្រុង​បៃតង ក្រុង​គ្មាន​ការបំពុល​បរិស្ថាន ។​

តាម​ភាពជាក់ស្តែង ប៉ុន្មាន​ខែ​ចុង​ក្រោយនេះ​បន្ទាប់ពី​ថ្ងៃបុណ្យ​សមុទ្រ​ចុងឆ្នាំ២០១៩​មក បញ្ហា​ប្រមូល​ទុកដាក់​សំរាមនៅមានកម្រិត ។ បញ្ហា​សំរាម និង​បញ្ហា​សំអាត​អនាម័យ​បរិស្ថាន​តាម​ដងផ្លូវសួន​សាធារណៈនៃ​ក្រុង​កំពត និង​តាម​ដងផ្លូវ​មួយចំនួននៅ​ជុំវិញ​ក្រុង​កំពត ហាក់បីដូចជា​ធ្លាក់ចុះ​នៅ​មិនទាន់បាន​ឆ្លើយតប​ប្រកបដោយ​ចីរភាព​ទេ ទាមទារ​ឱ្យ​យើង​រួមសហការ​គ្នា​បន្ត​ពង្រឹង​យកចិត្តទុកដាក់​ឲ្យ​បាន​កាន់តែខ្លាំងក្លា​ល្អប្រសើរ​ថែមទៀត​។​ ​បើតាម​ការលើកឡើងរ​បស់​​ប្រធាន​មន្ទីរ​បរិស្ថាន លោក ស៊ុយ ធា បាន​ឲ្យ​ដឹងថាជា​មធ្យម​ក្នុង​មួយថ្ងៃ ក្រុង​កំពត​ប្រមូល​សំរាម​ប្រមាណ​៦១​តោន​៕
​អត្ថ​ប​ទៈ លោក សាយ យាវ​