ឯកឧត្តម ជាវ តា​យ ដឹកនាំ​កិច្ចប្រជុំ​គណៈបញ្ជាការ​ឯកភាពរ​ដ្ឋ​បាល​ខេត្តកំពត​លើក​ទី​២២

កាលពី​រសៀល​ថ្ងៃ​ចន្ទ ៩​កើត ឆ្នាំកុរ ឯកស័ក ពុទ្ធសករាជ​២៥៦៣ ត្រូវ​នឹង​ថ្ងៃទី​០២ ខែមីនា ឆ្នាំ​២០២០ រដ្ឋបាល​ខេត្តកំពត​បា​ន​បើក​កិច្ចប្រជុំ​គណៈបញ្ជាការ​ឯកភាពរ​ដ្ឋ​បាល​ខេត្ត​លើក​ទី​២២ ក្រោម​អធិបតីភាព ដឹកនាំ​កិច្ចប្រជុំ​ឯកឧត្តម​ ជាវ តា​យ អភិបាល​នៃ​គណៈ​អភិបាលខេត្ត និង​ជា​ប្រធាន​គណៈបញ្ជាការ​ឯកភាព​រដ្ឋបាលខេត្ត​។ កិច្ចប្រជុំ​នេះ​មាន​សមាជិក​ចូលរួម​ពី​សំណាក់ លោក​-​លោកស្រី​ក្នុង​ជួរ​គណៈ​អភិបាលខេត្ត អភិបាលក្រុង ស្រុក ថ្នាក់ដឹកនាំ​មន្ទីរ​អង្គភាព​ជុំវិញ​ខេត្ត គណៈបញ្ជាការ​កងឯកភាព​នៃ​អង្គភាព​កម្លាំងប្រដាប់អាវុធ​ក្នុងភូមិ​សាស្ត្រ​ខេត្តកំពត​សរុប​ចំនួន​៧៩ នាក់​។​

​កិច្ចប្រជុំ​បន្ទាប់ពីបាន​ពិនិត្យ​ពិភាក្សា​លើ​របាយការណ៍​បូកសរុប​លទ្ធផល​ការងារ​របស់​គណៈបញ្ជាកា​រ​ឯកភាព​រដ្ឋបាលខេត្ត​ប្រចាំខែ​កុ​ម្ភះ ​ឆ្នាំ​២០២០ ដែល​បាន​ឆ្លុះបញ្ចាំងឲ្យ​ឃើញពី​វឌ្ឍនភាព​រីកចម្រើន ក៏​ដូច​បញ្ហា​ប្រឈម​នានារបស់​បណ្ដា​អា​ជ្ញាធរ​ក្រុង ស្រុក មន្ទីរ​អង្គភាព ព្រមទាំង​បណ្ដា​កងឯកភាព​នៃ​កងកម្លាំង ក្នុងភូមិ​សាស្ត្រ​ខេត្តកំពត​រួចមក​។​

​មានប្រសាសន៍​ក្នុង​កិច្ចប្រជុំ​នេះ ឯកឧត្តម​ ជាវ​ តា​យ អភិបាល​នៃ​គណៈ​អភិបាលខេត្ត និង​ជា​ប្រធាន​គណៈបញ្ជាការ​ឯកភាព​រដ្ឋបាលខេត្ត បាន​លើក​បញ្ជាក់ថា ដោយ​ផ្ដើមចេញពី​សភាពការណ៍​ល្អប្រសើរ​របស់​ប្រទេសជាតិ ក៏​ដូច​ក្នុង​ខេត្ត​កំពត​ទាំងមូល ធ្វើ​ឲ្យ​ប្រជាពលរដ្ឋ​មាន​ភាពកក់ក្ដៅ និង​មាន​ជំនឿ​ទុកចិត្ត​លើ​ការដឹកនាំ​របស់​រាជរ​ដ្ឋា​ភិ​បាល​កម្ពុជា ក្រោម​ការដឹកនាំ​របស់ ​សម្ដេច​តេ​ជោ​ ហ៊ុន សែន​ ជា​ប្រមុខ ដែល​បាន​បង្កើតបាន​នូវ កាលានុវត្តភាព ក្នុងការ​ស្រូប​ទាញ​ចំណូល​​ផ្នែក​សេដ្ឋកិច្ច ធ្វើ​ឲ្យ​មាន​កំណើន​ជីវភាព​របស់​ប្រជាពលរដ្ឋ​តាមរយៈ​ការកើនឡើង នូវ​ទេសចរណ៍​ជាតិ​-​អន្តរជាតិ​និង​មានការ​អភិវឌ្ឍ​លើ​គ្រប់​វិស័យ​នៅ​ទូទាំងប្រទេស ជាពិសេស​នៅក្នុង​ខេត្តកំពត ដែលជា​ខេត្ត​ប្រកបដោយ​សក្ដា​នុ​ពល​​យ៉ាងខ្លាំង​ក្លា​។​

​ឯកឧត្តម ជាវ តា​យ អភិបាលខេត្ត​ក៏បាន​ធ្វើការ​កត់សំគាល់​និង​បានធ្វើ​ការវាយតម្លៃ​ខ្ពស់ លើ​ចំណុចខ្លាំង​មួយចំនួន​ដែល​គណៈបញ្ជាការ​ឯកភាព​រដ្ឋបាលខេត្ត បាន​អនុវត្ត​កន្លងមក​យ៉ាង​ល្អប្រសើរ ព្រមទាំង​បាន​លើក​បង្ហាញ​នូវ​ចំណុច​ខ្សោយ​​​មួយចំនួន ដើម្បី​រួមគ្នា​ធ្វើការ​កែលម្អ​និង​ដោះស្រាយ​ឱ្យបាន​ជាបន្ទាន់ នូវ​យន្ត​ការចុះ​ត្រួតពិនិត្យ ផ្សព្វផ្សាយ​និង​អនុវត្ត​ច្បាប់​ព្រមទាំង​ការចូលរួម​សហការ​ពី​មជ្ឈដ្ឋាន​នានា ដែល​នៅមានកម្រិត​។ ឯកឧត្តម​ ជាវ តា​យ ក៏បាន​បន្ត​ណែ​ជំរុញ​ដល់​អាជ្ញា​ធរមាន​សមត្ថកិច្ច មន្ទីរជំនាញ និង​កងកម្លាំង​ទាំងអស់ ត្រូវ​បន្ត​យកចិត្តទុកដាក់ឲ្យ​បាន​សកម្ម​ខ្លាំងក្លា​ថែមទៀត​នូវ​តួនាទី​ភារកិច្ច​របស់ខ្លួន ដើម្បី​សម្រេច​ឲ្យ​បានជោគជ័យ​និង​មាន​ប្រសិទ្ធភាព​កាន់តែ​ល្អប្រសើរ​ឡើង​។

ពិសេស​ទៅទៀត គឺ​ការយកចិត្តទុកដាក់​អនុវត្ត​នូវ​ផែនការ​ទិសដៅ​បន្ត​ដែល​គណៈបញ្ជាការ​ឯកភាព​រដ្ឋបាលខេត្តបានដាក់​ចេញសម្រាប់​អនុវត្ត​ដែល​ក្នុងនោះ​រួមមាន​៖
-​ត្រូវ​រៀបចំ​ផែនការ​សកម្មភាព​ច្បាស់​លាស់ ក្នុងការ​ចាត់តាំង​អនុវត្ត​ការបង្ការ​ទប់ស្កាត់​និង​បង្ក្រាប​បទល្មើស​នានា​ក្នុង​ដែន​សមត្ថកិច្ច​របស់ខ្លួន​។​
-​បន្ត​ពង្រឹង​ពូន​ជ្រុំ​ទំនាក់ទំនង កិច្ចសហប្រតិបត្តិការ​រវាង​កម្លាំង​សមត្ថកិច្ច​និង​អាជ្ញាធរ​ជាប់​ព្រំដែន​ដើម្បី​ការពារ​បូរណភាព​ទឹកដី និង​អធិបតេយ្យភាព​ជាតិ​ឲ្យ​បានល្អ​ប្រសើរ ។​
-​ពង្រឹង​កងកម្លាំង​មាន​សមត្ថកិច្ច​គ្រប់លំដាប់​ថ្នាក់ ក្នុងការ​ទទួលខុសត្រូវ​លើ​តួនាទី​ភារកិច្ច​និង​ត្រៀម​សម្ភារៈ​មធ្យោបាយ​ដើម្បី​ឆ្លើយតប​តម្រូវការ​ការងា​រ​ប្រចាំថ្ងៃ​។​

-​បន្ត​ប្រើប្រាស់​កម្លាំង​សរុប វិធាន​ការសរុប និង​មធ្យោបាយ​សរុប ដើម្បី​គ្រប់គ្រង​និង​ដោះស្រាយ​សភាពការណ៍​ក្នុង​ខេត្ត​។​
-​ជម្រុញ​សកម្មភាព​ផ្សព្វផ្សាយ និង​ធ្វើ​វេទិកាសាធារណៈ​ឱ្យបាន​ទូលំទូលាយ ព្រមទាំង​ពង្រឹង​សកម្មភាព​ក្រុម​ប្រជា​ការពារ​ក្នុង​ការចូល​រួមសហកា​រកា​រពារ ទប់ស្កាត់​បទល្មើស​ក្នុង​មូលដ្ឋាន​។​
-​បន្ត​យកចិត្តទុកដាក់​ត្រួតពិនិត្យ និង​ប្រមូល​ទិន្នន័យ លើ សកម្មភាព​អនុវត្ត​គោលនយោបាយ ភូមិ​-​ឃុំ​មាន​សុវត្ថិភាព ទាំង​អង្គភាព និង​បុគ្គល​ត្រៀមលក្ខណៈ​ក្នុងការ​វាយតម្លៃ​លទ្ធផល​ប្រឡងប្រណាំង​តាម​លក្ខណៈវិនិច្ឆ័យ​រប​ស់​ក្រសួងមហាផ្ទៃ​។​
​អត្ថ​ប​ទៈ លោក សាយ យាវ​